په‌یامێن نه‌ڤرۆزێ
به‌رى هه‌ر تشتى نه‌ڤرۆزا هه‌وه پیرۆز بیت و هیڤى خازم هه‌وه ب خۆشى و شادى ده‌رباز كربیت و هه‌موو رۆژێن هه‌وه نه‌ڤرۆز بن.
نه‌ڤرۆزا ئه‌ڤ ساله ژ هه‌موو نه‌ڤرۆزێن بوورى یا جوداتربوو نه ژبه‌ر به‌فر و باران و هۆڕه‌بایێن بهێن ل كوردستانیان ته‌نگ كرین د پیرۆزترین جه‌ژن دا به‌لكو ژبه‌ر كاودانێن چاره‌نڤیسازێن ئه‌ڤرۆ كوردستان تێدا ده‌رباز دبیت. ل چ گه‌هێن دیرۆكێ وه‌كو نها كوردستان ب سایا لایه‌نێن سیاسى و ل هه‌ڤ نه‌كرنا وان ل سه‌ر سێڕیانا ئاسۆیه‌كا شێلۆتر ڕانه‌وه‌ستایه هه‌ر ژ ده‌ما كێرا ساكیس-پیكۆى دلێ وێ بۆ چار پارچان كه‌ركرى و ئاگرێ ناكۆكیێ به‌ردایه ناڤ ته‌ڤنێ جڤاكێ كوردستانێ.
وه‌ك چه‌وان هه‌رێما كوردستانێ بۆیه مێرگا سۆرپرایزانێن جه‌ڕگبڕ و ده‌ستهه‌ڵات ب هه‌موو شیانێن خوه‌ڤه تنێ سۆزێن خرش دده‌ت بۆ چاره‌سه‌ركرنا ئاریشێن به‌رووكا خه‌لكێ هه‌رێما كوردستانێ گرتین، ئه‌و ئاریشێن ژ كۆل فه‌همیا ده‌ستهه‌ڵاتێ په‌یدا بووین و بووینه په‌ندى زه‌مانه ب تایبه‌ت دبیاڤێ حه‌ڕاج و فه‌رهوود كرنا سه‌ر عه‌رد و بن عه‌ردێن ڤى وه‌لاتێ ژ هه‌وێن جینۆساید و ب عه‌ره‌بكرنێ رزگار بووى!! ب هه‌مان ڕه‌وتى مینا كولتۆره‌كى شۆرى ناڤ لایه‌نێن سیاسى بۆیه و ته‌ڤ ب ڤێ په‌ژیكێ(په‌ژیكا سۆزدانێ و بجه نه‌ئینانێ) نه‌خوه‌ش كه‌فتنه ئه‌و ژى كه‌فتنه سه‌ر رێبازا سۆزدانێن خرش.
د ئێڤار نه‌ڤرۆزا كوبار دا لایه‌نێن سیاسى دووباره خرارێن سۆزێن خوه رابه‌رى گه‌لێ كوردستانێ كرن، ته‌ڤ ژى ل سه‌ر ل هه‌ڤكرن و پاراستنا كۆده‌نگیا كوردان ل هه‌مبه‌ر ڤان كاودانێن ئاڤس ب روودانێن چاره‌نڤیساز. به‌لێ بۆچى كه‌یفا مه ب ڤان سۆزان ناهێت و باوه‌ریێ ل جه‌م مه دروست ناكه‌ت؟(هه‌ر رۆژه‌كا ئه‌ڤ سۆزه ببن ڕاستى، ئه‌و رۆژ دێ بیته نه‌ڤرۆزه‌كا دى)، هه‌لبه‌ت پرێزا سۆزێن نه‌ڤرۆزێن بوورى وێ باوه‌ریێ ل جه‌م تاكێ كوردستانى دروست دكه‌ن كو سۆزێن لایه‌نێن سیاسى بلقێن كانى بهارییانه و ژ فڕا مریشكێ زێده‌تر ناچن!! د سه‌ر ڤێ سوسره‌تێ ڕا مه هیڤیه دارا سۆزێن لایه‌نێن سیاسى و حكومه‌تا هه‌رێمێ ئه‌ڤێ جارێ بهێته به‌رى و په‌یام ببنه ڕاستى دا پاپۆڕا هیڤیێن مه یێن د ده‌ریا خه‌باتێ دا بگه‌هته كه‌نارێ ده‌وله‌تبوونێ و دوماهیك ب ستڤانكێ تراجیدیێن مه بهێت.
نه‌ڤرۆز په‌یامه و په‌یامێن ڤه‌ژاندنا هه‌ر وه‌رار و لڤینه‌كێیه بلا ئه‌م ژى د به‌رپرسیارییا ئه‌ڤێ رۆژێ دا بین، ب گه‌رمیا هه‌ستێن كاوه‌ى و ته‌ڤایا شه‌هیدێن كوردستانێ پێشوازیا پێشهاته‌یێن ل پێشیا مه بكه‌ین و نه‌خشێ سایكس-پیكۆى كێشاى تۆر بهاڤێژینه به‌ر سۆلتان و شاه و میرێن ب هه‌موو شیانێن خوه‌ڤه گیانێ دووبه‌ره‌كیێ د ناڤ مه دا دچینن و وان كه‌س و لایه‌نان تڕۆ بكه‌ین یێن هه‌تا ئه‌ڤرۆ ده‌ست كیسیێ بۆ داگیركه‌ران دكه‌ن ئه‌ڤجا لبن چ ناڤ بن.
نه‌ڤرۆزا 2017
