پلانەكا موكم بۆ ڕێگریكرن ل لەهیان ل زاخـۆ هاتیە دانان
زاخۆ، دلۆڤان هالۆ:
یونس محەمەد، سەرۆكێ باژێڕڤانیا زاخۆ بۆ ڕۆژناما ئەڤرۆ دیاركر، ئیدارەیا سەربخوە یا زاخۆ پلانەكا موكم بۆ ڕێگریكرن ل لەهیان دانایە و دبێژیت: تیمێن مە ل سەر پاقژكرن و ڤەكرنا ڕێكێن سروشتی یێن ئاڤێ و مەنهۆلێن سەرەكی بەردەوامن، دا كو ئاستەنگ د ڕێكێن ئاڤێ دا دروست نەبن.
سەرۆكێ باژێڕڤانیا زاخۆ خویا ژی كر، ب مەرەما ڕێگریكرنا هەر ئەگەرەكێ لەهیان یان بلندبوونا ئاستێ ئاڤێ، هەموو كارمەند و ئامیرەیێن باژێڕڤانیا زاخۆ د ئامادەباشیێ دانە، داكو زیانێن گیانی و ماددی نەگەهنە وەلاتیان.
یونس محەمەد گۆت: «پێدڤیە وەلاتی ژی هاریكار بن و بەرمایكان نەهاڤێژنە د ناڤ سۆلینان دا، داكو ئاڤ ب ساناهی دەرباز ببیت، دیسا دڤێت ل دەمێ باران بارینێ پێگری ب رێنومایێن تیمێن باژێرڤانیا زاخۆ و ڕێڤەبەریا بەرەڤانیا باژێڕی بهێتە كرن ژ بۆ پاراستن و سلامەتیا گشتی».
