پشتی هەڤالەكێ مە خیانەتكری ئەز دانەكێ رۆژێ ب پانكێ ڤە هلاویستم
دیدار: سالار محەمەد دۆسكی
4 – 7
ترۆمبێل ل چ كۆنترۆل و خالێن پشكنینێ ڕانەدوەستیا، نوزانم ئەو چەند سات بوو ب لەز دچۆ. تنێ یا ئەز دزانم، تێدا گێژ ببووم، هەر بێهنەكێ عێلنجیا ل من ددا. دەنگێن نەفام تژی دهاتنە من و من جاران دزانی ئەو یێ كرێتی و گۆتنێن پیس دبێژنە مە و یێ باسی بلندكرنا پلە و پایەیێن خوە دكەن و دگۆتن:(هەر شەبەكەكا كەشفكەین، پلە و پایەیێن مە ژی بلند دبن). دكەنین و ئەو ژ ئاخفتنێ و گۆتنا كرێتیان رانەدوەستیان و دەڤێ وان نەكەتە سەرێك. هەتا جارەكێ، پشتی دانەكێ رۆژێ بۆری، ئەم پێ حەسیاین كو ترۆمبێلێ ژ لەزاتیا خوە كێمكر و ب ناڤ حەوشەكا مەزن كەت. دەنگێ هندەك مرۆڤان هات و ل دۆر ترۆمبێلێ زڤڕین. دەرگەهێن وێ ڤەكرن و ئەم بڕاكێشان پەیاكرین. مە هند زانی كو ئەم یێن برینە كەركووكێ. ئەو ژی پولیسەكێ ئەمنێ وەك دلۆپ دانان، گۆت:(بخێرهاتن بۆ منڤومە الشمال).
كەركووك ژی، ب هەبوونا مەیدانێن گوللەبارانكرنێ و ژوور و كونجێن سێدارەدانێ و ئەشكەنجەیا دژوار و گران یا بەرنیاس بوو كو، هەما ناڤێ (مەنزوما شیمال كركوك) دهات، ڕەجفك دهاتە مرۆڤی. هەكەر مرۆڤ چەندێ یێ بێگونەه ژی با، لێ دا زەراڤ ل مرۆڤی قەتیێت.
دەمێ بۆ ئێكەم جار دەرگەهێ زیندانێ ڤەكرین، زەلامەكێ ئەمنێ ئەز ڕاكێشام و پێنەك ل من دا و ئەز دەف و دەف ل ناڤ زیندانیان كەفتم. ئێكێ دی ژی ئەز ڕاكرمە ڤە و دەرگەهەكێ ئاسنی یێ تنێ پەنجەرەكا بچووك لێ، ڤەكر و ئەز پالدامە ژوور. ل دووڤ خوە دەرگەه گرت كلیل و دۆر دا و غەوارەبوو.
ئەو كونج، یا تاكەكەسی، بچووك و قەپات بوو. ڕووبەرێ وێ دناڤبەرا 1.5 بۆ 2 مەترێن چوارگۆشە بوو. دیوارێن وێ كۆنكرێت و ستووربوون. برەنگەكێ بۆیاغا پێتی و كال داپۆشی بوو. دەرگەهێ وێ ژ كانزایەكێ قورس بوو. پەنجەركەكا بچووك بۆ چاڤدێریكرنێ و تێپەڕاندنا خوارنێ پێڤەبوو. ڕووناهیەكا سنووردار و لاواز هەبوو. بەتەنیكەكا تەنك و پیس ل بنێ ڕائێخستی بوو كو، بێهنا مرار ژێ دپەشی. یا بێ تەوالێت بوو. دیوارێن وێ دڕووت و بێ پەنجەرە بوون. تێڤە مرۆڤی هەست ب گۆشەگیری و دلتەنگبوون و ترسێ دكر
هوسا كەسێ چ ژ مە نەدزانی، ئەم بەرزە ببووین، هەر چەندە مالباتێن مە ئەو ل ناڤبژیڤانان د گەڕیان و پارە ددانە خەلكەكی تنێ دا بزانن كا ئەم مرینە یان ساخین. لێ هەمی هەولێن وان د بەر بای دا دچۆن و دبێ مفا بوون. تنێ ناڤبژیڤانا درەو ل وان دكرن و پارە ژێ دخوارن.
