په‌یوه‌ندیێن ئیرانێ و ئازه‌ربه‌یجانێ ئالۆز دبن
ئەڤرۆ
سەرجان مەحمود:
جیحون بایرامۆڤ وه‌زیرێ ده‌رڤه یێ ئازه‌ربه‌یجانێ د داخۆیانیه‌کێ دا راگه‌هاند کو ده‌وله‌تا ئیرانێ ب رێیا فرۆکێن شه‌ڕی سنورێن وان به‌زاندینه و گۆت: (ده‌وله‌تا ئیرانێ ئه‌ڤ ده‌مه‌که قانوونێن نێڤده‌وله‌تی بنپێ دکه‌ت و فرۆکێن شه‌ڕی یێن ئیرانێ ل سه‌ر سنۆرێن مه دگه‌ڕن و دڤێت ئیران رێزێ ل سه‌روه‌ریا مه بگریت و ده‌ست ژ ئالۆزکرنا په‌یوه‌ندیێن دو ئالی به‌رده‌ت).
ناڤهاتی هه‌روه‌سا راگه‌هاند ژی کو ئه‌ڤ ده‌مه‌که ئیران هه‌م ل سه‌ر ئه‌ردی هه‌م ژی ل ئه‌سمانی به‌رده‌وام بزاڤا دروستکرنا ئالۆزیان دده‌ت و گۆت: (هه‌ری دویماهیێ ژی به‌ری فرۆکێن شه‌ڕی یێن ئیرانێ سنۆرێ مە ببه‌زینن، ده‌وله‌تا ئیرانێ دیسان ل سه‌ر سنورێ مه مانۆره‌‌کا سه‌ربازی ئه‌نجام دا و بۆ ئەگەرێ هندێ کو هێزێن مه بکه‌ڤنە د ئاماده باشیێ دا، هه‌ر چه‌نده مه نه‌رازیبوونا خۆ دیار کر، لێ هه‌تا نها بەرپرسێن ئیرانێ ل دۆر وان کریارێن خوە چو داخۆیانیەک نەداینە).
