په‌یوه‌ندیێن خێزانێ ل سه‌یرانان موكمتر دبن
ئه‌ڤرو، هه‌یفا دوسكی:
پتریا خێزانان گازنده ژ ساریا په‌یوه‌ندیێن خێزانی هه‌یه و دبێژن ته‌كنولوژیایێ كارتێكرنه‌كا نه‌رێنی ل په‌یوه‌ندیان كریه و پتریا خێزانان د جڤاكێ مه دا ژ ئێكدو دوور كه‌فتینه، لێ ئه‌م دشێین ب رێیا سه‌یرانێن ب كوم جاره‌كا دی چاره‌سه‌ریا په‌یوه‌ندیێن خێزانی بكه‌ین.
ئه‌ڤین عه‌بدلره‌حمان سه‌میانا خێزانێ یه و به‌حس ل هندێ دكه‌ت كو ئه‌ڤه پتری ساله‌كێ یه ئه‌وێ گه‌له‌ك ژ كه‌س و كارێن خوه نه‌دیتینه، بتنێ ب رێیا تورێن جڤاكی ل گه‌ل وان دئاخڤن و دبێژیت: دلێن مه بو ئێك یێن توند بووین و حه‌ز و ڤیانا مرۆڤانی نه‌مایه ل ده‌ڤ گه‌له‌ك ژ كه‌سان، ژبه‌ر هندێ ئه‌م پێدڤی ب لێ زڤرینه‌كا په‌یوه‌ندیێن خێزانی و سه‌یرانێن ب كومین و ئه‌ڤه رێیه‌كا باشا چاره‌سه‌ریێ یه كو جاره‌كا دی ل ئێكدو ڤه‌گه‌رین.
سه‌لیم نعمه‌ت سه‌میانێ خێزانێ یه و ئێكسه‌ر گازندێ دكه‌ت كو ژیارنا رۆژانه دیسا مژوولیا خه‌لكی و خێزانان ب تورێن جڤاكی ڤه بوویه سه‌ده‌ما دل ره‌قی و ڤه‌قه‌تیانه‌كا مه‌زن دناڤ خێزانا و مرۆڤانیێ دا و گۆت: ژبه‌رهندێ یا پێدڤیه ئه‌م خوه ل ئه‌ڤێ چه‌ندێ بكه‌ینه خۆدان و ئێكه‌م پێنگاڤ ئه‌و دلمانیا ژ ڤان تورێن جڤاكی په‌یدا بووی چاره‌سه‌ر بكه‌ین و ب رێیا رۆنشتن و سه‌یران و ده‌ركه‌فتنێن پێكڤه دبیت ئه‌م بشێین گه‌له‌ك ژ ڤی بابه‌تی چاره بكه‌ین، له‌ورا یا پێدڤیه ئه‌م بزاڤێ بكه‌ین په‌یوه‌ندیێن خوه ب ڤه‌گه‌رینین و ل كه‌س و كارێن خوه بزڤرینه‌ڤه.
نیهاد به‌هجه‌ت خۆدان خێزانه و فه‌رمانبه‌ره و دبێژیت: برایێ من ل تاخه‌كێ دهوكێ تووشی جه‌لتا دلی بوو و جیرانێن وی ئاگه‌ه ژێ نه‌بوو هه‌تا دو رۆژ ب سه‌رڤه چووین و ب كوته‌ك ئه‌م شیاین چاره‌سه‌ریا وی بكه‌ین و ئه‌ڤه ژی هه‌موو ڤه‌دگه‌ریته وێ ساریا په‌یوه‌ندیێن جڤاكی بتایبه‌ت دناڤ هنده‌ك تاخێن دهوكێ دا ل سالێن درێژ جیرانێن هه‌ڤن و هێشتا ناڤێن ئێكدو نزانن.
نه‌وال ئیسماعیل چالاكڤانه د وارێ جڤاكی دا به‌حس ل وێ یه‌كێ كر كو خێزان بنگه‌هێ ژیانا هه‌ر كه‌سه‌كی یه د ڤێ ژیانێ دا، به‌لێ زێده‌بوونا تورێن جڤاكی بوویه ئه‌گه‌رێ لاوازیا په‌یوه‌ندیێن خێزانی دیسا ژ ئێك دوور كه‌فتن گه‌له‌ك په‌یدا بوویه ژبه‌ر هندێ سه‌یرانێن ب كوم رێیه‌كا باشا چاره‌سه‌ریێ یه كو جاره‌كا دی خێزان ل ئێك بڤه‌گه‌رن و گوت: ئه‌و ساریا په‌یوه‌ندیێن خێزانی ئه‌م دشێین چاره‌سه‌ر بكه‌ین و بڤی ره‌نگی دێ گه‌له‌ك ژ ئاریشێن جڤاكی یێن ژ ئه‌گه‌رێ دوور كه‌فتنێ په‌یدا بووین چاره بن.
نه‌والێ ئه‌و چه‌نده ژی دیار كر كو هنده‌ك ئاریشه ل ڤان سالان یێن د خێزانان دا په‌یدا بووین، چۆنكی خێزانان ئاگه‌ه ژ ره‌وشا ئێكدو نینه و هه‌تا چاڤ پێ نه‌رابوون و كه‌رب و كین و گۆتگوتكێن بێ بنه‌ما و گه‌له‌ك ئاریشێن دی كو خێزان دناڤدا دنالن و هه‌تا ئه‌و ڤه‌قه‌تیانا دناڤ زاروك و دایك و بابا ژی بوویه سه‌ده‌ما گه‌له‌ك نه‌خوشی و ئازاران بو خێزانێ و گۆت: ژبه‌ركو یا پێدڤیه ئه‌م ل سه‌ر كار بكه‌ین و بزاڤێ بكه‌ین خێزان به‌ر ب سه‌یرانێن ب كوم بچن داكو ئه‌م ژ ڤان ئاریشا قورتال ببین و زێده‌تر قوربانیا نه‌ده‌ین ژ ڤێ ڤالاتیا په‌یدا بووی ژ مرۆڤانی و خێزانێ.
