پـەروەردەکـرنا زارۆکـان گـرنگـترە ژ خـودانکـرنـێ
عایشا عەجیب:
دەڕوونناسەكی بۆ ڕۆژنامەیا ئەڤرۆ دیار کر کو کارڤەدانێن دەروونی و جڤاکی کارتێکرن ل سەر دەروونێ زارۆکی هەنە و گۆت؛ پەروەردا بێ سنور زارۆکەکێ بەڕەللا ل دویڤ خۆ دئینیت.
دەروونناس دکتور بێوار تاھا شوکری، د دیدارەکێ دا بۆ رۆژنامەیا ئەڤرۆ دیار کر، سەرەدەریا دایک و بابا کارتێکرنێ ل ھەست و ڕەفتارێن زارۆکی دکەت و گۆت؛ “ھەکە شێوازێ ژیانێ یێ گرتی و تەپەسەر بیت، یان بەرۆڤاژی یێ ڤەکری و نازدار کری بیت کارتێکرنا خۆ لسەر زارۆکی هەیە، ئەڤجا گرنگە دایک و بابا سنۆر بۆ بنیاتێ ژیانا زارۆکی ھەبن”.
دەروونناسی دیار کر کو پەروەردا بەڕەللا و بێ سنور، ئەنجامێ وێ زارۆیەکێ بەرەللایە کو ڕەفتار و گۆتنێن نە جوان ئەنجام دەت، لێ ئەو زارۆکێ بھێتە پەروەردەکرن ب سنوردارکرنێ ل ھەر کۆمبونەکێ یان جڤاتەکێ ھندەک تایبەتمەندیێن خوە یێن ھەین و گۆت؛” ژ بەر ھندێ پەروەردا ب سنور گەلەک یا گرنگە بۆ زارۆکی”.
د. بێواری دیار ژی کر کو توندوتیژی و سترێس دناڤ ھندەک خێزانان دا رویددەن و ئەڤ چەندە فشارێ ل دەروونی زارۆکی دکەت و کارتێکرنەکا خراب ل سەر کەسایەتییا زارۆکی دکەت و گۆت؛”ژ بەرکو سترێس کارتێکرنەکا زێدە ل سەر پێکھاتا مەژیێ زارۆکی دکەت”.
دەروونناس د. بێوار دیار کر کو ژیێ چار ھەتا شەش سالیێ گەلەک یێ گرنگە ژ بۆ ئاڤاکرنا کەسایەتیا زارۆکی و ڕولێ دایک و بابا د پەروەدەکرنا زارۆکی دا ڕولەکێ سەرەکییە و گۆت؛”ژبەرکو دایک باب بنیاتێ ئاڤاکرنا کەسایەتییا مرۆڤی نە”.
د. بیوار تاها دا زانین کو گرنگە دایک و باب زارۆکێ خۆ پەروەردە بکەن نەک بتنێ خودان بکەن، زانایان ژی وەسا دایە دیار کرن کا چاوا دایک و باب گرنگیێ ب خودانکرنا زارۆکی ددەن، دڤێت وەسا و هێشتا پتر گرنگیێ ب لایەنێ پەروەردێ ژی بدەن و گۆت؛” ژبەرکو هەردوو لایەن تەمامکەرێن ئێکن و گەر لایەنەک ژ وان کێماسی هەبیت کەسایەتیا زارۆکی دێ یا پەککەفتی بیت”.
