پشتەڤانێن وەرزشی چاڤەڕێی سێ دێربییێن ئاگرینن
قەیس وەیس:
چاڤەڕێ دهێتە كرن سوبەهی ئەینی دەست ب هەڤڕكیێن گەڕا 25ێ ژ خولا ستێرێن ئیراقێ یا فوتبۆلێ بهێنە كرن، پشتی بۆ ماوەیێ دو حەفتییان ژبەر پشكدارییا هەلبژارتیێ ئیراقێ د ڤاڤارتنێن مۆندیالا 2026ێ دا بەرانبەر هەلبژارتیێن ئوردن و فلەستنینێ ئەنجامدایی، د ڤێ گەڕێ دا جەماوەرێ وەرزشی چاڤ ل سێ دێربیێن ئاگرینن كو بهێنە كرن، یارییا دهۆك و زاخۆ دێ تایبەتمەندییا خوە هەبیت و كۆپیتكا دێربییێن ڤێ گەڕێ بیت.
دێربیێ بەهدینان دڤێت یێ گیانێ براینی بیت
پشتەڤان و حەز ژێكەرێن وەرزشی یێن پارێزگەهێ و هەموو كوردستان و ئیراقێ چاڤەڕێ ئێك ژ دیدارێن ئاگرین یێن دێربییێ بەهدینان بن كو دبیتە دێربییێ ئاگرین و براینی، ئەوا دێ دناڤبەرا هەردو یانەیێن دهۆك و زاخۆ ل ئێكشەمبییا بهێت دەمژمێر 9:15 شەڤ یاریگەها دهۆك یا نێڤدەولەتی مێڤاندارییا وێ بكەت، چاڤەڕێ دهێتە كرن یا پری هەڤڕكی بیت بۆ دەستڤە ئینانا سەركەفتنێ، ئەڤ یارییە بۆ پشتەڤانێن هەردو یانەیان تایبەتمەندییا خوە هەیە دیسان بۆ هەردو تیمان گەلەك یا گرنگە ژبۆ بەردەوامییا پێشڤەچوونێ و پاراستنا سەرێ لیستێ، تیما ئەلهۆیێن چیا ل رێزا حەفتێ دهێت ب كۆمكرنا 34 خالان لێ پێنج یاری پاشئێخستی ماینە، د بەرانبەر دا یانەیا زاخۆ د رەوشەكا باش و دەمەكێ زێرین دا دبۆرینت ئەوا ل سەرێ لیستێ دهێت ب كۆمكرنا 49 خالان، لەوما ژی كوڕێن خابووری دێ بۆ سێ خالان هەموو بزاڤان كەن ب سەركەڤن پێخەمەت پاراستنا سەرێ لیستێ بەری ئەنجامدانا یاریێن پاشئێخستی یێن هەڤڕكێن وێ، ژلایێ خوەڤە ئەلهۆیێن چیا دناڤ ئەرد و جەماوەرێ خوە دایە و د گەش و سەقایێ كۆپا كەنداڤی دا دێ بزاڤێ كەت بەردەوامیێ بدەتە سەركەفتنێن خوە، لێ یا گرنگ دڤێ یاریێ دا نیشاندانا روویەكێ جوان و وەرزشی دێربیەكێ براینی بیت،.
