په‌یوه‌ندیێن گه‌شتیاری د ناڤبه‌را باكور و باشورێ كوردستانێ دا دهێنه خورتكرن
ئه‌ڤرۆ، مه‌حمود نهێلی:
شانده‌كێ كۆمپانیێن گه‌شتیاری یێن جوله‌مێرگێ و وانێ ل باكورێ كوردستانێ سه‌ره‌دانا ناحیا دێره‌لۆكێ كر و ل هاڤینگه‌ها ئاڤا شین ژلایێ رێڤه‌به‌رێ ناحیا دێره‌لۆكێ و كارگێڕیا سه‌یرانگه‌هێ ڤه پێشوازی لێ هاته كرن.
غازی عزه‌ت، رێڤه‌به‌رێ ناحیا دێره‌لۆكێ ب وه‌كاله‌ت بۆ رۆژناما ئه‌ڤرۆ دیار كر، ب مه‌ره‌ما هه‌ماهه‌نگیێ و ئینانا گه‌شتیاران ژ باژێرێن باكورێ كوردستانێ بۆ پارێزگه‌ها دهۆكێ و ده‌ڤه‌را ئامێدیێ و خورتكرنا بزاڤا گه‌شتیاری و بازرگانی، وان پێشوازی ل هه‌ژماره‌كا خودانێن كۆمپانیێن گه‌شتیاری و بازرگانێن باژێرێن وانێ و جوله‌مێرگێ یێن باكوورێ كوردستانێ كرن.
رێڤه‌به‌رێ ناحیا دێره‌لۆكێ ب وه‌كاله‌ت گۆت: “ڤی شاندی سه‌ره‌دانا كۆمه‌لگه‌ها ئاڤا شین یا گه‌شتیاری ل گه‌لیێ شێرانه كر و ب جوانی و سه‌رنجڕاكێشیا دیمه‌نێن ڤێ ده‌ڤه‌رێ شاد و خوه‌شحال بوون”.
ناڤهاتی ته‌كه‌ز ژی كر كو شاندێ كۆمپانیێن گه‌شتیاری سۆزدایه وان كو هه‌ماهه‌نگیێ د ناڤبه‌را باكورێ كوردستانێ و ده‌ڤه‌رێ دا دروست بكه‌ن، ئه‌ڤه ژی د ده‌مه‌كی دایه پشتی كو ژلایێ رێڤه‌به‌رێ كۆمه‌لگه‌ها ئاڤا شین ڤه پره‌ك هاتیه درستكرن.