ژ كەركووكێ، ئەم شەش كەس پێكڤە كەلامچەكرن كو (عەبدلرەحمان و خەزویرێ خوە ژی گەل من و سەدیق و ئەحمەد و (ع) بوون). ل ترۆمبێلەكێ سواركرین و هەر وەكو جارێن چۆیی، ئەوێن جلكێن زەیتوونێ ل بەر، تڤەنگێ سیاركر و شەققێن ژێ ئینا. لوولیا وێ كرە دجێنیكا من ڕا و گۆتە من:(تە ژن ئینایە؟). دەمێ من گۆتیێ: (نەخێر). ئێكسەر گۆتی: (الحمدللە، هەكە زاڕۆكێن هەوە ژی دا بنە مخەرڕب، بەس نوكە دێ هەوە گوللەباران كەین و هەوە چ نفش نابیت. چەند ئێك ژ هەوە بهێتە كوشتن، خێرە. ڤێت تۆڤێ هەوە نەمینت.).
هەمان ڕەفتار ل گەل هەڤالێن من یێن دی ژی یێن چاڤ گرێدای و دەست كەلامچە كری كر و دبەرڕا كەنیەكا كرێت دكر كو، نەڤیان و كەرب و كین ژێ دباری. وی زەلامێ ئەمنێ قەسە و گۆتنێن كرێت گۆتنە عەبدلرەحمانی كو، پێشمەرگەیەكێ ب ژیێ خوە یی سەرە بوو و هاتبوو زاخۆ ل خەزویرێ خوە ببوو مێڤان دا كو ببتە نك نوشدارەكی ژبەر كو عەبدلرەحمان یێ نەخۆش بوو. لێ كەسەكی موغبەری لێ كربوو و ئەو ب خەزویر ڤە گرتبوو. وی زەلامێ ئەمنێ دگۆتێ: (تو مەلا مستەفایی؟ ها مەلا، تە چ دڤێت؟ حوكم زاتی و مە یێ دایەتە، ڤێجا هێشتا تە چ دڤێت؟). هەڤالێ وی ژی پێ دكرە كەنی و دگۆتێ: (ئەڤی بەس گوللەیەك دڤێت).
دەمەكی، ئەم ل مەیدانەكێ ڕاوەستاندین، ئەم پەیاكرین و برینە د هۆلەكێ ڤە. تەلەڤزیۆن یا تێڤە هل بوو، دەنگێ وێ نزم دگەهشتە گوهێن من، سترانەكا فارسی ل سەر بوو. ل سالێن هەشتێیان، تەلەڤزیۆنا ئیراقێ، دەمەك ژ پەخشێ خوە كربوو فارسی. نامە و سیاسەتا خوە ددانە كەسێن فارسی ئاخێڤ و وەلاتێ ئیرانێ كو، هینگێ شەڕ دناڤبەرا هەردو دەولەتان دا گەهشتبوو پلا جەهنەمبوونێ و هەر تشت تێدا دهاتە سۆتن و شەوتاندن.
دەستەكی د پاتكا من ڕاگرت و ب ئەرەبی گۆتە من:(ئەڤە چیە ل سەر تیشێرتێ تە نڤیسی؟) ئەز بێدەنگ مام. من نوزانی چ بەرسڤێ بدەمێ. چونكو من دزانی هەر چ بێژم ئەو ژ من قەبیل ناكەت. وی گۆتە من یا نڤیسی: (هاوار، ئەڤە هاوارا كێیە؟ ها، ئەڤە هاوارا مەسعوودە؟ هاوارە هاوارە مەسعوود وەرە من رزگار كە…). پاشی ئاخفتنەك ب توركمانی كر، تێنەگەهشتم كا چ گۆت. كرە كەنی و زللەهەك ل بن گوهێ من دا و گۆتی: (بلا مەسعوود بهێت تە ڕزگار كەت، كا ئەو ل كیڤەیە و دێ چەوا هێت!.) و گۆتە من:(خولیسەر، مەسعوود بارزانی و عەساتێن وی های ژ تە نینە. كا ئەو ل كیڤەیە؟ ئەو تنێ كۆمەكا تێكدەر و …. نن) و گۆتنێن كرێت گۆتن و گۆت:( ئەها نوكە دێ هەوە كوژین و ئەو دبەرزە، بۆ هەوە سویند دخوم وان های ژ هەوە نینە. كا ڕێبەرێن هەوە ل كیژان جاددەیێن ئەورۆپی خوە باددەن!.). ئێكی ب ئەرەبی پرسیار ژ وی كر و گۆتێ:(چ ڕامان ددەت ئەوا سەر تیشێرتێ وی نڤیسی؟)ئەوێ ب توركمانی ئاخفتی، گۆتێ:(النجدە، ساعدونی). ئەوێن د وێ ژوورێ ڤە هەمیان كرە كەنی و ئێكی ژی شفتانەك داوەشاندە سەر قولنجێن من كو لەرزكێ هەمی لەشێ من گرت و ئەز ب هەمی ڤە ئێشاندم. ئەو تیشێرتێ ل بەر من، ئەڤ پیتە ل سەربوون (H.A.W.A.R)، برایێ من ژ ئوردون بۆ من ب دیاری ئینابوو. لێ، من قەت هزرا وان پیتان نەكربوو كا چ ل سەرە و یێ نوو بوو و وێ ڕۆژا هاتیمە گرتن ژ نوو من كربوو بەرخوە.
