پشتی ڤەقەتیانەکا درێژ دێ کلیپەکا نوو بەلاڤ کەت
ئەڤرۆ، زنار تۆڤی:
سترانبێژ بامەرد ژان، کو خەلکێ باژێرێ سێرتێ یە ل باکورێ کوردستانێ و نوکە ل باژێرێ ئیستەمبۆلێ دژیت، د دیدارەکێ دا بۆ رۆژناما ئەڤرۆ دیارکر کو د ژیەکێ بچووکدا دا وی دەست ب گۆتنا سترانان کریە و ل سالا ٢٠٠١ ستران ل داوەت و ئاھەنگ و ھەلکەفتێن کوردان گۆتینە، ل سالا ٢٠٠٧ ئەلبۆما خوە یا ئێکێ ب ناڤێ (ژانا دلێ من) کو ژ یازدە تراکان پێک دھات تۆمار کرییە، ژ وێ ئەلبۆمێ دو ستران ژ پەیڤ و ئاوازێن وی بوون، چار سترانێن دی ژ پەیڤ و ئاوازێن فەیسەل جانی بوون و سترانەک ژی یا مرادێ کنێ بوو، یێن دیتر ژی فولکلۆر بوون، دو ستران ژ وێ ئەلبۆمێ کلیپ کربوون، ل سالا ٢٠١٣ ئەلبۆما خوە یا دویێ ب ناڤێ ( دل شکەستی) ئەو ژی ژ یازدە تراکان پێک دھات و پێنج سترانێن وێ ئەلبۆمێ ژ پەیڤ و ئاوازێن وی ب خوە بوون، چار ستران ژ وێ ئەلبۆمێ کلیپ کرینە، لێ ئەڤە ھەشت سالە چو ئەلبۆم و کلیپ چێنەکرینە، لێ نوکە ئەو یێ بەرھەڤیان بۆ تۆمارکرنا سترانەکا نوو دکەت ب ناڤێ ( رێڤنگێن ئازادیێ) ل بەرە کلیپ بکەت، ھەروەسا نوکە ئەو کاری ل سەر تۆمارکرنا سترانەکا ھونەرمەند جوان حاجۆی یا ب ناڤێ (تۆ جوانی) دکەت و ل نێزیک دێ کلیپ کەت.
بامەرد دبێژیت: ب دیتنا من د ڤان سالێن دووماھییێ دا سترانا کوردی کەفتییە د رەوشەکا خراب دا ل باکورێ کوردستانێ، پرانیا سترانبێژێن کورد لبن کارتێکرنا مۆزیک و سترانا تورکی بەرھەمێن خوە تۆمار دکەن، ھەروەسا نوکە گەلەک سانسۆر ل سەر سترانا کوردی ھەیە و گەلەک سازیێن ھونەری یێن کوردی ژ ئالییێ دەولەتا تورک ڤە ھاتینە گرتن و ڤێ چەندێ کارتێکرنەکا خراب ل سەر ھونەرێ کوردی کریە.
