په‌رله‌مان د ناڤبه‌را چاره‌سه‌ری و قه‌یرانان دا
ده‌مه‌كه بابه‌تێ پوستێ سه‌روكاتیا هه‌رێمێ یێ بوویه بابه‌ته‌ك گه‌رم ل سه‌ر گوره‌پانا سیاسی یا كوردستانێ كو ڤێ گه‌رماتیێ ئاراستێت جودا یێت په‌یداكرین ل سه‌ر دیتنا ده‌روازه و چاره‌سه‌ریه‌ك گونجایی كو د ئه‌نجام دا خه‌لك سه‌ركه‌فتی (براوه) بیت. ئه‌و ئاراستێ پارتی سه‌ركێشیێ لێ دكت نێرینا وان ئه‌وه دڤێن ئه‌ڤ كێشه‌یه چاره‌سه‌ر ببت. ئه‌و ئاراستئ ئێكه‌تی و گۆڕان سه‌ركێشیێ لێ دكن ڤی بابه‌تی ب ده‌رفه‌ت دبینن پێخه‌مه‌ت ئه‌جندا و به‌رنامه‌یێ خو یێ حزبی ده‌ستكاریێ ل شیوازێ هه‌لبژارتنا سه‌روكێ وه‌لاتی دا بكه‌ن و د ناڤ په‌رله‌مانی دا هه‌لبژێرن.
بوچی پارتی ڤی هه‌لویستی ره‌ت دكه‌ت؟
١- لایه‌نێ قانوونی: ژ به‌ر كو گوهرینا شیوازێ هه‌لبژارتنا سه‌روكی بابه‌ته‌ك دستوری یه، دستور رێبه‌رێ دیاركرن و ناساندنا شێوازێ حوكمرانیێ یه د وه‌لاتی دا نه‌ك قانوونا عادی. د فقهێ قانوونی دا قانوون ل به‌ر رووناهیا دستوری دهێنه دانان نه‌ك به‌روڤاژی. ل ناڤه‌روكا پروژێت ئێكه‌تیێ و گۆڕان، وان دڤێت شێوازێ حوكمرانیێ بگوهرن برێیا قانوونه‌كا عادی و پاشی د ناڤ ده‌ستوری دا دابرێژن كو ئه‌ڤه شاشی یه‌كا قانوونی یه، ژ به‌ر كو ئه‌ڤه سه‌رپێچی كرنه ل سه‌ر بنه‌مایێ بالاتیا دستوری (سمو الدستور) كو د هه‌ره‌مێ قانوونی دا دستور بلندترین قانوونه.
پسیارا ساده ئه‌ڤه‌یه ئایا دروسته حكومه‌ت بریار و رێنمایا ده‌ربكه‌ت بێی قانوونا په‌رله‌مانی ب بهانه‌یا هندێ كو حكومه‌ت بێژیت ئه‌ز دزانم كا دێ قانوونا چه‌وا ژ په‌رله‌مانی ده‌ركه‌فیت!! ئایا په‌رله‌مان دێ ڤێ رێكێ ده‌ته حكومه‌تێ؟؟ ئه‌گه‌ر به‌رسف نه‌خێر بیت، خێره په‌رله‌مان چاڤه‌رێی لیژنا ده‌ستوری ناكه‌ن كا دێ چ شێواز ده‌ست نیشان كه‌ن؟! ژ لایه‌كێ دیتر ڤه د هه‌می وه‌لاتێن دیموكراسی دا سێ ده‌ستهه‌لاتێت (ته‌شریعی، دادوه‌ری، بجهئینانێ) ژێك جودا و سه‌ربه‌خو یێن هه‌ین كو نابیت كاره‌ك بهێته كرن ژلایێ ده‌ستهه‌لاته‌كێ ڤه كارتێكرنێ ل كارێ ده‌ستهه‌لاته‌كا دی بكه‌تن. بۆ ڤێ چه‌ندێ بریاره‌ك ژلایێ دادگه‌ها ئیتحادی یا عیراقێ یا ده‌ركه‌فتی كو ئه‌ڤه هه‌می پێخه‌مه‌ت هندێ یه كو رێز ل بنه‌مایێ ژێك جوداكرنا ده‌ستهه‌لاتان و بنه‌مایێ سه‌ربه‌خویا ده‌ستهه‌لاتان بهێته گرتن.