من زانی ئەم یێن ئیناینە ئەمنا هەولێرێ و د وێ هۆلێ ڤە پشتی تێر قەشمەری ب مە كرین، ئەم برینە ژوورەكا ژ مرۆڤان ب سەردا دچۆ. ئەم سێ رۆژا ماینە ل وێرێ و جارەكادی دەست كەلامچەكری و چاڤ گرێدای، ئەم سواركری ترۆمبێلەكێ كرین و بەر ب دهۆكێ ئیناین. هەر عەبدالرەحمان و خەزویرێ خوە ژی ل گەل مە بوون.
زیندانا ئەمنا دهۆك، دۆژەها جەستەیێن لاواز بوو. هێلینا سپه و ڕشك و كێچ و پیساتیێ، پیساتیا جهی و مرۆڤان بوو. پیساتیا هزرێ و ژناڤبرنا كەسایەتی و سۆتنا بیردانكەكێ بوو. هەیی و نەیی كۆمەكا سەیێن ڕەوڕەوی بوون و وەكو دراگۆل و خوینمێژان بەر دبوونە ناڤچاڤێن زیندانیان كو، د بالا وان دا قەت نەمرۆڤبوون. بەلكو تنێ هندەك گناوەر و سەرداچۆینە و دڤێت ب هەر شێوەیەكێ هەبت و ببپیسترین شێوە بهێنە سزادان. سزایێ هەرە سڤك ژی، ژناڤبرن و كوشتن بوو.
ل وێرێ مە گەلەك كەس دیتن وەكو( تاهرێ 16 سالی و حسینێ 17 سالی) هەردو خەلكێ تلكەبەرێ بوون و ب تومەتەكا چ تشت بۆ نە، هەردو خەندقاندن. كو قەنینەكێ غازێ ل چایخانەكێ ل زاخۆ پەقی بوو و ئەمنێ ئەو گرت بوون و گۆت بوونێ هەوە نارنجۆكەكا پەقاندی. دیسا (ئەحمەد ڕەشید، سەدیق حاجی، عەبدلوەهاب بەرگارەیی، مشیر، عەلی، سەید ڕەشید، سەید حوسێن، عەبدلرەحمان، حەبیب، عەلی ڕەشید، كامیران، عسمەت، ئیسلام، حەمید، میرزۆ، قەرۆ، مستەفا، سەیدایێ عەدنان، عەبدی و…) و گەلەكێن دی مە ل زیندانا ئەمنا دهۆك دیتن، هەمی ژی ب تومەتا كورد بوون و پێشمەرگە و رێكخستنێ ل پارتی دیمۆكراتی كوردستان هات بوونە گرتن. هندەك ژی د دەستەسەركری بوون كو باب و براییێنوان ناڤ پێشمەرگەی بوون و مرۆڤێن زینداكربوون ب وێ مەرەمێ هەتا مرۆڤێن وان ژ ناڤ شۆڕەشێ بزڤڕن.
ئەم (9) هەیڤان ماینە دزیندانا ئەمنا دهۆك ڤە، وان هەمی هەیڤان ژی، ئەشكەنجەیا دەروونی و لەشی ژی هەبوو. دەمەكێ (17) كەس ژ حزب ئەلدەعوە ئینان و ب ئەشكەنجەیەكا دژوار ئەو دقوتان. ل دوماهیێ وەكو مەزانی پشتی برینە (مەحكەما سەورە) هەمی ب تومەتا خیانەتكرنا نیشتیمانی سێدارە دابوون، تنێ ژ وان (یوسف) مابوو ئەو موئەبەد ئینابوونە ئەبۆغرێب ژ بەركو ئەو ل بەرۆكێن شەڕی ل بەسرا جندی بوو و ئەو ژی وەكو كەسەكێ بنەمالێ گرت بوون و زیندانكربوون.
ئەو ژوورا زیندانێ، یا ڕاستتر كونجا زیندانێ بوو، ئەم پتری(40) كەسان تێڤەبووین. هەكە ئێكی خوە درێژكربا پێن وی دا گەهنە بەر سینگێ یێ دی یێ بەرامبەر وی خوە درێژكری. د بن پێن وان ڕا هەر جارێ هندەك ژ مە دنڤستن. ئانكو پێن وان دكەتنە سەر كەلەخێ وان یێن ل نیڤێ دنڤستن و مە نۆبە دگرت كا كی ل بن پێیان بنڤیت.
