پشتەڤانێ دروست تیما خوە ل نیڤا ڕێ نەهێلیت
ئیحسان حەسەن
ڕاستە پشتەڤان و جەماوەرێ فوتبۆلێ هەردەم حەزدكەت تیما وان یا ڤیان لسەر هەی یا سەركەڤتی بیت، دیسان ئەو یاریزانێن دشێن بنە ژێدەرێن خۆشییێ بۆ سەركەڤتنێن تیمێ دبنە قارەمان بۆ وان، ئەڤ قارەمانە هەردەم دبنە تەوەرێ ژیانا وان و ئاخڤتن و سوحبەتێن وان یێن رۆژانە، هوسا پێڤە دهێنە گرێدان و بەرگریێ ژێ دكەن لسەر هەر ڕەفتارەكا وان چ دناڤا یاریگەهێ دا و چ ل دەرڤە، ڤێجا هەر یا چەوا بیت بۆ وان نە ئاریشە یە، مادەم ئەو قارەمان ئەون یێن كو بۆ وان گۆلان تۆماردكەن و تیما وان بەر ب سەركەڤتنان دبەن، ئەگەر ئەم هند دوور نەچین بەحسێ تیما فوتبۆلا یانەیا دهۆك بكەین، ئەوێن لڤێ داویێ دەستكەڤتا مەزن و دیرۆكی بۆ پارێزگەهێ و كوردستانێ و ئیراقێ بدەستڤە ئینای، دەمێ بۆ جارا ئێكێ ددیرۆكا خوەدا ب ناسناڤێ خولا قارەمانێن یانەیێن كەنداڤی هاتینە خەلاتكرن، سەرباری وان هەموو شیان و زیرەكی و ئەو ئاستێ مەزن یێن كو یاریزانێن تیمێ بدرێژاهییا هەڤركییێ دڤێ قارەمانییێ دا نیشاندای، ب سەرپەرشتییا دەستەكا راهێنانێ ئەوێن شیاین گهورینەكێ دشێوازێ فوتبۆلێ دهۆكی دا پەیدابكەت، ئاستێ وان دخول و كوپا ئیراقێ دا كو تا نها هەڤركن، ژبلی وان فرمێسكێن هەر ڤان یاریزانان بۆ سەركەڤتنێن تیمێ دباراندین بۆ هندێ هیڤیێن خوە و پشتەڤانان بجه بینن، ئەڤرۆكە ئەم یێ دبینین پشتی دوو ئەنجامێن نەباش یێن تیمێ دخولا ستێرێن ئیراقێ دا و هاتنا خوارا ئاستێ هژمارەكا یاریزانان، هندەك نە هەمی یێن خودان بەرژەوەندی دگەل یاریزانان دەست هاڤێتنە ئاخفتنێن نەشرین دژی وان، ژبیركرن كو بەری نها هەموو ئاخڤتن و پەیڤێن وان و ستران و حەواریێن وان تنێ بۆ ناڤێ وان بوون، ما هەر ئەو نەبوون یێن كو خوشی ئێخستیە باژێرێن كوردستانێ وهەموو ئیناینە لسەر جادان و ئاهەنگێن سەركەڤتنێ دگێران، ڤێجا چەوا هوون شیان زوو دگەل وان بهێنە گهورین، نها دبێژن ئەڤە یێ زێدەیە، ئەڤە ب كێر ناهێت، ئەڤە چ جاران گۆلان تۆمارناكەت، گوهۆڕینێن ڕاهێنەری دشاشن، هەتا گەهشتییە هندێ كو مایێ خوە دژیانا وان یا كەسوكی دا ژی بكەن، ژبیركرینە كو یاریزانێ فوتبۆلێ وەكو هەر بەهرەمەندەكی هندەك جاران ئاست و شیانێن وی بلند و نزم دبن، جاران ماندیبوون و گڤاشتن و شیانێن وان یێن جەستەیی هاریكاریا وان ناكەن، جاران یێن دەرونی، ئەڤە تشەكێ سرۆشتی یە، بەلێ یا نەسرۆشتی ئەوە كو ئەڤ چەندە بۆ جەماوەری یا گرنك نینە، ئەگەر یاریزان هاتە ئاستی خوە یێ جاران دی وان هەموو تشتێن بوری ژبیركەت، یا من دڤێت لدووماهییێ بێژم، ئەگەر هووسا بیت ئێدی مە باوەری ب حەواریێن پشتەڤان وجەماوەری نینە، ژبەركو حەزژێكەرێ دروست خوشتڤییێ خوە ل نیڤا رێكێ ناهێلیت و بەرنادەت، چونكو هەر ئاخفتنەكا ژ زاری مە دەردكەڤیت بهایێ خوە هەیە، دڤێت ئەم بزانین كو ئەڤ یاریزانە نها یێن بووینە هێما و دیرۆك و خوشییا وی ئەردی ئەوێ نها ئەم لسەر دژین و شانازیێ پێ دبەین، ئەڤجا خەلەتییێ دەرحەقێ خوە نەكەن.
