پشتی نسكۆیا 1975ێ نەخۆشتر نەهاتینە ومن نەدیتی نە
دیدار، سالار محەمەد دۆسكی:
پێشمەرگێ شۆڕەشا ئیلۆنێ و زیندانیێ سیاسی عزەت عارف عەبان شندوخی، ژ دایك بوویێ سالا 1953ێ باژێرێ دهۆكێ یە، خواندنا خوە یا سەرەتایی و ناڤنجی ل دهۆكێ ب دووماهی ئینایە، گەنجاتیا خوە دبیتە پێشمەرگە و دووڤدا دهێتە نەفیكرن و زیندانكرن و دووڤ دا دهێتە ئازادكرن.
عزەت عەبان شندوخی، دیدارەكێ دا ل گەل رۆژناما ئەڤرۆ ئاشكراكر كو ل گەل بەتلیونا (محەمەد حەسەن باجلوری) بوو و ( عەبدوالرحمانێ فەیرۆز) ل شكەفتا سمتی و گەلیێ دهۆكێ، گۆت: وی دەمی (مستەفا عەبدوالقادرلیناڤەی) هاتە كێلیا شەدایێ و ستاند و ئەم هاتینە كێلیا فرعینی و مە نەستاند، شەرێ (شكەفتا سمتی) حەفت شەڤ و حەفت رۆژان هاتەكرن و حوكمەت نەشیا بهێتە جهێ مە و بەردەوام فرۆكە ل سەر سەرێ مە بوو، وی دەمی گەنج بووین و مە پرسیارا مافێن مللەتێ خوە دكر و ئەم هەمی دەما دبەرهەڤ بووین بهێنە شەهیدكرن بتنێ ئازادبژین وەلاتێ مە بهێتە رزگاركرن، پشتی شكەستنا سالا 1975ێ كو هەتا نوكە ژ وێ نەخوشتر نەهاتیە و مە نەدیتی یە، حوكمەتا بەعس یا وی سەر ئەز ل گەل هەر دو برایێن من (نەوزاد و سەلام) نەفیكرین و هنارتینە پارێزگەها (دیوانیێ) و پشتی بورینا (10) هەیڤان زڤراندیە دهۆك و هاتینە ئازادكرن و ب شێوەكێ بخورتی حوكمەتێ دامەزراندین ل رێڤەبەری یا چاندنێ ل پارێزگەها دهۆك و پشتی بورینا دو سالان ل سالا 1977ێ قیادا بەروەخت یا پارتی دیموكراتی كوردستان ب هندەك رێكا پەیوەندی ل گەل مەكر و دووڤ دا هەر ئەوان كەسان ئەم ئاشكەراكرین و ئەمنێ دەستەسەركرین، هنارتینە بنگەهێ پولیسان ب دهۆك و گەلەك بزاڤ ل گەل مە كرن و مە خوە ئاشكرانەكر وب شەف هنارتینە فەرمانگەها ئەمنا دهۆك و ئەمنێ گۆتی پەیوەندی ب تەهاتیەكرن و تە ناڤێ خوە دایێ و گەلەك قوتان و ئەشكەنجدان و ب هەمی جوران ل ئەمنا دهۆك و هەوالگێری یا مویسل و مونزوما شیمالی ل كەركوكێ دانا بەرمە.
زیندانیێ سیاسی و پێشمەرگێ هەر دو شورەشێن ئیلون و گولانێ زێدەتر گۆت: پشتی هاتینە رەوانەكرن بۆ كەركووكێ مە گەلەك رەزالەت و نەخوشی دیتن و هەر كەسەكێ زیندانا هەركووكێ نەدیتی ئەوی چ دنیا نەدیتی یە، جهەكێ گەلەك نەخوش بوو ژورەكا سێ ب چار هەتا پێنجی مرۆڤان تێدا بوو هەر دەمێ چووبایە دەست ئاڤەكێ یان بهێیە گازیكرن ب سوندان و داران دێ دانە مرۆڤی هاتن و چوونێ و خوارن نەبوو دوی ماوێ ل زیندانا كەركووكێ (7) هەڤالێت من ب قوتانێ هاتنە كوشتن و خوە ل بەر وێ ئەشكەنجدانێ نەگرت، ئێك ژوان (7) كورمامێ من (عەبدوالكریم فەرحان شندوخی) هەر حەفت خەلكێ دهۆك و زاخو بوون و دیسا پێنچ هەڤالێت من سێدارەدان(شەعبان دێریشكی، محمود غلبیشی، عابد زاویتەی، عارف جەمیل كزوی، ملازم عادل پێدەی) و پتر ژ هەیڤەكێ ل كەركووكێ ماین و هەمی قوتان و ئەشكەنجادان و هەر من دانپیدان نەكر، بەری بهێمە كەركووكێ شەڤەكێ ل ئەمنا دهۆكێ گەلەك قوتام و من هەر دانپیدان نەكر و رێڤەبەرێ ئەمنێ (خەیری) داخازكرم وی ژی گەلەك قوتام و ئاخفتنێن كرێت گەلەك گۆتن و هەر من دانپیدان نەكر و هەر من گۆت پەیوەندی ب من كر و ئەز نەچوویمە ل گەل ئەوی گۆت بۆچی نەهاتی بێژیە مە ئان دا رێكخراو و رێكخستنێن هەوە یێن نهێنی نەهێنە ئاشكەراكرن؟