پلانا ئاكرێ یا سەركەفتییە و دهۆكێ گوهۆڕینێن باش كرینە
قەیس وەیس:
ب دووماهی هاتنا یاریێن گەڕا 15ێ تیما یانەیا ئاكرێ بوو قارەمانا قۆناغا ئێكێ یا خولا پلا نایابا كوردستانێ یا تەپا پێی، پشتی ل سەرێ لیستا خولێ هات ب 27 خالان، زاخۆ ل رێزا حەفتێ و دهۆك رێزا 14ێ هاتن.
تیما یانەیا ئاكرێ بەردەوامی دا سەرێ لیستا خولێ ب كۆمكرنا 27 خالان و خودانا بلند ترین رێژەیا سەركەفتنان د هەشت یارییان دا سێ وەكهەڤی و چار خوسارەتی، بۆ زانین حەفت یاریێن ڤێ دووماهیێ یێن تیما ئاكرێ ب سەرپەرشتییا راهێنەر و كوڕێ ئاكرێ هەژار سابر ب پێنج سەركەفتن، خوسارەتیەك و وەكهەڤییەك.
ژلایێ خوەڤە تیما زاخۆ ب ئاست و ئەنجامێن نە خوەجهـ ب كۆمكرنا 21 خالان رێزا حەفتێ دهێت، مەزنترین رێژا وەكهەڤییا د خولێ دا ئینایە كو نەهـ یاریان دا وەكهەڤ بوویە، بەرانبەر چار خوسارەتی و دو وەكهەڤی هەنە، ئێك ژ یانەیێن كێمترین گۆل كرین 11 گۆل بووینە و كێمترین گۆل ل سەر هاتینە تۆماركرن ئەو ژی نەهـ گۆل بووینە.
ژلایەكێ دووڤە تیما یانەیا دهۆك د نەخۆشترین كاودان دایە ئەوا نە شیایی هەتا بگەهیتە رێزێن ناڤین كو د نوكە دا ب 14 خالان رێزا 14ێ دهێت تنێ سێ سەركەفتن، پێنج وەكهەڤی و حەفت خوسارەتی هەنە، بۆ قۆناغا دویێ بڕیارە راهێنەرێ گەنج یێ پارێزگەهێ رابین هاشم سەرپەرشتییا تیمێ بكەت و چەند گوهۆڕینێن باش كەت ژبۆ ڤەگەڕیان بۆ رێزێن باشتر.
هەلوەستێ گشتی بڤی رەنگی یە:
ئاكرێ ب27 خالان رێزا ئێكێ، چوارقۆرنە و شێروانە ب 25 خالان رێزێن دویێ و سێیێ دهێن، سیرۆانی نوو ب24 خال، پێشمەرگەیا هەولێر 22خال، دەربەندیخان ب21 خال، ب هەمان خال زاخۆ ژی ل رێزێن چارێ هەتا حەفتێ دهێن، رانیە ب20 خال، ئارارات ب20 خال، هندرین ب19 خال، برایەتی 18خال، سۆران ب17 خال، هەولێر ب16 خالان رێزێن هەشتێ هەتا 13ێ هاتن، دهۆك ب14 خالان، شەقلاوە ب13 خال و سەید سادق ب هەمان خالان رێزێن 14ێ هەتا 16ێ و دووماهیێ دهێن.
