پـایتەختێ قونسلخانەیێن ئـەمـریكی
شـێرزاد نـایف
گرێدانا هەڤالینیا ئەمریكی ب هەرێمێ ڤە پتر جهێ خۆشحالیا (الدولە العمیقە) یا ئەمریكی یە، هەكە سەرۆكەكێ ساخلەت مەزاجی ژی هەبیت، دێ ژ وی سنووری بۆریت. چونكو ئەو پتر پێدڤی ب مالەكا مەزنە شیتكا كەمەرا خۆ لێ ڤەكەت و پالدەت، هزرێن خۆ ل نێزیكی جهێ بۆیەران بكەت. هەكە چو نەكەت ژی هەبوونا ناڤێ وێ ب خۆ ل دەڤەرا رۆژهەلاتا ناڤین مینا (كێتكا میرا یا ب زنجیرا.. گەر بەردەمە تە دێ كەت پخ!!) یانكو گەفەكە ل هنداڤی سەرێ زلهێزێن دەڤەرێ كو خۆ زال نەكەن و سەربۆرا سەدام حسێن و رژێما سووریێ و رێكخراوا داعش دوبارە نەبنەڤە!، چونكو ئاڤاكرنا ڤی رووبەری ل هەولێرێ زێدەباری هەبوونا پتریا قونسلخانەیێن دەولەتێن جیهانێ. دێ بێ دەستی بنە مەتالەك ل بەرانبەر هەر هێرش و هەرەشەكێ ل سەر هەرێما كوردستانێ، چونكو مادەم كوردستان ب كەتوارێ خۆ یێ جوگرافی ڤە ل ناڤ دەڤەرەكا ئالۆز دایە و یێن خرابیێ پترن ژ یێن باشیێ، دڤێت مەزنترین هێز هەبن، هەر چو نەبیت هەكە هاریكاریا مە نەكەن، دێ بەرگریێ ژ خۆ كەن ئەم ژی دێ كەڤینە بن خیڤەتا وان، یانژی دێ بنە دیدەڤان ل سەر ستەما ستەمكاران, ل داویێ ژی دبنە ستوونەك بۆ راگرتنا كوردستانێ و گەلێ كوردستانێ. چونكو نها بۆ دەمێ پێشدا ژی ئەمریكا ل دویڤ پێشبینیان و ئەو پلانا ئەمریكا دادنیت، دێ مینیت خۆدانا بریاریێ ل دەڤەرێ. ئەو مۆشەكێن هاتینە ئاراستەكرن و لێدان ل هەولێرێ یان ئەو هێرشێن دۆرنان بۆ سەر كێلگەهیێن هەرێمێ دەستپێكەكا مەترسیدار بوون، بەلێ پشتی راگەهاندنا ڤەبوونا وێ قونسلخانەیا ئەمریكی پشتراستیەك دایە خەلكێ هەرێمێ كو دێ د پاراستی بن. مینا جاران نەما ئێدی وەختێ رژێما ئیراقێ غازێن ژەهراوی و قەدەغەكری ل گەلێ خۆ دای كو ل كوردان دینی، ڤێ دونیایێ میەك ل خۆ شاش نەكر، چونكو چاڤێن دونیایێ د ڤەكری نەبوون. بەلێ ئەڤرۆ ئەڤە ئەمریكی یێن ل پایتەختێ كونسلخانەیێن خۆ ل ڤێرە. هەكە گوهێن كۆچكا سپی د كەڕ بن، ماخۆنە كونسلێ ئەمریكی ژی یێ كەڕە؟!. ژ بەر هندێ ب ڤەبوونا ئەڤێ كونسلخانێ دێ پایتەختێ كوردستانێ كەتە پایتەختێ هێزا جیهانێ.