، كاغەزەك ئینا و گەلەك نڤێسا و من نەزانی چ نڤێسی و ئێكسەر گۆت وەرە ئیمزا بكەت و ئەفسەرەك بوو و زێرەڤانەكێ تەلەعفەری بوو بناڤێ(حەیدەر) و رێڤەبەرێ ئەمنێ گۆتێ هەرن هەتا سپێدێ باش ب قوتن و ئەوان كێشام و هاڤێتمە ژوورەكێ ڤە و گەلەك ئێشاندم و ئەشكەنجەدام هەتا بوویە سپێدێ هاتن هاڤێتمە ترۆمبێلەكێ دا و دەستێن مە گرێدان و برینە دادگەها دهۆك و گەلەك پرچا مە و ریهێن من هاتبوون و خەلكێ دهۆكێ ل سەر جادا راوستیابوون و ئەم دیتین باوەربكە خەلكێ دهۆكێ بوومە دكرنە گری چونكە وی دەمی گەلەك گەنجێن دهۆكێ ژلایێ ئەمنێ ڤە هاتبوونە دەستەسەركرن و خەلكێ عاجز بوو و پتر 100 گەنجان گرت بوون و كەسەكێ نەزانی دێ چلێ كەن، شانصێ من دادوەر مرۆڤەكێ (عەبدولخالق سامەرایی) بوو و ب فەرمانا (سدام حسێن) ئەو دادوەر بۆ دهۆكێ هاتبوو ڤەگوهاستن، دو یێن ئەمنێ ئێكی دەستێ من و ئێكی ملمن گرت بوو و دادوەری گۆتێ ڤەكەن و دووڤ دا گۆتێ هوون هەرنە ژ دەرڤە و دەرگەهی بگرن، گۆتە خزمەتكاری بلا كەس نەهێتە ژوور، دووڤ دا كاغەزا بەرسینگی یا رێڤەبەرێ ئەمنێ نڤێسیی خواند گۆت كورێ من ئەڤ گۆتنێن تەنە؟؟ من گۆتێ بەلێ گۆت كورێ من ئەڤ سێدارەدانە ناڤێ دادوەر(غازی سامەرایی) ژ مالا (نەقیبی) بوو و من گۆتێ جەنابێ دادوەری یێ ل ئەمنێ بێت و بهێتە قوتان هەر ئەوان چ ڤێت دێ بێژیت، گۆت پا چەوا بوو . من گۆتێ راستە پەیوەندی ل گەل من كریە بەلێ نە چوویمە ل گەل، دادوەر رابوو ئەو كاغەزا رێڤەبەرێ ئەمنێ نڤسێسی راستڤەكر و دووڤ دا هاتینە رەوانەكرن بۆ كەركووكێ و ئەو زیندانا گەلەك نەخوش و عزابا دونیایێ مە ل كەركووكێ دیت و گەلەك زیندانا ل كەركوكێ ڤەگوهاستین هەتا بوویە رۆژا دادگەهێ و ئەم گەلەك مرۆڤ كرینە دقەفسێ ڤە، ئێكسەر دادوەری چەند ناڤ خواندن و سزایێ سێدارەدانێ بۆ دەركر و هەر ئێكسەر ئەو دەرێخستن و دووڤ دا ناڤێ چەند كەسێن دی خواند و ئەو ژی هاتنەسزادان ب سزایێ هەتا هەتایێ و دووڤ دا هندەكێن دی خواندن ئەو ژی هاتنە سزادان ب بیست سالان و هندەك پازدە سالان و ناڤێ من ل گەل نەهات و هەر ئێك یێ گوهداری یا ناڤێ خوە دكەت كا دێ چارەنڤێسی وی چ بیت و دووڤ دا یێن پێنچ سالی خواندن و دیسا ئەز ل گەل ئەوانژی نەبووم، دووڤ دا ناڤێ من خواند ل گەل هەر دو برایێن ئێك(حسێن و حەسەن لومانی، نازلین سامی و نەجات محەمەد سەدیق) سالەكێ سزادان و بێی زیندانی و مە گۆتە ئەڤە نعمەتا خودێ یە و ئێكسەر بۆ مویسل هاتینە رەوانەكرن و دووڤ دا بۆ ئەمنا دهۆكێ و ئەم ماین هەتا دوی شەڤێ و كەسەك دناڤا باژێری دا نەمای و دووڤ دا ئەم هاتینە ئازادكرن و گۆتن هەرنە ناف مالێن خوە، خودێ قورتالكرم و وی دادوەرێ هاتیە دهۆكێ كو كاغەزێن من گوهورین و دلوڤانی ب من بری.
زیندانیێ سیاسی، عزەت عارف عەبان زێدەتر گۆت: هەر دەم مرنا مە ل پێش چاڤێن مەبوو چونكە چ جورێن قوتانێ نەمابوون پێ نەهاتینە گۆتن و دیسا پێش چاڤێن مە هەڤالێن مە ب قوتانێ مرن و مە هەمی یا مرنا خوە دیت ل پێش چاڤێن خوە ,
ل دووماهیی عزەت عارف عەبان گۆت: داخازێ ژ حوكمەتا هەرێما كوردستانێ دكەم ب هەمی رەنگ و شێوا چاڤدانا ڤی مللەتی بكەت و كار بكەت ل سەر خوشكرنا ژیانا خەلكێ مە چونكە ڤی خەلكی گەلەك ماندیبوون دیتی یە و دێ دممنون بین ئەگەر كارەكێ باش بۆ ڤی مللەتی بكەت و ئەگەر كارەكی بۆ مللەتی بكەت ئەو یا وی كارێ باش بخوە دكەت .
