په‌یالا چایێ!!
هه‌بوو نه‌بوو, چ ژ گوندێ مه خۆشتر نه‌بوو, كه‌س ژ سیخوڕان پتر تێدا نه‌بوون:
گونده‌كێ بچووك هه‌بوو خه‌لكێ وێ گه‌له‌كێ ئازاد بوو تێدا, ب كه‌یفا خوه ده‌ربڕین ژ هه‌ستێن خوه یێن رۆژانێن ژیانێ ده‌ربڕین و چ جاران ده‌ستهه‌لاتا موختاری سه‌را ره‌خنێ و نه‌رازیبوونێ خه‌لكێ گوندی نه دئێشاندن.
ل وی گوندی چایخانه‌ك هه‌بوو كو هه‌می ده‌مان یا پڕبوو ژ مرۆڤان. چایچی رۆژانه گازندێن خوه د به‌ر په‌یالان ڕا دگۆتن: رۆژانه گونه‌ه دكره ستوویێ موختاری ده‌مێ ئه‌ڤ ره‌شه‌كێن ب كێرنه‌هاتی ل خوه كۆمكرین, جار ئاڤێ ژ ده‌راڤان به‌رده‌ن, جار په‌ز و چێلێن خوه د به‌رده‌ته ل سه‌ر بیستانێن خه‌لكی, یێ ب گازنده بوو ل سه‌ر نه‌بوونا شه‌كرێ و كێم توڤیێ, نه‌بوونا غازێ و گازێ و.. . گه‌له‌ك جاران موختاری بخوه پشتا چایچی دگرت دا هێشتا خوه دچاڤێن گوندیاندا ببینیت!
رۆژه‌كێ موختار وه‌كی هه‌ررۆژ چوو چه‌یخانێ, وێ رۆژێ ب تنێ چایچی نه ئاخفت و تنێ كارێ خوه دكر.. موختار ڕابوو هند پیدادا و هند قوتا هه‌تا درێژكری! هه‌میان گۆتێ ئه‌ڤه بۆ ته هولێكر؟!مانێ چ نه‌كریه و چنه گۆتییه!!؟ موختاری گۆتی: ما بۆچی په‌یالا منا چایێ دره‌نگ هینا! ره‌شه‌كێن وی ژی هه‌ر ئیكی ژلایێ خوه‌ڤه دخشه‌ك لێدا و گۆتن: وێ رۆژێ چایه‌كا شرین و سار دانابوو به‌ر مه!
چایچی گۆته خوه ئه‌ڤه هه‌وه خێره؟ من ئاڤا قوریكێ كه‌لاندی ب ده‌ستێ موختاری دا كربوو و ل من بووری و هه‌ر رۆژ من گازنده ژێدكرن ئه‌وی ب دله‌كێ فره‌ه وه‌ردگرت، سه‌را په‌یاله‌كا چایێ ئه‌ڤان بۆ ئه‌ز پێنه‌عویر كرم!
سوحبه‌تا (رۆژنامه‌ڤانێ گرتی) وه‌كی یا چایچی بوو!. د ناڤ تۆزا شه‌ڕیدا ئه‌م ئێكودو باش نابینین! بلا ئه‌م بێ ده‌ستی دربان ل خوه نه‌ده‌ین.
ده‌ستهه‌لات بلا خوه فێری هه‌می جۆره ڕه‌خنان بكه‌ت, پانێ ل ئه‌ورۆرپا رۆژنامه‌ڤان سه‌رۆك و حوكمه‌تێن خوه دكه‌نه دیكل و مریشك، لێ كه‌س رۆژنامه‌ڤانان بنچاڤناكه‌ن و نا گرن و زیندان ژی ناكه‌ن. حوكمه‌ت و ده‌ستهه‌لات مه‌زنتره ژ ڕه‌خنا رۆژنامه‌ڤانه‌كی یان چایچیه‌كی! حوكمه‌تا كوردستانێ ب دیمۆكراتیێ هاتیه نیاسین ل جیهانێ بلا به‌رپه‌رێن خوه ره‌ش نه‌كه‌ت ب بابه‌تێن هۆسا ڤه. بلا چایچی باخڤیت دبیت وه‌سا بیت وه‌كی وی گۆتی, به‌لكی وه‌سا ژی نه بیت. خه‌لكێ ئازاده و ژ ئازادیێ خوه‌شتر نینه! نێ شه‌ڕێن مه هه‌می بۆ ڤێ ئازادیێ یه! هه‌كه رۆژنامه‌ڤانی حه‌ز ژ وه‌لاتێ خوه نه‌كربا دا ئه‌و ژی له‌گله‌گیێ كه‌ت.
پێشمه‌رگه‌هێ نوكه له‌شكره‌كێ رێخستییه شاشیان ناكه‌ت! لێ هنده‌ك مرۆڤێن هه‌ین ب ناڤ و جلێن پێشمه‌رگه‌ی دچنه كه‌له‌پیرتی و مرۆڤان دكوژن وێنه و به‌لاڤه دكه‌ن! ئه‌م دزانین پێشمه‌رگه یێ هاتیه مه‌شق و راهێنانكرن ل سه‌ر ره‌وشته‌كێ پاقژ. و نه كارێ كوردانه ب ڤی ڕه‌نگی دوژمنێ خوه بكوژیت.
