په‌سه‌ندكرنا یاسا وه‌رزشی گه‌هشتیه قۆناغێن دووماهیێ
ئه‌ڤرۆ،
د داخویانیه‌كێدا ئه‌ندامێ په‌رله‌مانێ ئیراقێ ل سه‌ر لیستا پارتی دیمۆكراتی كوردستان و چێگرێ لژنا وه‌رزش و لاوان ل په‌رله‌مانێ ئیراقێ بۆ رۆژناما ئه‌ڤرۆ دیاركر كو په‌سه‌ندكرنا یاسا وه‌رزشی ل قۆناغێن دووماهیێ دا یه و چاڤه‌ڕێ یه د خولا بهێت یا روونشتنا په‌رله‌مانی ئه‌و برگێن مایی ب كه‌ڤیته ده‌نگدانا دووماهیێ بۆ كارپێكرنێ.
زێده‌تر د. دیار ته‌یب گوت: ژبۆ نووكرنا ژێرخانا یاسا وه‌رزشی ئه‌وا ل سالا 1986ێ هاتیه دروستكرن ئه‌ڤه بوو ماوێ ساله‌كه لژنا وه‌رزش و لاوان ل په‌رله‌مانێ ئیراقێ پشتی چه‌ندین دیڤچوون و گه‌نگه‌شه ل گه‌ل شاره‌زا و پسپۆرێن بوارێ وه‌رزشێ دا كرین شیاین سێ نامیلكه بۆ دانا یاسایا ئۆلۆمپی و ئێكه‌تیێن وه‌رزشی و یانێن وه‌رزشی به‌رهه‌ڤبكه‌ین ودیڤدا ژلایێ په‌رله‌مانێ ئیراقێ ڤه خواندن بۆ هاتیه كرن و پشتی چه‌ندین بزاڤێن مه ده‌نگدان لسه‌ر یاسا ئۆلۆمپی و یا ئێكه‌تیێن وه‌رزشی هاته كرن و كه‌فتیه كاری دا بۆ هه‌ر پێنگاڤه‌كا بهێت دێ ل دویڤ یاسا یا نوو كار پێ هێته كرن، لێ ژبه‌ركو یاسا یانێن وه‌رزشی ژلایێ چه‌ند ژ په‌رله‌مانتارێن ئیراقێ هنده‌ك تێبینی ل سه‌ر هه‌بوو سه‌رباری دو خاندن و راستڤه‌كرن بۆ هنده‌كا هاتیه‌كرن ژ سه‌رجه‌مێ 29 برگێن یاسایێ بتنێ ده‌نگدان لسه‌ر 16 برگا هاتیه كرن و یێن مایی 13 بڕگێن یاسایی كو بریاره بۆ خولا بهێت یا په‌رله‌مانی ده‌نگدان لسه‌ر بهێته كرن ئه‌گه‌ر نه دێ ژ ڤێ خولێ ژی ده‌ربازبیت تا بۆ روونشتنه‌كا دی.
ژلایه‌كێ دیڤه ناڤهاتی گوت: نووكرنا یاسایا وه‌رزشی گرنگیه‌كا مه‌زن ژلایێ پرانیا ئه‌كادیمی و شاره‌زایێن وه‌رزشی ل هه‌رێما كوردستانێ و ئیراقێ بۆ هێته دان ژبه‌ركو دێ ده‌لیڤێ بۆ گه‌له‌ك كه‌سان په‌یداكه‌ت بۆ كاركرنێ و پێشئێخستنا وه‌رزشی و دیسان دێ ژێرخانا وه‌رزشی به‌ره ب باشتر به‌ت و تایبه‌تمه‌ندیێن خوه هه‌بیت ژ لایه‌نێ وه‌به‌رهێنانێ و هه‌تا كاركرنێ د ناڤ كارگێریا وه‌رزشی دا و پێشبینی دكه‌م ل كوردستانێ دێ مفایه‌كێ مه‌زن ژێ وه‌رگرن.
د. دیار ته‌یب ئه‌وچه‌نده ژی دیاركر هه‌مانگیه‌كا باش ل گه‌ل رێڤه‌به‌ریا گشتی یا وه‌رزشی ل هه‌رێما كوردستان هه‌یه ژبۆ هندێ ئه‌و برگێن دهێنه په‌سه‌ندكرن بۆ مفا وه‌رگرتنێ ل هه‌رێمێ ژی بهێته ب كارئینان و ئه‌ڤچه‌نده دێ بیته ئه‌گه‌ر ژێرخانا وه‌رزشی به‌ره ب پێشڤه‌چوونێ بچیت ژ ئالیێ كارگێری، هونه‌ری، هه‌لبژارتن، ده‌سته‌كا گشتی، ته‌كنیكی و رێكخستنێ ڤه كو خودان شاره‌زا و ئه‌كادیمی زێده‌تر رولێ خوه بینن د ئاڤاكرنا وه‌رزشا كوردستانێ دا.
