پشتی نەهـ سالێن ڤەقەتیانێ دوبارە فەستیڤالا یاریێن گۆڕەپانێ دەستپێكر
دوهی ب فەرمی فەستیڤالا سالانە یا یاریێن گۆرەپانێ بۆ قوتابخانەیێن ئامادیی ل سنورێ پەروەردەیێن دهۆك رۆژهەلات و رۆژئاڤا ل یاریگەها چالاكیێن وەرزشی دەستپێكر و بڕیارە هەتا 15ێ ڤێ مەهێ هەمی پەروەردێن سنۆرێ پارێزگەها دهۆكێ ئەنجامدەن.
ل دۆر ڤێ یەكێ ئێحسان حەسەن رێڤەبەرێ چالاكیێن وەرزشی و دیدەڤانی ل پەروەردەیا گشتی یا پارێزگەها دهۆكێ بۆ رۆژنامەیا ئەڤرۆ گۆت: ل دووڤ بەرنامەیێ سالانە و پشتی ڤەقەتییانەكا درێژ یا نەهـ سالان ژبەر كاودانێن دارایی و پەژییا كۆرۆنایی و شەڕێ دژی تیرۆرستێن داعش پێخوەشحالین بۆ وەرزێ نوو یێ چالاكیێن وەرزشی دەست ب فەستیڤالا وەرزی یا سالانە بكەین و دەستپێكێ ژی ل سەر ئاستێ پەروەردەیێن رۆژهەلات و رۆژئاڤا پشتی ڤاڤارتنێن خوە ل سەر ئاستێ قوتابخانەیێن ئامادەیی ئەنجامدایین دوهی یاریێن دووماهیێ یێن گۆرەپانێ بۆ هەردو پەروەردەیان هاتنە كرن و بڕیارە ئەڤ پرۆسێسە یا بەردەوامبیت هەتا هەمی پەروەردەیێن ل سنۆرێ پەروەردەیا گشتی یا پارێزگەها دهۆكێ یاریێن خوە ل جهێن جودا ئەنجامدەن.
هەروەسان ناڤهاتی گۆت: ل دووڤ خشەیێ هاتییە دانان پشتی ب دووماهی هاتنا یاریێن گۆرەپانێ یێن رۆژهەلات و رۆژئاڤا دێ ل چارشەمبییا بهێت فەستیڤالا یاریێن مەیدانێ یا پەروەردەیا بەردەرەش بیت و ل پێنچ شەمبیێ پەروەردەیا ئاكرێ دێ فەستیڤالا خوە ئەنجامدەت، د حەفتییا بهێت دا دێ پەروەردەیێن شێخان13 و سێمێل12 ژی یاریێن خوە ئەنجامدەن و دڤێت هەموو پەروەردە چالاكییا خوە بەری 15ێ ڤێ هەیڤێ ب دووماهی بینن، دووڤدا دێ فەستیڤالەكا دی ل سەر ئاستێ قەزیان هێـە دانان و دڤێت هەتا كانوونا ئێكێ یا بهێت هەمی چالاكی ب دووماهی بهێن پێخەمەت درۆستكرنا هەلبژارتیێ پەروەردەیا گشتی یا پارێزگەها دهۆكێ ژبۆ خوە بەرهەڤكرن بۆ فەستیڤالا مەزن ل سەر ئاستێ پەروەردەیێن پارێزگەهێن كوردستانێ.
