په‌قاندنا هێكان ب تشتێن نووڤه چ په‌یام دگه‌هینت؟
هەرهین محەمەد:
په‌قاندنا هێكا نه‌ریته‌كێ كه‌ڤنه ژ باب و باپیران مایه و ئه‌ڤ نه‌ریته نه‌ك بتنێ دناڤ جڤاكێ كوردی دا هه‌یه، به‌لكو د جڤاكێن بیانی ژی دا یێ هه‌ی ڤه‌كوله‌ره‌كێ جڤاكی دیار كر كو په‌قاندنا هێكا ب هه‌ر تشته‌كێ نووڤه ده‌روونێ مروڤی ئارام دكه‌ت، له‌ورا ئه‌ڤ نه‌ریته بنبر نه‌بوویه.
مریه‌م فه‌خری مامۆستایه دیار كر كو په‌قاندنا هێكا ب تشتێن نووڤه وه‌كو كرینا ترومبێلێ، یان خانی بیت ژ دیارده‌یێن كه‌ڤنه، هێك رامانا ژیانێ و ده‌ستپێكه‌كا نوو بوو ل سه‌ر ده‌مێ باب و باپیران و گۆت: ب دیتنا من په‌قاندنا هێكا ب هه‌ر تشته‌كێ نووڤه رامانا وێ ئه‌و نینه دێ ژ چاڤان هێته پاراستن، هه‌كه سه‌حكه‌ینێ گه‌له‌ك كه‌س رۆژانه بخۆ تشتێن نوو دكرن، به‌لێ چو هێك پێڤه نه په‌قاندینه و دبیت هه‌تا نوكه ژ چاڤان هاتیه پاراستن، من هندی دیتی هێك ب ترومبێلی ڤه یا هاتیه په‌قاندن و هه‌تا نوكه چ ستانداردێن جیهانی به‌حس نه‌كریه كو هێك مرۆڤی ژ چاڤان دپارێزیت.
ڤه‌كوله‌رێ جڤاكی هژیان بامه‌رنی دیار كر كو هه‌ر د كه‌ڤندا لسه‌ر ده‌مێ باب و باپیران ئه‌ڤ نه‌ریته هه‌بوو، هه‌رگاڤا كاره‌ك كربا هێك پێڤه دپه‌قاندن ژبه‌ر چاڤان و حه‌سیدیێ، هه‌رچه‌نده ئه‌ڤ نه‌ریته نوكه ل هنده‌ك جهان مایه و ل هنده‌ك جهان ژی نه‌مایه و گۆت: راسته حه‌سیدی و چاڤ لێدان یا هه‌ی و ئه‌ڤ چه‌نده دكر وه‌كو ئارامیه‌كێ لنك وان په‌یدا دبوو.
مه‌لا عه‌بدوللا بابوخكی، ئه‌ندامێ لژنا فه‌توایێ ل پارێزگه‌ها دهۆكێ دیار كر كو په‌قاندنا هێكا ب تشته‌كێ نووڤه ب وێ مه‌ره‌مێ كو هه‌كه هێكێ ب وی تشتێ نووڤه ب په‌قینن ئه‌و تشته دێ هێته پاراستن ژ چاڤا و حه‌سیدیێ، ئه‌ڤه د شه‌ریعه‌تی دا تشته‌كێ خه‌له‌ته و ناهێته قه‌بیلكرن، چونكی ئه‌ڤه گرێدایی عه‌قیده و بیرو باوه‌رێن مرۆڤییه و گۆت: د عه‌قیدا ئیسلامێ دا بیرو باوه‌رێن مه ئه‌ون بتنێ خۆدایێ مه‌زن مرۆڤی دپارێزیت ژ هه‌ر تشته‌كێ خراب.
مه‌لای د به‌رده‌وامیا ئاخفتنێن خۆدا گۆت: یا دروست ئه‌وه هه‌ر تشته‌كی مرۆڤ بخو بكڕیت بتنێ ناڤێ خۆدێ ل سه‌ر بینت و دوعا ژ خۆدایێ مه‌زن بكه‌ت وی تشتی بپارێزیت و یان بخۆ سه‌ده‌قه‌كێ بده‌ت، ئه‌ڤه تشته‌كێ دروسته‌ن به‌لێ هه‌كه هێكا په‌قینت و چافكا ب وی تشتی ڤه‌كه‌ت ئه‌ڤ چه‌نده دچیته د خانا حه‌رامیێ دا و دبێژنه ڤی تشتی شركا بچوك، چونكی وه‌سا هزر دكه‌ت ئه‌ڤ تشته دی وی پارێزیت و ئه‌ڤه ناهێته قه‌بیلكرن و فه‌توا یا ل سه‌ر هه‌ی كو ئه‌ڤ چه‌نده یا حه‌رامه.