ئەرێ دێ ئەڤ یارییە بەلانسا وەكهەڤییان شكێنیت؟
ل دووڤ ئامارێن یاریێن هەردو یانەیێن دهۆك و زاخۆ كو ئەڤ یارییە دهێتە هژمارتن یا 23ێ د ناڤبەرا وان دا د خولا ئیراقێ دا دهێتە ئەنجامدان و بڤی شێوەیی بووینە شەش سەركەفتن بۆ دهۆكێ، دو سەركەفتن بۆ زاخۆ و 16 وەكهەڤی هاتینە تۆماركرن، دهۆكێ 20 گۆل ئیناینە و زاخۆ 15 گۆل ئیناینە، بۆ ماوەیی شەش یارییە ل دووڤ ئێك یاریێن وان وەكهەڤی ب دووماهی هاتینە، دووماهی سەركەفتن بەری 12 سالان بوو د وەرزێ د وەرزێ 2012-2013ێ دا ئەوا تیما زاخۆ دناڤ یاریگەها خوە دا ب گۆلەكێ سەركەفتن ئینایی، دووڤدا شەش یاری وەكهەڤی دووماهی هاتینە، هیچ یارییەك زێدەتری دو گۆلان ب سەركەفتن ب دووماهی نەهاتییە، بتنێ دیارییەكێ دا ئەوا تیما زاخۆ هاتییە سزادان 3-چنە ژبەركو یاریزانەكێ دوورئێخست ب بڕیار پشكداری یاریێ كربوو ئەو ژی د چارچووڤەیێ كۆما هەرێما كوردستانێ یا خولا ئیراقێ ل شۆباتا سالا 2008ێ.
دو دێربیێن دی ژی ئاگرینن
هەر دچارچووڤەیێ هەڤڕكیێن گەڕا 25ێ بڕیارە ل شەمبییا بهێت هەردو یانەیێن بەغدایی تەلەبە مێڤاندارییا یانەیا زەورا ل یاریگەها ئەلمەدینە بكەت ئەوا دێ ل دەمژمێر 11:30 شەڤ هێتە كرن، د هەمان دەمدا لێ ل رۆژا ئێكشەمبییا بهێت ڕێكەفتی 30ێ ئادارێ هەردو یانەیێن دی یێن بەغدایی و جەماوەری شورتە دێ ل یاریگەها شەعب مێڤاندارییا جەوییە كەت كو دبیتە دێربیێ دویێ یێ پایتەختێ ئیراقێ بەغدا.
ژ یاریێن دی یێن گەڕا 25ێ
ل ئەینییا بهێت یانەیا نەورۆز دێ ل یاریگەها نەجەف بیتە مێڤانا یانەیا ئەلقاسم، ژلایێ خوەڤە كەربەلا دێ مێڤاندارییا یانەیا كەرخ كەت، ل رۆژا شەمبی 29ێ ئادارێ یانەیا نەفت یا یەغدایی بیتە مێڤانا مینا یا بەسرایی، ئەلگەرمە دێ مێڤاندارییا دیالا ل یاریگەها رومادی كەت، حدود دێ بیتە مێڤانا نەجەف، ل ئێكشەمبییا بهێت 30ێ ئادارێ یانەیا هەولێر ل بەغدا بیتە مێڤانا كارەبا، هەردو یانەیێن نەفتێ یا بەسرایی و یا میسان دێ ل یاریگەها فەیحا بەرانبەر ئێكبن.
دهۆكێ چەند یاریێن پاشئئێخستی ماینە؟
ئەو یاریێن هاتینە پاشئێخستن ژبەر كۆپا كەنداڤی پێنچ یاری بووینە و بڤی شێوەیی دگەل تەلەبە ل بەغدا، دگەل شورتە ل دهۆكێ، بەرانبەر هەولێرێ ل هەولێرا پایتەخت، دگەل نەفت میسان ل دهۆكێ و دێ بیتە مێڤانا یانەیا دیالا، د دیدارەكا خوە یا پێشتر دا بۆ ئەڤرۆ ڕێڤەبەرێ تیما دهۆكێ جاسم محەمەد حاجی دیاركربوو هێشتا فدراسیۆنا فوتبۆلا ئیراقێ بۆ ماوەیێ بهێت دا چو ژڤان بۆ یاریێن پاشئێخستی نە هێتە دانان.
