پلانێن مە سەرگرتن و سەركەڤتن ژ هەژی مە بوو
تیما فوتبۆلا یانەیا زاخۆ ئێكەم سەركەڤتن د خولا ستێرێن ئیراقێ دا ئینا پشتی ب ڕیمۆنتادا سەركەڤتی ل سەر یانەیا جەوییە یا بەغدایی ب دو گۆلان بەرانبەر گۆلەكێ د یارییا واندا ئەوا ل شەڤا دەربازبووی یاریگەها یانەیا دهۆكێ ژ چارچووڤەیێ هەڤڕكیێن گەڕا دویێ هاتییە كرن.
د خولەكا 48ێ دا یانەیا جەوییە بڕێییا هێرشبەرێ خوە ئەلحارس حاتم گۆلا ئێكێ ئینابوو، د خولەكا 65 دا كاپتنێ زاخۆ ئەمجەد عتۆان گۆلا وەكهەڤیێ ئینا، پشتی بۆرینا 11 خولەكان پیشەكارێ زاخۆ ییچ یەمەنی ناسر محەمەدو گۆلا دویێ و سەركەڤتنێ ئینا، بۆ زانین یاریزانێ جەوییە هەیسەم جوێنی دخولەكا 58 دا ب كارتا سۆر هاتبوو دوورئێخستن.
یانەیا زاخۆ سۆپاسییا دهۆكێ كر
د ڕاگەهاندەكا فەرمی دا كارگێرییا یانەیا زاخۆ سۆپاسییا یانە و خەلكێ دهۆكێ كر بڤی شێوەیی، ب ناڤێ جەماوەرێ و خەلكێ ئیدارەیا سەربەخۆیا زاخۆ ئەم سۆپاسییا خەلكێ پارێزگەها دهۆكێ دكەین ب تایبەتی د. عەلی تەتەر پارێزگارێ دهۆكێ و سەرۆك و كارگێرییا یانەیا دهۆك بۆ تەرخانكرنا یاریگەهێ و مێڤاندارییا وان، هەروەسان سۆپاسییا ئاسایش و هێزێن ئەمنی وەكو هەرجار ل ب رۆلێ خوە یێ جوان رابوون ژ هەژی سۆپاسی و دەستخوەشیێ نە.
ڕاهێنەرێ تیمێ گەشبینە
ل دۆر ڤێ یاریێ ویسام ڕزق ڕاهێنەرێ زاخۆ بۆ دەزگەهێن ڕاگەهاندنێ گۆت: ئەم ژ هەژی سەركەڤتنێ بووین ژبەركو تیما مە باشتر بوو، پیرۆزبیت ل پشتەڤانێن زاخۆ، مە دگەل تیمەكا ب هێز یا خولێ دكر، شێوازێ یارییا مە هێرشكرن و هوژداری د هەر هێرشەكا ل سەر تیما مە دهێتە كرن، گۆلا وان ب خەلەتییەكێ هاتە كرن، مە مفا ژ دوورئێخستنا یاریزانەكێ وان ب كارتا سۆر وەرگرت، پلانێن مە سەرگرتن و ژ هەژی سەركەڤتنێ بووین، گەشبینن دێ یاری بۆ یاری ئاستێ تیما مە باشتر بیت و ئەنجامێن سەركەڤتی هەبن ژبیر نەكەین ڕێكا مە د خولێ دا یا دوورە، دڤێت بۆ هەر یارییەكێ بەرهەڤیێن باش هەبن.
