په‌ری محه‌مه‌د: رێكخراوێن ئافره‌تان نه‌شیاینه ئاریشێن وان كێم بكه‌ن
ئه‌ڤرۆ، نه‌وزاد هلۆری:
هه‌رچه‌نده ل هه‌رێما كوردستانێ هژماره‌كا زۆر یا رێكخراوێن ئافره‌تان یێن حوكمی و حزبی هه‌نه، به‌لێ ئاریشێن ئافره‌تان د زێده‌بوونێ دانه و ئه‌و رێكخراو نه‌شیاینه وه‌كو پێدڤی ئاریشێن وان بزانن و چاره‌سه‌ر بكه‌ن.
په‌ری محمه‌مه‌د، نڤیسه‌ر د وارێ ئافره‌تان دا بۆ ئه‌ڤرۆ گۆت: (ل هه‌رێما كوردستانێ 89 رێكخراوێن گرێدای ئافره‌تان یێن حكومی و حزبان هه‌نه كو تایبه‌ت ب ئافره‌تان و ئاریشێن وان، ئه‌ڤه ژبلی سازیێن گرێدایی ره‌وشا ئافره‌تان كو ل هه‌رێما كوردستانێ د خزمه‌تا ئافره‌ت و خێزانێ دا كار دكه‌ن).
په‌ریێ زێده‌تر گۆت: (ل گه‌ل هه‌بوونا ئه‌ڤ هژمارا زۆر یا رێكخراوێن گرێدای ئافره‌تان، هێشتا نه‌شیاینه ببنه ئه‌گه‌رێ كێمكرنا ئاریشێن ژنان، ل ڤێره ئه‌م دشێین پرسیارا وان بكه‌ین ئه‌رێ د راستی دا ئافره‌تان مافێ وێ یه‌كێ نینه كو د چارچوڤێ كارێ وان رێكخراوان دا خوه ببینن و هه‌بوونا خوه ب سه‌لمینن، جڤاتێن ئافره‌تان و رێكخراوێن دی یێن ئافره‌تان بودجه و پاره‌كێ زۆر ل به‌ر ده‌سته و دبه‌ن، ئه‌رێ چ خزمه‌ت بۆ كچ و ژنان د جڤاكێ مه دا كریه، ژبلی كو هنده‌ك كه‌سێن پله‌دار مفادار بوینه ژ كار و چالاكی و پرۆژێن وان، ئه‌رێ ئه‌وان رێكخراوان چه‌ند سه‌ركردێن ئافره‌تان دروست كرینه، ئاریشا كیژ ئافره‌تێ چاره‌سه‌ر كریه كو ب ئازادی و دلخوشی بژیت؟).
ئه‌ڤێ نڤیسه‌رێ د درێژاهیا ئاخفتنێن خوه‌دا دیار كر ژی كو پێدڤیه ئه‌ڤ رێكخراوه و كه‌سانێن دیتر ژی بناڤێ پرسا ئافره‌تان و چاره‌سه‌ر كرنا ئاریشێن وان پارێ گشتی نه‌به‌ن بۆ به‌رژه‌وه‌ندیێن خوه بكار بینن و گۆت: (پرانیا ئه‌و ژنێن كو د چالاكن و دشێن كار بۆ پرسا ژنان و چاره‌سه‌ركرنا ئاریشێن وان بكه‌ن، جهێ داخێ یه چو كار د ده‌ستان دا نیه و ئه‌ندامێن وان رێكخراوا نینن، پرانیا وان بێ لایه‌نی كار دكه‌ن، له‌وا پێدڤیه ژ ئه‌ڤرۆ وێڤه ئه‌ڤ رێكخراوه بناڤێ ئافره‌تان كار نه‌كه‌ن هه‌كه نه‌بنه ئه‌گه‌ر بۆ كێمكرن و چاره‌سه‌ر كرنا ئاریشێن ئافره‌تان).
ل گوره‌ی ئاخفتنێن نڤیسه‌را ناڤبری كو وێ ئه‌ڤ هژماره ژ فه‌رمانگه‌ها رێكخراوێن نه حوكمی وه‌رگرتیه، ل پارێزگه‌ها سلێمانیێ 24 رێكخراوێن گرێدای ئافره‌تان هه‌نه و ل پارێزگه‌ها هه‌ولێرێ ژی 35 رێكخراو هه‌نه و ل دهۆكێ ب تنێ حه‌فت رێكخراو هه‌نه، دیسان ل كه‌ركوكێ 11 و ل هه‌له‌بچه ژی دو، ل گه‌ل 10 رێكخراوێن دی یێن حزبی كود وارێ ئافره‌تان دا كار دكه‌ن.
