په‌نابه‌ریێ ژ تیپا ئاگری یا هونه‌ری دوور كر
ئه‌ڤرۆ، رێوار محه‌مه‌د ره‌شید:
له‌یلا ئاگری، سترانبێژه‌كا باژێرێ عه‌فرینێ یه ل رۆژئاڤایێ كوردستانێ نوكه وه‌كو په‌نابه‌ر ل پارێزگه‌ها هه‌ولێرێ دژیت د دیداره‌كێ دا بۆ به‌رپه‌رێ هونه‌ری یێ رۆژناما ئه‌ڤرۆ دیار كر كو ده‌مێ ژیێ وێ هه‌شت سال حه‌زا كارێ سترانگۆتنێ ل ده‌ف وێ په‌یدابوو و د هه‌مان سال دا ب پشته‌ڤانیا بابێ خوه بۆ ئێك ژ ئه‌ندامێن تیپه‌كا هونه‌ری ل باژێرێ عه‌فرینێ و پشتی بۆ ده‌مێ چه‌ندین سالان كارێن هونه‌ری ل گه‌ل تیپا ناڤهاتی ئه‌نجامداین ئه‌و تیپ بجه هێلا و به‌ر ب تیپا (ئاگری) یا هونه‌ری ڤه چو و پشتی چه‌ندین سالێن خزمه‌تا هونه‌ری د ناڤ ڤێ تیپێ دا بووراندین ل سالا 2018 ێ ژ نه‌چاری ئه‌ڤ تیپه بجه هێلا ژ به‌ر كاودانێن نه‌خوه‌شێن ب سه‌ر عه‌فرینێ دا هاتین و په‌نابه‌ری هه‌رێما كوردستانێ بوو.
ناڤهاتیێ ئاماژه دا وێ چه‌ندێ كو هه‌كه سترانبێژ یێ گراێدایی چ تیپان نه‌بیت و یێ سه‌ربه‌خوه بیت دێ شێت پتر كارێن هونه‌ری ئه‌نجام ده‌ت و گۆت: “پشتی ئه‌ز ل پارێزگه‌ها هه‌ولێرێ ئاكنجیبوویم ل سالا بۆری من سترانه‌ك بناڤێ (چه‌مێ عه‌فرینێ) ژ په‌یڤ و ئاوازێن (شه‌هیبان)ی تۆماركر و نوكه ژی ئه‌ز مژوولی تۆماركرنا سترانه‌كا دوقۆلی مه دگه‌ل سترانبێژه‌كێ رۆژئاڤایێ كوردستانێ بناڤێ (سیپان عه‌فرینی) كو بابه‌تێ ڤێ سترانێ ل دۆر ئه‌ڤینیێ یه و ل ده‌مه‌كێ نێزیك دێ كلیپ ژی كه‌ین، هه‌روه‌سا ژ بلی ڤی كارێ هونه‌ری ئه‌ز دێ پشكداری گۆتنا سترانه‌كێ بم بناڤێ (چیمه‌نا كوردستانێ) كو سترانبێژێن هه‌ر چار پارچێن كوردستانێ دێ تێدا پشكداربن و نوكه كار د چێكرنا مۆزیكا ڤێ سترانێ دا دهێته‌كرن”.
ل دووماهیێ له‌یلایێ خویا كر كو په‌یوه‌ندیێن وێ ل گه‌ل هونه‌رمه‌ندێن كوردستانێ د ئاسته‌كێ باش دا نینن، ژ به‌ر كو هه‌تا نوكه ئه‌و ده‌رفه‌ت بۆ وێ په‌یدانه‌بوویه كو ژ نێزیك هه‌ڤدو بنیاسن و د پلانا وێ دایه ل ده‌مه‌كێ نێزیك سه‌ره‌دانا پارێزگه‌ها دهۆكێ بكه‌ت ب مه‌ره‌ما پشكداریكرنێ د به‌رنامه‌كێ هونه‌ری یێ كه‌ناله‌كێ ئاسمانی دا، ئه‌ڤ دده‌مه‌كی دایه چوجاران پشكداریێ د ئاهه‌نگێن تایبه‌ت و داواتان دا ناكه‌ت و گۆت: “بۆ ده‌مێ 19 سالانه من ژیانا هه‌ڤژینیێ پێكئینای و هه‌ڤژینێ من پشته‌ڤانیه‌كا مه‌زن ل كارێن من یێن هونه‌ری دكه‌ت، هه‌روه‌سا من سێ زارۆ ژی هه‌نه و ئه‌و ژی گه‌له‌ك نێزیكی هونه‌ری نه و كارێن هونه‌ری ئه‌نجام دده‌ن و ئه‌ز ب هه‌می شیانێن خوه به‌رده‌وام پشته‌ڤانیا وان دكه‌م ل پاشه‌رۆژێ ببنه هونه‌رمه‌ندێن باش”.