زێده‌باری هندێ پێشكێشكرنا پروژان بێی ئاگاداری و پێشنیازا سه‌روكاتیا هه‌ریمێ كو ل دویف یاسا سه‌روكاتیا هه‌ریمێ بابه‌تێن گرێدایی ب وان ڤه بتنێ ده‌ستهه‌لاتا وانایه كو ئه‌و لایه‌نێ مه‌عنی نه و دزانن كێماسیا قانوونی چیه، باشه ژبلی سه‌رپێچیا یاسایی دیكتاتوریی و خو فه‌رزكرنا په‌رله‌مانی دیارناكه‌ت !! ل ڤێره ئه‌گه‌ر لایه‌نێ قانوونی به‌رچاڤ نه‌هێتـه وه‌رگرتن، پێشێلكرنا سه‌روه‌ریا قانوونێ چ مفا هه‌یه ژبلی سه‌رئێشه دروست كرنێ ؟!
2- لایه‌نی شه‌رعیه‌تێ: ل دووف وان پروژێن ئێكه‌تی، گۆڕان و ئیسلامیا پێشكێشكرین ئه‌و مافه ژ وه‌لاتیان دهێته وه‌رگرتن كو بشێن پشكداریێ د هه‌لبژارتنا سه‌روكێ وه‌لاتێ خو دا بكه‌ن. د بنیات دا ل دووف هه‌می پیڤه‌را په‌رله‌مان ئه‌و جهه یێ زێده‌ترین مافان د ده‌ته خه‌لكی نه‌ك مافان ژ خه‌لكێ وه‌ربگریت، ژ به‌ر كو خه‌لك ژێده‌ر و خودانێ هه‌می ده‌ستهه‌لاتایه نه‌ك په‌رله‌مان.
3- لایه‌نێ رێكه‌فتنێ: یا دیاره ل كوردستانێ و ب تایبه‌ت ل ڤێ قوناغێ دا رێكه‌فتن ل سه‌ر هه‌می بابه‌تان هاتیه‌كرن كو د هه‌می رێكه‌فتنان ژی دا پارتی زه‌ره‌رمه‌ند بوویه، ژ به‌ر كو په‌نابرنا به‌ر رێكه‌فتنێ ژ ئه‌نجامێ قوناغا نوكه و بارودوخێ كورستانێ یه زێده‌باری هندێ بریاره‌ك ب ژماره ١ ل سالا ٢٠١١ ێ ژ په‌رله‌مانی ده‌ركه‌فتیه كو ته‌كه‌ست ل سه‌ر پابه‌ندبوونا لایه‌نێن سیاسی ب رێكه‌فتنێ كریه ب تایبه‌ت ل سه‌ر وان بابه‌تێن ره‌هه‌ندێن نیشتیمانی هه‌ین نموونه ژی د زورن: ژ وانا نه‌خستنا پروژێ به‌رێ یێ دستورێ هه‌رێما كوردستانئ بۆ ریفراندومێ كو ب ٩٦ ده‌نگێن په‌رله‌مانتاران هاتبوو په‌سه‌ند كرن. سه‌روكێ نوكه یێ په‌رله‌مانی ب رێكه‌فتنه‌كا ژ ده‌رڤه‌ی په‌رله‌مانی بوویه ئه‌گه‌ر نه وه‌سا بیت، ئایا ل كیش وه‌لاتێ دونیایێ سه‌ركه‌فتیێ دووێ د هه‌لبژارتنێن گشتی دا پوستێ سه‌روكاتیا په‌رله‌مانی وه‌رگرتیه!! كارێ وان ل 13 خزیرانێ كری ده‌ركه‌فتن بوو ژ بنه‌مایێ رێكه‌فتنێ. ئانكو بۆ چاره‌سه‌ریا بابه‌تێ سه‌روكاتیا هه‌رێمێ فه‌ره هزركرن و زڤرین و پابه‌ندبوونا هه‌می لایه‌نێن سیاسی ب لهه‌ڤهاتنێ بیت.