پشتی 30 سالان سكرێ ناحیا دەركارێ ب تەمامی هشك بوویە
زاخۆ، دلۆڤان هالۆ:
ل سنوورێ ئیدارا سەربخوە یا زاخۆ نێزیكی 17 سكرا هەنە، سكرێ دەركارێ ژی ئێكە ژ وان سكرێن كو سالانە شیانێن كۆمكرنا 120 مەترێن دووجا ئاڤێ هەیە ژ ئاڤا بارانێ، لێ ژ ئەگەرێ هشكە سالیێ ئەڤ سالە ب تەمامی هشك بوویە، و مەترسی ل سەر هشكبوونا سێ سكرێن دی ژی ل زاخۆ هەیە.
جانگیر مستەفا، ئێكە ژ وەلاتیێن ناحیا دەركارێ بۆ ڕۆژناما ئەڤرۆ دیاركر كو پەزێ وان ل سەر ڤێ سكرێ دەركارێ دژییا، زەڤی و بیستانێن دەڤەرێ ل سەر بوون، هەر سال ئەڤ سكرە ب بەفر و بارانان تژی دبوو و سەردا د چوو و تێرا وان دكر هەتا وەرزێ پایزێ، ئەڤ سالە ئاڤ تێدا نەمایە و ژبەر هشكە سالیێ ب تەمامی هشك بوویە.
تەها خدر، وەلاتیەكێ دی یێ ناحیا دەركارێ یە دبێژیت: «هشكبوونا ڤی سكری كارتێكرنەكا مەزن ل ناحیا دەركارێ كرییە، گۆندێ وان ب خوە نێزیكی 2 هزار پەز لێ هەبوون، لەورا نەچار بووم پەزێ خوە بفرۆشم، مە ڕەز و بیستان ژی ل بەر دكرن ئێدی ئەو ژی نەماینە، ئەم داخوازێ ژ حكومەتا هەرێما كوردستانێ دكەین كو چارەسەریەكێ ل ڤی سكری بكەن.
جەهوەر محەمەد، ڕێڤەبەرێ ناحیا دەركارێ گۆت:»ب رێكا ڕێڤەبەرییا ئاڤا ژێر زەڤی مە كەشفەك بۆ سكرێ دەركارێ چێكرییە كو بهێتە سەخبێریكرن و پاركەك ژی ل دەوروبەرێن وێ بهێتە دروستكرن، گوژمەكێ پارەی ژی مە بۆ تەرخانكرییە و ئەم چاڤەرێ نە ئەو پارە لێ بهێتە مەزاختن».
