پلـەی سـتەیشن 6 دێ ب رامـێ 30 گێگـابایت كـهڤيته د بازاڕى دا
سندس سالح:
سەرەرای کو کۆمپانیا سۆنی ب فەرمی دانپێدان نەکریە ب هەبوون یان گەشەپێدانا ئامیرێ پلەی ستەیشن ٦، لێ یا ب هێزە کو کۆمپانى کار ل سەر پێگوهۆڕێ پلەی ستەیشن ٥ دکەت.
د راستی دا، دەنگۆ ل دۆر ئامیرێ نوو یێ سۆنی د هەیڤێن دووماهیێ دا زێدە بووینە، نوکە هندەک پێزانینێن ڤهدزى یێن نوو دیار بووینە کو گرنگیێ ددەنە تایبەتمەندیێن وی یێن تەکنیکی.
نووترین ڕاپۆرت ئاماژێ ب وێ چەندێ دکەن کو سۆنی خۆ بەرهەڤ دکەت بۆ نووژەنکرنەکا مەزن د سیستەمێ بیردانکێ (Memory) یێ ئامیرێ خۆ یێ نوو دا، زێدەباری ئەگەرێ بەلاڤکرنا مۆدێلەکێ مۆبایل (Handheld) کو ب سیستەمێ پلەی ستەیشن ڤە یێ گرێدای بیت.
ل دووڤ پێزانینێن دزەپێکری، دبیت ئامیرێ پلەی ستەیشن ٦ ب بیردانکا GDDR7 کو ژ ٣٠ گێگابایتان کێمتر نەبیت بگەهیتە بازاری، ئەڤە ژی پێنگاڤهكا جۆری یە هەڤبەر ب بیردانکا GDDR6 کو قەبارێ وێ ١٦ گێگابایتە و نوکە د پلەی ستەیشن ٥ دا دهێتە بکارئینان.
هەروەسا، دهێتە چاڤەرێکرن کو مۆدێلا مۆبایل ب رامەکێ ب قەبارێ ٢٤ گێگابایت هەبیت، کو ئەڤە قەبارەیەکێ گەلەک مەزنە بۆ ئامیرەکێ ب وی جۆری.
پێکهاتەكێ دیارکری (Bus)يا بیردانکێ ب ١٦٠ بت ب خۆ ڤە دگریت، کو دشێت پێلەکا ڤەگوهاستنێ ب بلندییا ٦٤٠ گێگابایت/چرکە دابین بکەت، ئەو ژی ب سایەیا بکارئینانا دەهـ یەکەیێن کو هەر ئێك ژ وان سێ گێگابایتە و ل سەر تەختێ سەرەکی (Motherboard) یێ بەلاڤکریە.
ئەڤ دیزاینە رێ خۆش دکەت بۆ سەرەدەریێ د گەل جیهانێن مەزنتر یێن یاریان، تەکنیکێن پێشکەفتی یێن نیشاندانێ، کارێن گران کو پتر پشتبەستنێ ل سەر ژیرییا دەستکرد (AI) دکەن، بهلێ ئەڤ کارە ئاریشەکا دیار د گەل خۆ دئینیت: ئەو ژی بهایە. چونکی زێدەکرنا قەبارێ بیردانکێ دبیت ببیتە ئەگەرێ بلندبوونا بهایێ ئامێری بۆ بکارئینەری، ب تایبەتی د دەمەکێ دا کو بهایێ پارچێن ئەلیکترۆنی (Semiconductors) یێ بنهجهـ نینە.
هندەک خەملاندن د ناڤ جڤاکێ یاریزانان دا ئاماژێ ب وێ دکەن کو گوهۆرینا قەبارێ بیردانکێ ژ ٢٠ گێگابایتان بۆ ٣٠ گێگابایتان، دبیت بهایێ ئامێری ب نێزیکی ١٠٠ دۆلاران زێدە بکەت.
ههكه ئەڤ پێزانینە بهێنە پشتراستکرن، ئەڤە وێ چەندێ دیار دکەن کو سۆنی یا بەرهەڤە جارەکا دی گرنگیێ بدەتە هێز و شیانێن تەکنیکی، سەرەرای مەترسیا دانانا بهایەکێ بۆ پلەی ستەیشن ٦ کو رەنگە هەمی یاریزان د نوکە دا قەبوول نەکەن.
