پشكنینا ماددەیێن هۆشبەر بۆ داخوازكەرێن شەش جۆرێن ماملەیان دێ هێتە كرن
جڤاتا وەزیرێن هەرێما كوردستانێ بڕیارەك بۆ زێدەكرنا پشكنینا ماددەیێن هۆشبەر بۆ ئەنجامدانا چەندین مامەلەیان دەردكەت و وەزارەت و فەرمانگەهان ئاگەهدار دكەت.
ل دووڤ نڤیسارەكا سەرۆكایەتیا جڤاتا وەزیرێن هەرێما كوردستانێ، كو ل رۆژا 7/11/2023 دەركەفتیە و بۆ هەمی وەزارەت و فەرمانگەهان هنارتیە، تێدا جۆرە پشكنینەكا دی ل چەند مامەلەیان زێدە دكەت.
د وێ نڤیسارێ دا هاتیە: «ب مەرەما بنبڕكرنا ب كارئینانا ماددەیێن هۆشبەر ل هەرێما كوردستانێ و ل سەر فەرمانا سەرۆك وەزیران، رێكارێن پێدڤی وەربگرن، بۆ وێ چەندێ پشكنینا ماددەیێن هۆشبەر بۆ چەند مامەلەكان ئەنجام بدەن».
د نڤیسارێ دا پشتڕاستكریە، پشكنینا ماددەیێن هۆشبەر بۆ ئەڤان كەسان بهێتە ئەنجامدان:
1- ئەو كەسێن داخوازا مۆهلەتا شۆفێریێ دكەن.
2 – داخوازكەرێن مۆهلەتا هەلگرتنا چەكی.
3- داخوازكەرێن وەرگرتنێ بۆ كۆلیژێن پۆلیس و سەربازی.
4- داخوازكەرێن پێشكێشكرنێ ب مەرەما خواندنا بلند.
5- ئەوێن ل سەندیكا و یەكێتی و رێكخراوێن جڤاكێ مەدەنی كار دكەن.
6- داخوازكەرێن دامەزراندنێ، كو پێشكێشی حوكمەتا هەرێما كوردستانێ دكەن ل هەمی دام و دەزگەهێن حوكمەتێ.
