په‌یكه‌ره‌كی دێ بۆ قوتابخانه‌كا دهۆكێ چێكه‌ت
ئه‌ڤرۆ، رێوار محه‌مه‌د ره‌شید:
ئالان ئدریس مسته‌فا، په‌یكه‌رسازه‌كێ پارێزگه‌ها دهۆكێ یه د دیداره‌كێ دا بۆ به‌رپه‌رێ هونه‌ری یێ رۆژناما ئه‌ڤرۆ دیار كر كو ئه‌و نوكه یێ به‌رهه‌ڤیان دكه‌ت بۆ چێكرنا په‌یكه‌رێ (خانی له‌پ زێرین) بۆ قوتابخانا (خانی له‌پ زێرین) ل پارێزگه‌ها دهۆكێ و گۆت: “ئه‌ز دێ ب شێوه‌یه‌كێ خوه‌به‌خش ڤی په‌یكه‌ری بۆ قوتابخانا ناڤهاتی چێكه‌م، به‌لێ پێدڤی و كه‌ره‌ستێن په‌یكه‌ری دێ ژ لایێ قوتابخانا ناڤهاتی ڤه بۆ من هێنه دابینكرن”.
ناڤهاتی ئاماژه دا وێ چه‌ندێ كو هه‌ر كه‌سه‌كێ ناڤداربیت و خزمه‌ت د هه‌ر بواره‌كێ ژیانێ دا كربیت وی دڤێت ب رێیا چێكرنا په‌یكه‌ره‌كی خزمه‌تا وی بكه‌ت، به‌لێ هه‌تا نوكه وه‌كو پێدڤی پشته‌ڤانی ژ لایێ جهێن په‌یوه‌ندیدار ڤه ل وی نه‌هاتیه‌كرن كو بشێت كارێن مه‌زن یێن هونه‌رێ په‌یكه‌رسازیێ ئه‌نجام بده‌ت و گۆت: “هه‌تا نوكه من چه‌ندین په‌یكه‌ر ب شێوه‌یه‌كێ خوه‌به‌خش چێكرینه، ئه‌ڤه دده‌مه‌كی دایه پشتی ل سالێن بووری من پشكا شێوه‌كاری تایێ په‌یكه‌رسازیێ ل په‌یمانگه‌ها هونه‌رێن جوان ل دهۆكێ ب دووماهی ئینایی نوكه ژی ئه‌ز قووتابیێ قووناغا دویێ مه ل پشكا شێوه‌كاری یا كۆلیژا زانستێن مرۆڤایه‌تی ل زانكۆیا دهۆك و دێ ب شێوه‌یه‌كێ ئه‌كادیمی ل سه‌ر كارێ خوه یێ هونه‌ری یێ به‌رده‌وام بن بۆ خزمه‌تكرنا پارێزگه‌ها دهۆكێ”.
ئالانی خویا كر كو ئه‌و چوجاران نه‌شێت ژ كارێ په‌یكه‌رسازیێ دوور بكه‌ڤیت، چونكو په‌یكه‌ر بوویه پشكه‌كا گرنگ ژ ژیانا وی و گۆت: “هه‌تا نوكه چێكرنا په‌یكه‌ران بتنێ خه‌لاتێن رێزلێنانێ پێشكێشی من كرینه و ئه‌و خه‌لات وه‌كو بیرهاتن ل ده‌فمن ماینه.
