په‌رویز كورد: باژێرێ سنه ب كانیا ژه‌نیارێن ده‌فێ دهێته نیاسین
ئه‌ڤرۆ نیوز ، زنار تۆڤى:
موزیكژه‌نێ گه‌نج په‌رویز كورد، كو خه‌لكێ باژێرێ سنه‌یه ل رۆژهه‌لاتێ كوردستانێ و نوكه ژى ل هه‌مان باژێر دژیت، د دیداره‌كێ دا بۆ ئه‌ڤرۆ نیوز دیار كر: ئه‌و ئامیرێ ده‌فێ دژه‌نیت و ل گه‌ل هندێ ژى مامۆستایێ ئامیرێ ده‌فێ یه، هه‌روه‌سا ئه‌و كارێ میكس و ماسترینگێ ژى دكه‌ت، ئه‌ڤه ده‌مه‌كێ درێژه وى گرۆپه‌كێ ده‌فێ ژى ب ناڤێ گرۆپێ كارین دامه‌زراندیه، كو ژ 15 كه‌سان پێك دهێت، هه‌موو گه‌نجێن خودان شیانن د ڤى وارى دا، دیسان ل باژێرێ سنه گه‌له‌ك گرنگى ب ڤى ئامیرى دهێته دان، ژبه‌ر هه‌بوونا ژه‌نیارێن زیره‌ك یێن ده‌فێ ل ڤى باژێرى سنه ب باژێرێ كانیا ده‌فێ ل جیهانێ دهێته نیاسین، ل گه‌ل هندێ ژى گرۆپێ مه ئامیرێن وه‌كو ده‌فێ و تاسێ و دو ته‌بلێ و بندیر و ده‌ربووكێ دژه‌نن.
ناڤهاتى ئه‌و ژى گۆت: ل رۆژهه‌لاتێ كوردستانێ كاریگه‌ریا موزیكا ئیرانێ ل سه‌ر یا كوردى هه‌یه، به‌لێ موزیكژه‌نێن كورد شیاینه وى كاریگه‌ریێ كێمتر لێ بكه‌ن و د نوكه دا ئه‌م دشێین بێژین موزیكا كوردى كاریگه‌رى ل سه‌ر موزیكا ئیرانى هه‌یه، چونكى پرانیا موزیكا ئیرانى د ره و ریشال دا بناغێن وى ژ موزیكا كوردى نه، ب تایبه‌تى د وارێ فولكلۆرى دا، دیسان ئیرانیان موزیكا كوردى بۆ خوه حسێب كریه، لێ هه‌ر تامه‌كا كوردى د موزیكا وان دا هه‌یه، هه‌ر چه‌نده نوكه كارێ موزیكێ ل ئیرانێ ب زه‌حمه‌ت كه‌فتیه، ژ به‌ر وان ئالۆزیێنل ناڤا ئیرانێ رووداین، هه‌روه‌سا مه پێخۆشه ئه‌م وه‌كو گرۆپێ كارین بشێن ئاهه‌نگ و كۆنسێرتان ل هه‌رێما كوردستانێ ئه‌نجام بده‌ین.
په‌رویز هێشتا دبێژیت: هه‌ر چه‌نده ده‌ف ئامیره‌كێ كوردى نینه، به‌لێ كوردان ژ هه‌موو گه‌لێن دیتر پتر ب كارئینایه و خوه لێ كره خودان، ژ پێخه‌مه‌ت ب ئامیره‌كێ كوردى بهێته نیاسین، دیسان نوكه گرۆپێ وان یێ خوه به‌رهه‌ڤ دكه‌ت بۆ ئه‌نجامدانا هنده‌ك كارێن نوو یێن هونه‌رى د ئه‌ڤ ساله دا و وان ل به‌ره هه‌رده‌م ب رێیا موزیكا خوه كارێن نوو پێشكێشى خه‌لكێ كوردستانێ بكه‌ن.