په‌نابه‌رێن ئه‌فغانی بووینه ئاریشه‌كا نوو بۆ ئورۆپا
ئه‌ڤرۆ:
ده‌زگه‌هێن راگه‌هاندنا ئورۆپا دیار دكه‌ن كو پشتی ئه‌مریكا و وه‌لاتێن ئه‌ندامێن ناتۆ ده‌ست ب ڤه‌كێشانا هێزێن خوه ژ ئه‌فغانستانێ كری، ره‌وشا وی وه‌لاتی گه‌له‌ك ئالۆز بوویه و رێكخراوا تالیبانێ ژی شیایه گه‌له‌ك ده‌ڤه‌ران كۆنترۆل بكه‌ت، ژ به‌ر هندێ ژی ره‌وشا ناڤخوه‌یی یا ئه‌فغانستانێ گه‌له‌ك ئالۆز بوویه و خه‌لك ژ ترسا شه‌ری به‌رێ خوه دده‌نه ئیرانێ و ب رێیا ئیرانێ ژی ده‌ربازی توركیا دبن و دخوازن بچنه ئورۆپا و ژ به‌ر هندێ ژی ئاریشه‌كا نوو بۆ ئورۆپا دروست بوویه و وه‌لاتێن ئێكه‌تیا ئورۆپا ژی داخواز ژ توركیا و یونانێ كرینه كو سنورێن خوه توند بكه‌ن دا په‌نابه‌رێن ئه‌فغانی ده‌ربازی ئورۆپا نه‌بن.
سلێمان سویلو وه‌زیرێ ناڤخوه یێ توركیا ژی دوهی راگه‌هاند كو ره‌وشا ناڤخوه‌یی یا ئه‌فغانستانێ گه‌له‌ك ئالۆزه و مخابن رۆژانه ب سه‌دان وه‌لاتیێن ئه‌فغانستانێ ب رێیا سنورێ ئیرانێ ده‌ربازی توركیا دبن، هه‌تا نها نێزیكی هزار وه‌لاتیێن سڤیل یێن ئه‌فغانستانێ ل پارێزگه‌ها وانێ ژ ئالیێ هێزێن ئێمناهیێ ڤه هاتینه ده‌سته‌سه‌ر كرن، ره‌وش گه‌له‌ك ئالۆزه و دڤێت د ئاستێ نێڤده‌وله‌تی دا چاره‌سه‌ریه‌كا گونجای بۆ ره‌وشا ئافغانستانێ بهێته دیتن، چونكو توركیا ژی ئه‌و شیان نینن بشێت ب هزاران وه‌لاتیێن ئه‌فغانستانێ ب خوه‌دان بكه‌ت و پێدڤیاتێن سه‌ره‌كی یێن ژیانێ بۆ وان دابین بكه‌ت، ژ به‌ر هندێ ژی دڤێت وه‌لاتێن ئێكه‌تیا ئورۆپا و سازیێن مافێن مرۆڤی ب تایبه‌تی ژی نه‌ته‌وه‌یێن ئێكگرتی هاریكاریا توركیا بكه‌ن.
هه‌ژی ئاماژه‌پێدانێ یه كو ژ به‌ر شه‌رێ نها ل ئه‌فغانستانێ وه‌لاتیێن سڤیل ژ ترسا شه‌ری ده‌ربازی ئیرانێ دبن و پاشی دچنه توركیا و دخوازن ب رێیا توركیا ده‌ربازی وه‌لاتێن ئورۆپا ببن، ژ به‌ر هندێ ژی نها بابه‌تێ په‌نابه‌رێن ئه‌فغانی بوویه ئاریشه‌كا گه‌له‌ك مه‌زن بۆ وه‌لاتێن ئێكه‌تیا ئورۆپا.
