په‌رله‌مان دێ دوفچوونا ئاریشه‌یا پۆلا نه‌هێ بنه‌ڕه‌تی كه‌ت
هه‌ولێر، قائید میرۆ
قوتابیێن پۆلا نه‌هێ بنه‌ڕه‌تی سكالا گه‌هاندینه په‌رله‌مانێ كوردستانێ لدۆر ئاریشه‌یێن ئه‌ڤساله‌یێن خواندنێ و ئه‌ندامه‌كێ لیژنا په‌روه‌ردێ و خواندنا بلندژی دبێژیت، چه‌ندین شاشی د ئه‌زموونێن پۆلا نه‌هێ بنه‌ڕه‌تی دا هه‌بووینه و ئاشكراكر، سوبه‌ی په‌رله‌مانێ كوردستانێ دێ دوفچوونا ئاریشه‌یێن پۆلا نه‌هێ بنه‌ڕه‌تی كه‌ت.
شه‌مۆل سابیر، ئه‌ندامێ لیژنا په‌روه‌ردێ لپه‌رله‌مانێ كوردستانێ بۆ رۆژناما ئه‌ڤرۆ دیاركر” مه تێبینی لسه‌ر ئه‌زموونێن پۆلا نه‌هێ بنه‌ڕه‌تی هه‌نه و بۆڤێ مه‌ره‌مێ ژی سوبه‌ی رۆژا دوشه‌مبی لیژنا په‌روه‌ردێ و خواندنا بلند لپه‌رله‌مانێ كوردستانێ دێ كۆمبوونه‌كێ ئه‌نجامده‌ت، ئێك ژ مژارێن سه‌ره‌كیێن كۆمبوونا سوبه‌ی دێ ره‌وشا قوتابیێن پۆلا نه‌هێ بنه‌ڕه‌تی هێته به‌حسكرن، هژماره‌كا زۆرا قوتابیێن پۆلا نه‌هی بنه‌ڕه‌تی سكالایێن خۆ گه‌هاندینه لیژنا په‌روه‌ردێ و ئه‌مژی دێ لدۆر ئه‌ڤان گازندێن قوتابیێن نه‌هێ بنه‌ڕه‌تی دێ داخوازا رۆهنكرنێ ل وه‌زاره‌تا په‌روه‌ردێ كه‌ین، هه‌روه‌سا بابه‌ته‌كێ دی ژی گرێدای پۆلا نه‌هێ هه‌یه ئه‌وژی شاشیێن زۆر دناڤا پرسیارێن واندا هه‌بوون، بۆ نموونه چه‌ندین پرسیار لدۆر ژیانا هۆزانڤانه‌كی هاتبوون، یانژی هنده‌ك پرسیار هاتبوون ل هنده‌ك وانه‌یان وه‌كی پێدڤی نه‌هاتبو خواندن چه‌ندین شاشیێن به‌رچاف دناڤا پرسیارێن پۆلا نه‌هێ بنه‌ڕه‌تی دا هه‌بوون و پێدڤیه به‌رچاف رۆهنی هه‌بیت.
لدۆر زانیاریێن رۆژناما ئه‌ڤرۆ ئه‌ڤساله رێژه‌كا زۆرا قوتابیان ده‌رچووینه و سه‌ركه‌فتنا ئه‌ڤێ هژمارا زۆرا قوتابیانژی بۆڤێ چه‌ندێ ڤه‌دگه‌ڕیت ژبه‌ر ره‌وشا ئه‌ڤساله كه‌رتێ په‌روه‌ردێ تێدا ده‌ربازبوی بشێوه‌یه‌كی قوتابی هاتینه ده‌ربازكرن، وه‌ك قه‌ره‌بوویه‌ك ژبه‌ر نه‌بوونا ده‌وامێ، وه‌ك مامۆستایه‌كی بۆ رۆژاناما ئه‌ڤرۆ ئاشكراكری،هه‌موو بزاڤه‌ك هاتیه‌كرن قوتابیێن قۆناغا بنه‌ڕه‌تی بهێنه ده‌ربازكرن و شیانێن زانستی یێن قوتابی به‌رچاف نه‌هاتینه وه‌رگرتن، به‌لكۆ ره‌وشا ئه‌ڤساله‌یا كه‌رتێ په‌روه‌ردێ به‌رچاف هاتیه وه‌رگرتن.
لدۆر رێژا ده‌رچوونێ شه‌مۆل سابیر ئاماژه‌كر” مه گازنده لسه‌ر ره‌وشا په‌روه‌ردێ هه‌نه و پێدڤی بو هه‌ر ده‌ستپێكا سالا نوویا خواندنێ ده‌رگه‌هێن قوتابخانان هاتبانه ڤه‌كرن و ده‌وام یا به‌رده‌وامبیت، هۆلێن شه‌هیانا و بازاڕ ڤه‌كریبوون، به‌لێ تنێ ده‌رگه‌هێن قوتابخانان هاتبوونه گرتن، ئه‌گه‌ر بهێت و ده‌وام وه‌كی پێدڤی هه‌بایه ئه‌ڤه ره‌وشا په‌روه‌ردێ نه‌دگه‌هشتنێ قۆناغا نوكه ئه‌م تێدا، كو كاریگه‌ریێن زۆر لسه‌ر ئاستێ قوتابی په‌یداكرینه و پشتی چه‌ند بهێت دێ ئه‌و كاریگه‌ری دیاربن، لدۆر رێژا ده‌رچوونێ مه زانیاری نینه، به‌لێ ئه‌ڤساله ئاستێ خواندنێ گوره‌ی پیڤه‌رێن زانستی نه‌بوویه و تنێ چه‌ند رۆژه‌كێن كێم ده‌وام بدروستی هاتیه‌كرن، ئاریشه دێ كه‌ڤنه ناڤا كه‌رتێ په‌روه‌ردێ، بتایبه‌تی قوتابیێن بازنا ئێكێ یێن سێ پۆلێن ده‌ستپێكی دێ تووشی كاره‌ساتبن ل چه‌ند سالێن داهاتی، هه‌گه‌ر ده‌ستپێكا ئه‌ڤساله خواندنا سالا بۆری نه‌هێته قه‌ره‌بووكرن ئه‌ڤه پاشه‌ڕۆژا قوتابیان دێ كه‌ڤیته مه‌ترسیێ دا، كاره‌ساته قوتابی پشتی سێ سالان خواندنێ نه‌زانیت ناڤێ خۆ بدروستی بنڤیسیت و پیتا نه‌نیاسیت، ئه‌ڤساله قوتابخانه تنێ بۆراندن بو چو زانست و په‌روه‌رده تێدا نه‌بووینه.