گۆلكەرێن ئەلهۆیێن چیا كینە؟
تیما دهۆكێ خوانا دەهـ یاریزانێن پشكداری د تۆماركرنا 26 گۆلان دا هەیە بڤی ڕەنگی، پاشەنگ عەبدوللا شەش گۆل، پیتەر گۆرگیس شەش گۆل، كەریم دەرویش سێ گۆل، هەر ئێك ژ و شەرقی ئەلبەحری و مارلۆن دۆسانتۆس دو گۆل هەنە، هەروەسان هەر ئێك ژ بەیار ئەبۆ بەكر، یانیك زاكێری، كێلبرت كۆمسۆن، سیابەند عەگید، ئیبراهیم غازی و لۆكاس هێنریك گۆلەك تۆماركرینە، گۆلەك بۆ یاریزانەكێ یانەیەكا دی هاتییە هژمارتن، پشتی ب شاشی ڤە گۆل ل سەر تیما خوە كر.
كوڕێن خابووری 42 گۆل هەنە
پیشەكارێ یانەیا زاخۆ یێ بەرازیلی گۆستاڤۆ هێنریك ل سەرێ لیستا گۆلكەرێن تیما خوە دهێت ب تۆماركرنا 16 گۆلان، هەڤالێ وی و یاریزانێ هەلبژارتیێ ئیراقێ ئەمجەد عتوان ب تۆماركرنا 12 گۆلان رێزا دویێ دهێت، ناسر محەمەدو پێنج گۆل، ئەحمەد یاسین دو گۆل، دیبیۆتی ئۆگۆنا دو گۆل، هەر ئێك ژ ئەیۆب نناحی گۆلەك، محەمەد عەلی عەبۆد گۆلەك و موسێس گۆلەك، مەحمود فائیز، پاتریك مارسێلۆ هەر ئێك گۆلەك تۆماركرینە كو سەرجەمێ گۆلێن زاخۆ بووینە 42 گۆل د خولێ دا.
هەلوەستێ گشتی یێ رێزبەندییا خولێ پشتی بۆرینا 24 گەڕان بڤی رەنگی یە.
1- زاخۆ 49 خال.
2- زەورا 49 خال.
3- شورتە 47 خال، دو یاری ماینە.
4- جەوییە 41 خال.
5- تەلەبە 40 خال، یارییەك مایە.
6- ئەلقاسم 35 خال، ژ یارییەك مایە.
7- دهۆك 34 خال، پێنج یاری ماینە.
8- ئەلگەرمە 34 خال.
9- نەفت 33 خال.
10- ئەلكەرخ 32 خال.
11- نەفت میسان 32 خال، یارییەك مایە.
12- هەولێر 32 خال، یارییەك مایە..
13- نەورۆز 30 خال.
14- نەجەف 30 خال.
15- كارەبا 28 خال.
16- مینا 25 خال.
17- نەفت بەسرا 23 خال.
18- كەربەلا 17 خال.
19- دیالا 23 خال، یارییەك مایە.
20- حدود 13 خال.
لیستا 10 گۆلكەرێن پێشیێ یێن خولێ
ژلایەكێ دووڤە هەڤڕكییەكا دی هەیە ل سەر ئاستێ گۆلكەرێن خولێ دناڤبەرا یاریزانێن یانەیێن پشكدار، هەرچەندە هێرشبەرێ زاخۆ یێ بەرازیلی گۆستاڤۆ هێنریك بۆ ماوەیێ چار حەفتییان سەرێ لیستێ دهات لێ بۆ هێرشبەرێ شورتە موهەنەد عەلی هێلا ئەوێ 19 گۆل هەنە و گۆستاڤویی 16 گۆل هەنە، مەروان حسێن هێرشبەرێ نەورۆز 13 گۆل رێزا سێیێ دهێت، هەر ئێك ژ ئەمجەد عتۆان ژ زاخۆ 12 گۆل، سەیف رەشید ژ ئەلقاسم 11، عەلا عەباس ژ جەوییە 10، یوسف بن سودە ژ هەولێرێ 10 گۆل، ئەلحارس حاتم ژ ئەلقاسم نەهـ گۆل و محەمەد قاسم ژ نەجەف هەشت گۆل رێزێن چارێ هەتا دەهێ ل دووڤ ئێك دهێن.
