پشتی مرنا هه‌ڤژینا خوه ستران نه‌گۆتینه
سلێمانیێ، عه‌زیز هه‌ورامی:
هونه‌رمه‌ندێ به‌رنیاسێ ده‌ڤه‌را هه‌ورامان (دارا محه‌مه‌د) كو نێزیكی چل سترانێن تۆماركری هه‌نه، د دیداره‌كێ دا بۆ رۆژناما ئه‌ڤرۆ دیاركر كو ژبلی سترانگۆتنێ ئه‌و كارێ نڤیسینێ ژی دكه‌ت و ڤه‌كولین ل سه‌ر چه‌ندین سترانێن فولكلۆری یێن وێ ده‌ڤه‌رێ كریه و شیایه سێ پرتووكان چاپ بكه‌ت و نوكه ژی پێنج پرتووك بۆ چاپێ د به‌رهه‌ڤن كو نێزیكی بیست و دو سالانه ل سه‌ر كاردكه‌ت.
دارای گۆت: هونه‌رێ كوردی ل ده‌ڤه‌را هه‌ورامان گه‌له‌كێ زه‌نگینه، لێ هه‌تا نوكه كه‌نالێن راگه‌هاندنێ ب چاڤێ فه‌قیران به‌رێ خوه دده‌نه هونه‌رمه‌ندێن ڤێ ده‌ڤه‌رێ و گه‌له‌ك كێم سترانێن وان به‌لاڤ دكه‌ت، هه‌روه‌سا هه‌تا نوكه مه چو كه‌نال نینن كو گرێدای هونه‌ر و كلتۆرێ ده‌ڤه‌رێ بن، چنكو بۆ تۆماركرنا سترانه‌كێ یان كلیپكرنا وێ یان چاپكرنا پرتووكه‌كێ دڤێت بچین خواستنێ بكه‌ین و سه‌رمایه‌دارێن ده‌ڤه‌رێ ژی پشته‌ڤانیێ ل كارێن هونه‌ری ناكه‌ن، له‌ورا ئه‌ز دشێم بێژم هونه‌ر ل ده‌ڤه‌را هه‌ورامان یێ د مه‌ترسیێ دا، بۆ زانین پشتی مرنا هه‌ڤژینا خوه، كو به‌ری پێنج سالان بوو هه‌تا نوكه من چ ستران نه‌گۆتینه.
