پشكدارێن «هەژمارا من» دشێن قەری بۆ دانانا سیستەمێ تێهنا رۆژێ وەربگرن
هەولێر، قائید میرۆ:
ئەندامەكێ پەرلەمانێ ئیراقێ دیاركر، وەلاتیێن پشكدار د پڕۆژەیێ (هەژمارا من) دا دشێن ژ وەرگرتنا قەری بۆ دانانا سیستەمێ تێهنا رۆژێ مفاداربن و دبێژیت: هەتا نوكە پێنج هزار وەلاتیان ناڤێن خۆ بۆ دانانا سیستەمێ تێهنا رۆژی تۆماركرینە.
ئامانج مەحموود، پەرلەمانتارێ فراكسیۆنا پارتی ل پەرلەمانێ ئیراقێ بۆ رۆژناما ئەڤرۆ گۆت: «پشتی بزاڤێن زۆر، ئەم شیاین رازیبوونێ وەربگرین، هەتا فەرمانبەرێن هەرێما كوردستانێ ژی ژ وەرگرتنا قەری بۆ دانانا سیستەمێ تێهنا رۆژێ بۆ دابینكرنا كارەبێ مفاداربن، د دەمێ نوكە دا وەلاتی دشێن ب رێیا هەژمارەكا بانكان ژ وەرگرتنا قەری بۆ دانانا سیستەمێ تێهنا رۆژێ مفاداربن، ئەو فەرمانبەرێن پشكدار ل پڕۆژەیێ (هەژمارا من) دێ ژ وەرگرتنا قەری مفاداربن و ژ لایێ كۆمپانیێ ڤە دێ سیستەم بۆ هێتە دانان».
ئامانج مەحموود گۆتژی: «هەتا نوكە ل هەرێما كوردستانێ پێنج هزار كەسان ناڤێن خۆ بۆ وەرگرتنا قەری و دانانا سیستەمێ تێهنا رۆژێ تۆماركرینە، قەرێ دهێتە وەرگرتن بۆ دەمێ حەفت سالان دێ هێتە ڤەگەڕاندن بۆ بانكێ، ئەڤی پڕۆژەی مفایەكێ زۆر بۆ وەلاتیان هەیە، چونكی پشتی سیستەم بۆ وەلاتیان دهێتە دانان، د دووڤ دا ب شێوەیێ قست دێ پارەی بۆ بانكێ ڤەگەڕین».
