په‌رله‌مانتاره‌كێ ئاكپارتیێ: پارتا كۆماری ژ به‌ر ئاكپارتیێ خوه نێزیكی كوردان دكه‌ت
ئه‌ڤرۆ:
ئه‌ندامه‌كێ په‌رله‌مانێ توركیا سه‌ر ب ئاكپارتیێ راگه‌هاند كو هه‌تا نها پارتا كۆماری به‌حسێ كوردان نه‌دكر، وان دگۆت كورد نینن، لێ پشتی كو ئاكپارتیێ شیا گه‌له‌ك تشتان ل دۆر پرسا كوردان بكه‌ت نها هه‌لوه‌ستێ پارتا كۆماری ژی هاتیه گوهۆرین و ئه‌و یه‌ك ژی بۆ مه گرنگه.
عه‌بدولره‌حمان كورت په‌رله‌مانتارێ ئاكپارتیێ یێ ئامه‌دێ ل دۆر هه‌لوه‌ست و سه‌ره‌دانا شانده‌كێ پارتا كۆماریا گه‌ل بۆ هه‌رێما كوردستانێ ئاخڤی و دیار كر كو به‌ری ئاكپارتی بهێته سه‌ر ده‌ستهه‌لاتێ ل توركیا كه‌سێ نه‌دشیا به‌حسێ كوردان و مافێن وان بكه‌ت، لێ ئاكپارتیێ شیا گه‌له‌ك تشتان بكه‌ت، سه‌ره‌رایێ گه‌له‌ك ئالۆزیان ژی ئاكپارتیێ ده‌ست ب قۆناغا ئاشتیێ و چاره‌سه‌ركرنا پرسا كوردی كر و گه‌له‌ك تشتێن باش هاتنه كرن، قه‌ده‌غه‌یێن ل سه‌ر زمانێ كوردی هاتنه راكرن و گۆت: (ده‌مێ مه وه‌كو ئاكپارتی كارێن وه‌سا گرنگ بۆ كوردان دكر وی ده‌می پارتا كۆماری ل دژی هندێ بوو، وان ژ بۆ چاره‌سه‌ركرنا پرسا كوردی هاریكاریا مه نه‌كرن و ئاسته‌نگی ژی دروست كرن، لێ نها ژ بۆ كو مه تووشی ئاریشان بكه‌ن و پێگه‌هێ ئاكپارتیێ لاواز بكه‌ن به‌رێ خوه داینه كوردان).
ل دۆر سه‌ره‌دانا شاندێ جه‌هه‌پێ بۆ هه‌رێما كوردستانێ و هه‌لوه‌ستێ وان ژی په‌رله‌مانتارێ ئاكپارتیێ راگه‌هاند كو ده‌مێ ئه‌م دبینین كو جه‌هه‌پێ هه‌لوه‌ستێ خوه ل هه‌مبه‌ر كوردان گوهۆریه و هه‌ست ب گرنگیا كوردان كریه ئه‌و یه‌ك بۆ مه جهێ دلخوه‌شیێ یه، لێ د هه‌مان ده‌می دا ئه‌م باش ژی دزانین كو ئارمانجا پارتا كۆماری چاره‌سه‌ركرنا پرسا كوردی نینه، به‌لكو وان دڤێت ب رێیا ده‌نگێن كوردان پێگه‌هێ خوه بهێز بكه‌ن، چونكو د ماوه‌یێ چه‌ندین سالێن بۆری دا گه‌له‌ك جاران پارتا كۆماری بوویه ئاسته‌نگ ل هه‌مبه‌ر چاره‌سه‌ركرنا پرسا كوردی ل توركیا و گۆت: (ئاكپارتیێ دڤێت پرسا كوردی چاره‌سه‌ر بكه‌ت لێ ئاسته‌نگیێن مه‌زن ژی هه‌نه و پارتیا كۆماری ژی ئێك ژ وان هێزێن سیاسی ل توركیا بوو كو هه‌رده‌م ئاریشه بۆ پرۆژێ ئاكپارتیێ دروست كرن).
ناڤهاتی ل دۆر په‌یوه‌ندیێن هه‌رێما كوردستانێ و توركیا ژی راگه‌هاند كو كورد و تورك ب سالانه ل ڤێ ده‌ڤه‌رێ پێكڤه دژین و په‌یوه‌ندیێن كورد و توركان ژی دیرۆكی نه، بێگومان د ده‌مێن بۆری دا ئالۆزی هه‌بووینه لێ بۆ هه‌ر كه‌سه‌كێ ژی ئاشكرایه كو دڤێت كورد و تورك پێكڤه هه‌موو ئاریشێن هه‌ی ب رێیا دانوستاندنان چاره‌سه‌ر بكه‌ن و نها ژی په‌یوه‌ندیێن توركیا ل گه‌ل هه‌رێما كوردستانێ گه‌له‌ك د باشن و ئه‌و یه‌ك ژی بۆ ئارامیا ده‌ڤه‌رێ گه‌له‌ك گرنگه و گۆت: (به‌ری نها سه‌رۆك كۆمارێ توركیا ره‌جه‌ب ته‌یب ئه‌ردۆگان سه‌ره‌دانا هه‌ولێرێ كریه و مه پێ باشه كو سه‌رۆك كۆمار جاره‌كا دی ژی سه‌ره‌دانا هه‌ولێرێ بكه‌ت دا په‌یوه‌ندیێن هه‌رێما كوردستانێ و توركیا باشتر لێ بهێن، چونكو پێدڤیا توركیا ب هه‌رێما كوردستانێ هه‌یه و هه‌روه‌سا هه‌رێما كوردستانێ ژی پێدڤی ب توركیا یه، ژ به‌ر هندێ ژی هه‌بوونا په‌یوه‌ندیێن باش د ناڤبه‌را توركیا و هه‌رێما كوردستانێ دا د به‌رژه‌وه‌ندیا هه‌ر دو ئالیان دانه).
عه‌بدولره‌حمان كورت د دووماهیا ئاخڤتنا خوه دا ژی راگه‌هاند كو وه‌كو ئاكپارتی مه دڤێت په‌یوه‌ندیێن توركیا و هه‌رێما كوردستانێ د هه‌موو بیاڤان دا باشتر ژی لێ بهێن، چونكو ئه‌و یه‌ك دێ بیته ئه‌گه‌رێ هندێ ئاشتی و ئارامی ل ده‌ڤه‌رێ به‌لاڤ ببیت، هه‌ر كه‌س دزانیت كو ب شه‌ری چو پرس ناهێته چاره‌سه‌ر كرن، ژ به‌ر هندێ ژی بهێزبوونا هه‌رێما كوردستانێ بۆ ئاشتیا ده‌ڤه‌رێ ژی گرنگه.
