پشتەڤانیا خۆبەخشانە خێرەك نینە.. ئەو بۆ پاشەڕۆژێ وەبەرهێنانە
ئادار هۆگر
ئەم دزانین (سەرمایێ ماددی و پارە) هەتا ئاستەكێمەزن ڕۆل د پێشكەفتنا مللەتان دا هەیە، لێ د جیهانا ئەڤرۆ دا (سەرمایێ مرۆڤی) و هەبوونا هەستێ بەرپرسایەتیێ ل دەف تاكێن جڤاكی ژی یێ بوویە پیڤەرەكێ گرنگ د بەرەب پێشڤەبرنا مللەتی دا. د نوكە دا، پشتەڤانیا خۆبەخشانە وەك ئێك ژ ستوونێن گرنگ د ناڤ جڤاكێ دا دهێتە دانان، بەلێ پا پرسیارا سەرەكی ل ڤێرێ ئەوە: بۆچی دڤێت ئەم (كەس، خێزان و جڤاك) پشتەڤانیا خۆبەخشانە ب ئەركێ خۆ بزانین؟
خالا دەستپێكێ پێدڤیە ئەم بزانین كو دەستپێكرناكارەكی بێ پشتەڤانی، وەكی ئاگرەكێ كێم سۆتەمەنی یە. دەمێ كۆمەكا كەسان یان ئێك كەس كارەكی دكەت و هەولا تشتەكێ نووی ددەت، هەرچەندە ئەڤ كارە یێ سادە ژی بیت، ئەڤ كەسە دەم و شیان و هزرا خۆ هەمیێ ددەتە ڤی كاری. د دەمەكی دا دزانیت كو چ دەستكەفتێن ماددی بەرانبەر وەرناگریت ژی، لێ هەر ئەنجامددەت. ئاها ل ڤێ خالێ، دبیت ئەو كەسە بەحس نەكەت ژی، لێ پشتەڤانیكرن ل كارێ وی؛ هێزەكا پتر ددەتێ كو بەردەوام بیت. بەروڤاژی، ئەگەر خۆ ب پەیڤەكێ ژی بیت پشتەڤانی لێ نەهێتەكرن، وەك جۆرەكێ بێهیڤیبوونێ ل دەف ڤی كەسی پەیدا دبیت و هەتا دبیت حەزا بەردەوامبوونێ ل دەف نەمینیت.
خالا دووێ، پشتەڤانیا خۆبەخشانە د راستی دا (وەبەرهێنانە) بۆ پاشەرۆژێ. دەمێ ئەم پشتەڤانیا كەسەكی دكەین، بۆ نموونە بچیت دارەكێ بچینیت یان پەرتووكێ بخوینیت، ئەم وی كەسی فێری شارەزاییا سەركردایەتیێ و برێڤەبرنێ دكەین، یا كو وەلاتێ مە پێدڤی پێ هەی. ل گەل هندێ ژی، ئەڤ كەسێ ئەڤرۆ هەولددەت خۆ ل سەر پێیێن خۆ بگریت، سوبەهی دێ بیتە مامۆستایەك یان داهێنەرەك یان نۆژدارەكێ دلسۆز و ئەڤ كەسە گرنگییا وی جۆرێ پشتەڤانیا خۆبەخشانە تێگەهیت و دێ ئەو ژی ل جهێ خۆپالپشتییا وان كەسان كەت؛ یێن كو هەولا گوهۆڕینێ ددەن. ئانكو، ئەوا ئەم ئەڤرۆ بێ بەرانبەر ددەین، سوبەهی وەك كەسایەتییەكا بهێز دێ زڤریت و مفای گەهینیتە مە و جڤاكێ ژی.
ل دووماهیێ، جڤاكا ساخلەم ئەو جڤاكە كو خەلك تێدا خۆ ب بەرپرس دزانن بەرانبەر ئێكودو. پالپشتییا خۆبەخشانە وەك پرەكێ یە د ناڤ تاكێن جڤاكێ دا و دبیتە ئەگەر كو باوەری دروست ببیت. یا گرنگە ئاماژێ ب ڤێ ژی بدەم، هاریكاریكرنا خۆبەخشانە نەخێرە، بەلكو كارەكێ گرنگ و ب بهایە بۆ بەردەوامیا ژیانەكا خۆشتر بۆ مە و وەلاتێ مە.
