پشتی 20 سالان جارەکادی خەلکێ دەست ب چاندنا برنجی کر ل بەرواری بالا
ئەڤرۆ نیۆز،زنار تۆقی:
پشتی سەرهلدانا سالا 1991 خەلکێ کوردستانێ جارەکادی ڤەگەریانە سەر گوند و وارێن خوە و دوبارە دەست ب کارێ چاندنا زەڤی و رەزان کر و ل وی دەمی ژی بارودۆخێ ژیانێ گەلەکێ ئالۆز بوو،لەورا ژیارا خەلکێ ل سەر چاندنێ و ب خودانکرنا تەرش و کەوالی بوو،برنج ژی ئێک بوو ژ وان دەرامەتێن گرنگ کو خەلکێ سالانە ب رێژەیەکا مەزن د چاند و ژێدەرێ ژیانا وان ژی بوو،ل وی دەمی هەتاکو سالێن 1997 ب رێژەیەکا مەزن ل بەرواری بالا دهاتە چاندن،لێ پشتی ژیارا خەلکێ خوش بووی،خەلکێ دەڤەرێ دەست ژ چاندنا وی بەردا بوو،لێ پشتی 20 سالان جارەکادی بیرا خەلکێ لێ هاتەڤه.
سەلام سەعدی سالح جۆتیارەکێ دەڤەرا بەرواری بالایە بۆ ئەڤرۆ نیۆز دبێژیت:ئەڤە پتری 30 سالانە ئەز کارێ جۆتیاریێ دکەم،ئەڤە ماوێ 20 سالا بوو مە برنج ل دەڤەرا بەرواری بالا نە کرین،لێ پشتی پەیدابوونا قەیرانا دارایی و نەبوونا دەلیڤێن کاری،ئەڤ سالە مە دەست ب چاندنا برنجی کر و ئەڤ سالە مه چەندین پارچە زەڤی کرینە برنج و گۆت ژی:هەر چەندە گەلەک وەستیان پێ دڤێت،لێ ژ نهۆ وێڤە ئەم دێ ب دەستێن خوە داهاتیێ خوە پەیدا کەین،هەروەسا پشتی مە برنج چاندی،مه پشت گەرمیەک دایە خەلکێ دەڤەرێ ژی و د ئەڤ سالەدا،ل چەندین جهان برنج هاتیە چاندن.
سەهیم رەمەزان جۆتیارەکێ دی یێ هەمان دەڤەرە دبێژیت:پشتی شەرێ داعش قەیرانا ئابووری کارتێکرن ل پرانیا بوارێن ژیانێ کریە،لەورا بۆ دەربازبوون ژ ڤێ قەیرانێ و بۆ پەیداکرنا داهاتیێ خوە یێ رۆژانە مە دەست ب چاندنا برنجی کریە،هەروەسا ئەڤە هاندانەکە بۆ خەلکێ کو جارەکادی ڤەگەرنە ب وارێ چاندنێ داکو ئێدی ئەم پێدڤی بەر دەستێ خەلکێ نەبین و دیارکر ژی:ئەڤ سالە هەتاکو رادەیەکێ باش و ئاڤ و دەراڤ ژی دباشن و ئەڤە ژی دبیتە هوکارەک کو ئەڤ سالە برنجێ مە دێ رێژەیەکا باش ژێ هێت،دیسا ئەڤ سالە خەلکێ مه هەر ئێک ل دووڤ شارەزا و زانینا خوە بەرێ خوە یل دایە کارێ چاندنێ،هەر چەندە وەکو پێدڤی نینە،لێ دەستپێکەکا باشە.
