په‌رله‌مانێ كوردستانێ ل دۆر ره‌وشا سۆته‌مه‌نیێ سوبه‌هی دێ كۆم بیت
ئه‌ڤرۆ:
په‌رله‌مانێ كوردستانێ ل دۆر گرانبوونا بهایێ پانزینێ و هه‌ژماره‌كا پرۆژه یاسایان دێ كۆم بیت و ل دووڤ به‌رنامێ كارێ كۆمبوونێ ژی، دووڤچوون بۆ بهایێ سۆته‌مه‌نیێ و چاره‌سه‌ركرنا ئاریشا گرانبوونا بهایێ سۆته‌مه‌نیان كه‌ت.
د. رێواز فایه‌ق، سه‌رۆكا په‌رله‌مانێ كوردستانێ د داخوازنامه‌كێ دا داخواز ژ هه‌موو په‌رله‌مانتاران كریه كو ل روونشتنا هه‌ژمار 4 یا ئاسایی یا خولا پائیزێ ل ده‌مژمێر 11:00 به‌ری نیڤرۆ یا رۆژا سێشه‌مبی 26/10/2021 به‌رهه‌ڤ ببن.
ل دووڤ به‌رنامێ كارێ روونشتنێ، بڕیاره خواندنا ئێكێ بۆ پرۆژه‌یاسایا (سه‌رپه‌رشتیكرنا پرۆژێن چاندنێ ل هه‌رێما كوردستانێ) بهێته كرن، به‌رچاڤكرنا دووماهی دووڤچوون و كارێن گرێدای بابه‌تێ سێ ده‌رچوویێن ئێكێ یێن زانكۆ و په‌یمانگه‌هان و وانه‌بێژان و به‌رهه‌ڤیان ل گه‌ل لایه‌نێن په‌یوه‌ندیدار ژ لایێ لژنا په‌روه‌ردێ و خواندنا بلند، دیسا به‌رچاڤكرنا دووڤچوون و كارێن گرێدای ره‌وشا سۆته‌مه‌نیێ و دیتنا چاره‌سه‌ریان ل گه‌ل لایه‌نێن په‌یوه‌ندیدار، هه‌روه‌سا خواندنا دویێ بۆ دو پرۆژه‌یاسایێن دی دێ هێته كرن.
