پلانەكا نوو بۆ وەرگرتنا گەنمێ جۆتیارێن دهۆكێ هاتە دانان
ئەڤرۆ
دهۆك، لەزگین جوقی:
رێڤەبەرێ گشتی یێ چاندنێ ل پارێزگەها دهۆكێ دیار كر، پلانا وەرگرتنا گەنمێ جۆتیاران بۆ ئەڤ سالە ل پارێزگەها دهۆكێ هاتە دانان و دێ سێ سایلۆ گەنمی وەرگرن.
ئەحمەد جەمیل، رێڤەبەرێ گشتی یێ چاندنێ ل پارێزگەها دهۆكێ بۆ ئەڤرۆ دیار كر، «ئەڤ سالە سایلۆیا شێخان و فەیدیێ و زاخۆ دێ گەنمێ جۆتیاران وەرگرن و بڕیار هاتیەدان هەموو ئاسانكاریەك بۆ جۆتیاران بهێتە كرن، دەمێ گەنمێ خوە دبەنە سایلۆیان، ئەڤ سالە پێشبینی دهێتە كرن ل دووڤ پلانا چاندنێ بەرهەمێ گەنمێ جۆتیاران بگەهتە 382 هزار تەنێن گەنمی، هەر نوكە دەست ب بەرهەڤیێن وەرگرتنا گەنمی هاتیە كرن».
ناڤهاتی ئاشكرا كر، ل سەر ئاستێ پارێزگەها دهۆكێ لیژنە بۆ دەستپێكرنا پرۆسەیا دوورینا گەنمی هاتینە پێكئینان، ئەڤ سالە دبیت ل 25/5/2023 دەست ب وەرزێ دوورینا گەنمی بهێتە كرن و بەرهەمێ گەنمی ژی ئەڤ سالە دێ گەلەكێ باش بیت.
