پشككێشان بۆ كارمەندێن سەر سندۆقێن دەنگدانێ دێ هێتە كرن
دهۆك، دلۆڤان ئاكرەیی:
بەرپرسەكێ كۆمسیۆنا بلندا سەربخۆ یا هەلبژارتنێن ئیراقێ دیاركر، ل گەل نێزیكبوونا ژڤانێ هەلبژارتنێن پەرلەمانێ ئیراقێ، كو بڕیارە ل 11/11/2025 بهێنە كرن، ئامادەكاری بەردەوام دهێنە كرن.
مەروان مەحەمەد، بەرپرسەكێ كۆمسیۆنا بلندا سەربخۆ یا هەلبژارتنێن ئیراقێ بۆ رۆژنامەیا ئەڤرۆ گۆت: «ئامیرێن دەنگدانێ ل رۆژا 14ی ئیلونێ دێ گەهنە بەندەرێ فاو و رۆژا د دووڤ دا دێ گەهنە بەسرا و پشتی تمامبوونا رێكارێن ئەمنی، ئامیر دێ ل سەر تەڤایا پارێزگەهێن ئیراقێ و هەرێمێ دێ هێنە بەلاڤكرن».
ل گۆرەی گۆتنا مەحەمەدی، ئامیر هاتینە نووكرن و كێشەیێن تەكنیكی یێن بەرێ هاتینە چارەسەركرن، ئێك ژ گوهۆڕینێن سەرەكی، دانانا كامیرێ یە بۆ نیاسینا روخسارێ دەنگدەری ل جهێ پەنجە مورا وی، دیسا بڕیارە ل رۆژا ئێكشەمبییا بهێت 14/9/2025 پشككێشان بۆ وەرگرتنا كارمەندێن سەر سندۆقێن دەنگدانێ ل هەرێمێ بهێتە كرن.
