په‌یوه‌ندیێن نوكه ل سه‌ر بنه‌مایێ به‌رژه‌وه‌ندیانه
هه‌ولێر، قائید میرۆ:
ل چه‌ند رۆژێن بۆری هژماره‌كا حاله‌تێن كوشتن و خوكوشتنێ هاتینه تۆمار كرن، ڤه‌كۆله‌ره‌كێ جڤاكی ژی ئاشكرا كر، زۆربوونا توندۆتیژیێ و دیاردا كوشتنێ گرێدایی ره‌وشا جڤاكی و ده‌روونیا خه‌لكێ كوردستانێ یه و دبێژیت، په‌یوه‌ندیێن ئه‌ڤی سه‌رده‌می ل گوره‌ی به‌رژه‌وه‌ندیانن و هه‌رده‌مێ به‌رژه‌وه‌ندی كه‌ڤتنه د مه‌ترسیێ دا بڕیارێن شاش دهێنه دان.
به‌هێز سابر، ڤه‌كۆله‌رێ جڤاكی بۆ رۆژناما ئه‌ڤرۆ دیار كر، هه‌ر ده‌مێ د جڤاكه‌كی دا ئاریشه به‌ر ب زێده‌بوونێ چون په‌یوه‌ندیێن جڤاكی دێ لاواز بن و رێزگرتن و كاریگه‌ری نامینیت دناڤ خێزانێ دا، زۆر جارا دهێته گۆتن ده‌مێ به‌رژه‌وه‌ندی دكه‌ڤنه د ئاسته‌كێ خراب دا ئاریشه په‌یدا دبن و ئه‌ڤه دبیته ئه‌گه‌رێ زێده‌بوونا گڤاشتنێن ده‌روونی ل سه‌ر مرۆڤی، د ئه‌ڤی ده‌می دا تشته‌ك نامینیت كاریگه‌ری ل سه‌ر په‌یوه‌ندیێن جڤاكی هه‌بیت و گۆت: (بتنێ به‌رژه‌وه‌ندی دهێته به‌رچاڤ وه‌رگرتن و زۆر جاران ژی دگه‌هیته ئاسته‌كی مه‌ترسی ل سه‌ر به‌رژه‌وه‌ندیێن كه‌سه‌كی په‌یدا دبن و دبیته ئه‌گه‌ر بۆ ئه‌نجامدانا تاوانان).
به‌هێز گۆتژی: (جڤاكێ مه جڤاكه‌كێ گه‌رمه و له‌زێ دكه‌ت د بڕیاردانێ دا و زوو توڕه دبیت و كارڤه‌دان په‌یدا دبن ئه‌ڤه ژی زۆر جاران دبیته ئه‌گه‌رێ كوشتنێ و خوكوشتنێ، چونكی ده‌مێ گڤاشتنێن ده‌روونی زێده دبن دبیته پالده‌ر بۆ ڤێ چه‌ندێ رێزگرتن و ڤیان نه‌مینیت ل هه‌مبه‌ر ئێك ده‌مێ رێزگرتن و ڤیان نه‌ما دێ توندۆتیژی زێده بیت).
ڤه‌كۆله‌رێ جڤاكی ئاماژه بڤێ چه‌ندێ ژی كر، په‌یوه‌ندیێن نوكه دناڤبه‌را مرۆڤان ب گشتی و هه‌تا په‌یوه‌ندیێن دناڤا خێزانێ ژی ل سه‌ر ئاستێ به‌رژه‌وه‌ندیان ب ڕێڤه دچن، له‌وڕا ژی ده‌مێ به‌رژه‌وه‌ندیێن ئێكی دكه‌ڤنه د مه‌ترسیێ دا، كارڤه‌دان په‌یدا دبن ژلایێ ئه‌ڤی كه‌سی ڤه و كاره‌سات په‌یدا دبن و گۆت: (هه‌موو ئه‌و توندۆتیژیا دهێته كرن ژ ئه‌نجامێ نه‌بوونا ڤیانێ یه دناڤبه‌را جڤاكی دا، هه‌ر په‌یوه‌ندیه‌كا ل سه‌ر بنه‌مایێ به‌رژه‌وه‌ندیان ژی دهێته چێكرن ئه‌نجام دێ رۆژه‌كێ هه‌ر ب دووماهی هێت و هنده‌ك جاران ژی ب كاره‌سات و تاوان ب دووماهی دهێت، ژبه‌ركو به‌رژه‌وه‌ندی حوكمی دكه‌ت، زۆر جاران ژی ده‌مێ به‌رژه‌وه‌ندی دكه‌ڤنه مه‌ترسیێ دا مرۆڤ بڕیارا كوشتنا كه‌سێن نێزیكی خوه ژی دده‌ت).
ڤه‌كۆله‌ر به‌هێز گوتژی: (روودانێن ئه‌ڤ ساله و رۆژێن بۆری راستیا ئه‌ڤێ چه‌ندێ دیار كریه و چه‌ندین حاله‌ت ب تنێ ئه‌ڤ ساله هاتینه تۆمار كرن كوڕی باب كوشتیه و بابێ كوڕ و برایێن خوه كوشتینه و بای خوشك كوشتیه، له‌ز كرن د بڕیارێ دا و سه‌ره‌ده‌ری كرن ل گوره‌ی به‌رژه‌وه‌ندیان تاوان دووڤدا دهێن و نابیت مرۆڤ ل گوره‌ی به‌رژه‌وه‌ندیێن خوه سه‌ره‌ده‌ریێ ل گه‌ل به‌رامبه‌ری خۆ بكه‌ت).
