پلانا باسكێت بۆلا دهۆكێ سه‌ركه‌ڤتنه بۆ پلا ئێكا ئیراقێ
پەروین سەلاح:
ددیدارەکێ دا میقداد ره‌عدی راهێنەرێ باسکێت بۆلا یانه‌یا دهۆکێ بۆ رۆژناما ئەڤرۆ گوت: مه بەرهەڤین باش كرینه بۆ خۆلا پلا دو یا ئیراقێ نێزیكی چوار هه‌یڤانه راهێنانێن مه د به‌رده‌وامن و ئارمانجا مه ده‌ربازبوونه بۆ پلا ئێكا، ئه‌وا بڕیاره یارییا خوه یا ئێكێ ئه‌ڤرۆ ژ چارچووڤه‌یێ كۆما دویێ دا به‌رانبه‌ر زانكۆیا سلێمانیێ بكه‌ت.
هه‌روه‌سان ناڤهاتی گۆت: پشتی مه تیمه‌ك ب یاریزانێن خوه یێن ئه‌كادیمێ خرڤه‌كرین ب پشته‌ڤانییا كارگێرییا یانه‌یێ مه بڕیار دا پشكداری خولا پلا دو یا ئیراقێ بین هه‌رچه‌نده یاریزانێن مه پرانییا وان لبن 18 سالی دانه، گه شببنن تیما مه پاشه‌رۆژه‌كا گه‌ش هه‌بیت و پشتی ئه‌نجامدانا چه‌ند یاریێن هه‌ڤالینی ژ ئاستێ یاریزانێن خوه رازیمه.
ده‌رباری ئارمانجا تیمێ د خۆلێ دا راهێنه‌رێ دهۆكێ گوت: ئارمانجا مە بشێن د یاریێن كۆما خوه دا ل باژێرێ سلێمانیێ پلێتا ده‌ربازبوونێ بۆ قوناغا دویێ ب ده‌ستخوڤه بینن و گه‌شبینین دێ ئه‌نجامێن سه‌ركه‌فتی د ڤێ قوناغێ دا هه‌بن، پاش هزر ل قۆناغا دویێ بكه‌ین، سه‌باره‌ت پلانا تیما باسكێت بۆلێ بۆ پاشه‌رۆژێ ناڤبری دیاركر ژی د پلانا ئه‌وان دایه ئه‌و ل ڤی وه‌رزی ژ خۆلا پلا دو سه‌ركه‌ڤن بۆ پلا ئێك و پاش هزر ل جهێ دورست یێ یانه‌یێ دكه‌ین بۆ سه‌ركه‌فتن بۆ خۆلا نایاب و د هزرا مه دایه د ماوێ سێ سالێن بهێت دا تیمێ ب گه‌هینه خۆلا پلا نایاب ڤه.
ل دووماهیێ راهێنه‌رێ دهۆكێ گوت: ئارمانج و پلانا مه یا رون و ئاشكرایه كو دخوازین تیمه‌كێ دروست بكه‌ین بۆ پاشه‌رۆژێ و بنیاته‌كێ دروست بۆ باسكێت بۆلا دهۆكێ جاره‌كا دی دروست بكه‌ین ب یاریزانێن خومالی و یارییا باسكتبۆلا دهۆكێ ڤه‌گه‌رینه ڤه.
