په‌رله‌مانتاره‌ك: كڕین و فرۆتن ب كارتێن ده‌نگدانێ دهێته كرن
ئه‌ڤرۆ، زنار تۆڤی:
نێزیكی هه‌یڤ و نیڤان بۆ ئه‌نجامدانا هه‌لبژارتنێن به‌ر وه‌خت یێن عیراقێ ماینه، سه‌ره‌رای هندێ كو نوكه ده‌نگۆیێ پاشخستنا هه‌لبژارتنان یێ گه‌رمه، حوكمه‌تا عیراقێ و كۆمسیۆنا بلندا هه‌لبژاتنان ژی وه‌سا دیار كریه، كو دێ هه‌لبژارتن د ده‌مێ خوه دا هێنه كرن، په‌رله‌مانتاره‌ك ژی دبێژیت: د نوكه دا ل گه‌له‌ك ده‌ڤه‌رێن عیراقێ كڕین و فرۆتن ب كارتێن ده‌نگدانێ دهێته كرن.
د. دیار ته‌یب، ئه‌ندامێ په‌رله‌مانێ عیراقێ ل سه‌ر فراكسیۆنا پارتی دیموكراتی كوردستان، بۆ رۆژناما ئه‌ڤرۆ دیار كر، هه‌ر ژ نوكه پێشێلكاریان ل عیراقێ ده‌ستپێكریه و كڕین و فرۆتن ب كارتێن ده‌نگده‌ران دهێته كرن و ل هنده‌ك جهان كارتێن ده‌نگده‌ران هه‌تا 300 دۆلاران هاتینه فرۆتن، هه‌تا نوكه ب هزاران كارت هاتینه كڕین و فرۆتن و گۆت: “هنده‌ك ئالی ژی هێرشان ل ده‌نگده‌ران دكه‌ن، هه‌كه ئه‌و ده‌نگی نه‌ده‌نه وان دێ وان كارڤه‌دانێن خراب ل هه‌مبه‌ری وان هه‌بن، هه‌تا نوكه چ پێرابوون ل سه‌ر ڤێ دیاردێ نه‌هاتینه وه‌رگرتن، چه‌ندین كه‌س د ناڤا حوكمه‌ت و په‌رله‌مانێ عیراقێ دا پێگه‌هێ خوه بۆ بانگه‌شه‌یا هه‌لبژارتنان ب كار دئینن، ئالیێن سیاسی ب ڤێ چه‌ندێ نه‌رازی بووینه”.
گۆتژی: “هه‌تا نوكه حوكمه‌ت و كۆمسیۆنا بلندا هه‌لبژارتنان ل عیراقێ د رژدن كو هه‌لبژارتنێن به‌ر وه‌خت د ده‌مێ خوه دا بهێنه ئه‌نجامدان، هه‌موو ئاماده‌كاری بۆ هه‌لبژارتنان هاتینه كرن، دیسا هه‌كه هه‌لبژارتن بهێنه كرن ژی، چو كاریگه‌ریا خوه نابیت”.
