پشتی نه‌خۆشێ ده‌روونی ژ نه‌خۆشخانێ ده‌ردكه‌ڤیت ل مال چاوا سه‌ره‌ده‌ری دگه‌ل بهێته‌كرن؟
دهۆك، ره‌ڤین سالح:
نیهار ره‌شید په‌رستارا ده‌روونی دیاركر كو تشتێ ژ هه‌موویان گرنگتر ئه‌وه بو نه‌خوشی ئو خێزانا وی دیاربكه‌ین نه‌خوشیا ده‌روونی چ شه‌رم تێدا نینه، وگۆت: گه‌له‌ك نه‌خۆش شه‌رم دكه‌ن كو ئه‌ڤ نه‌خوشیه یا هه‌ی، دیسان مال ژی ئێك ژ ئه‌گه‌رانه كو بچاڤه‌كێ كێم ته‌ماشه‌ی وان دكه‌ن، لێ چ شه‌رم تێدانینه ئه‌و ژی وه‌كی نه‌خۆشیا دل و هناڤا و نه‌خۆشیێن ئافره‌تان، چاره‌سه‌ریا خوه هه‌یه، ئه‌م ڤان تشتا بو خێزانێن وان دبێژین، چونكو یڤا چاره‌سه‌ریا وان خێزانێ ڤه گرێدایه، هه‌روه‌سان هه‌كه خێزان دگه‌لمه یا هاریكار نه بیت نه‌خۆش چێنابیت، گه‌له‌ك نه‌خۆش ل سه‌نته‌رێ نه‌خوشیێن ده‌روونی هاتیه نڤاند چاره‌سه‌ری بو هاتیه كرن، پشتی نه‌خوش به‌ره‌ڤ مال چووی دوو رۆژه‌كا لمال دێ ره‌وشا وان تێك چیت، جاره‌كادی ره‌وانه‌ی سه‌نته‌ری دكه‌نه‌ڤه، ئه‌گه‌رێ ڤێ یه‌كێ دزڤریت بو سه‌ره‌ده‌ریكرنا خه‌له‌ت یا خێزانێ دگه‌ل نه‌خۆشی، تشتێ گه‌له‌ك نه‌خۆش پیێ دهێته ئێشاندن ئه‌وه ده‌مێ دخێزانێ دا بناڤێ دینێ یان دینو گازی دكه‌نێ، ئه‌ڤه ئێك ژ گازندێن نه‌خوشانه بومه دكه‌ن.
په‌رستارا ده‌روونی خویاكر پێدڤییه سه‌ره‌ده‌ریكرنه‌كا باش دگه‌ل وان بكه‌ن، ب وی چاڤی ته‌ماشه‌نه‌كه‌نێ كو نه‌خۆشێ ده‌روونی دێ زه‌ره‌رێ ل وانكه‌ت یان گه‌ل خوه نه ده‌رێخێن، وگۆت: ده‌مێ نه‌خۆش ژ سه‌نته‌ری به‌ره‌ڤ مال ڤه دچیت، یاگرنگه خێزانا وی ده‌رمانێن وی ل وه‌خت بده‌نێ، چه‌وا نۆشداری بو نڤێسایه هوسا بده‌نێ، هه‌روه‌سان هه‌رسیێ دانێن خارنێ دده‌مێ وان دا بخۆت، پێدڤییه شه‌ش هه‌تا هه‌شت ده‌مژمێرا بشه‌ڤ بنڤیت، خێزان نه‌خۆشی دوركه‌تن ژ وان هزرو بیرهاتنێن كه‌ڤن ئه‌وێن بووینه ئه‌گه‌ر توشی نه‌خۆشیا ده‌روونی بووی، یان وی ژوان كه‌سان دیركه‌ت یێ بوویه ئه‌گه‌رێ نه‌خۆشیا وی.
نیهارێ دازانین یاگرنگه نه‌خۆشێ ده‌روونی وه‌رزشێ بكه‌ت، وگوت: یاگرنگه فێقی و كه‌سكاتی بخۆت، هه‌روه‌سان مه‌له‌ڤانیكرن بو نه‌خۆشێ ده‌روونی گه‌له‌ك باشه، پێدڤییه دور كه‌ڤیت ژ ستران و فلمێن بخه‌م، چونكو نه‌خۆشێن ده‌روونی گه‌له‌ك بهه‌ستن، دبیت ده‌مێ ته‌ماشه فلمه‌كێ بخه‌م بكه‌ت چیروكا وی وه‌كی یا وی بیت، دێ تێكچیت و دبه‌را كه‌ته گری، هندی خێزان بشێت نه‌خۆشێ خوه نه‌هێلیته بتنێ، هه‌كه ما بتنێ دێ هزرا كه‌ت و هزرێن وان ژی هه‌موو نیگه‌تێفن، دێ هزر بو هێن كو كه‌س گرنگیێ بته ناده‌ت و كه‌سێ تو نه‌ڤێی و تو مرۆڤه‌كێ زێده‌ی دجڤاكی دا، لێ هه‌كه نه‌مانه بتنێ خێزانێ گه‌ل خوه بره سه‌ره‌دانا و سه‌یرانا و بازاری، ئه‌و دێ هزركه‌ت كو خێزان گرنگیێ پێدده‌ت و دێ باوه‌ریه‌كا مه‌زن بو په‌یدا بیت، پێدڤییه سنور بو نه‌خوشی بهێنه دانان، چونكو هنده‌ك خێزان یێن هه‌ین، گه‌له‌ك گرنگیا دایه نه‌خۆشا خوه، گه‌له‌كێت نازداربووین، ئه‌ڤ چه‌نده بوویه جهێ ئاریشێ بو وان. پێدڤییه نه‌هند نازدار بكه‌ن، و پشت گوهڤه نه‌هاڤێژن ژی، سه‌ره‌ده‌ریكرنا وان یا سنورداربیت.
