په‌یڕه‌و وپڕوگرامێ ئاماده‌یا گه‌شت وگۆزاری یێ سالێن حه‌فتیێ یه .!
ئه‌ڤرۆ، عه‌دنان رێكانی:
ده‌مێ به‌حسێ كه‌رتێ گه‌شت وگوزارێ دهێته كرن بیێ دودلێ هزر وبیرێن مرۆڤێ بۆ هێزه‌كا ئابوری یا به‌رده‌وام دچیت، كو دبیت ل گه‌له‌ك وه‌لاتێن جیهانێ یا بوویه بڕبڕكا خوراگریا هنده‌ك وه‌لاتان و پشتبه‌ستنا ژیان وژیارا وان وه‌لاتان ب پلا ئێكێ ل سه‌ر دهێته كرن بۆ نمونه (توركیا ) و ( لوبنان ) كو ژی وه‌لاتێن ده‌وروبه‌رێن هه‌رێما كوردستان ونێزیكی مه‌نه، پڕانیا هێزا ئابووری یا هه‌ردو وه‌لاتان ل سه‌ر كه‌رتێ گه‌شت گۆزاریه.
لدۆر ڤی بابه‌تێ رێڤه‌به‌رێ ئاماده‌یا گه‌شت گۆزاری ل دهوكی مه‌هدی شكری چیچو تایبه‌ت بۆ رۆژناما ئه‌ڤرۆ گۆت: ( مه گه‌له‌ك بزاڤ كرینه كو كاره‌كێ هه‌ره‌باش بۆ ڤێ ئاماده‌یێ بكه‌ین، و چه‌ندین جارا ب نڤیسارێن فه‌رمی ل گه‌ل رێڤه‌به‌ریا گشتی و هه‌تا دگه‌هیته وه‌زاره‌تا په‌روه‌ردی ژی، به‌لێ بمخابنی ڤه هه‌تا نوكه كه‌سه‌كی خوه ل مه نه‌كریه خودان و لدویڤ گازیا مه نه‌هاتینه، بتنێ دبێژن سۆزبیت).
رێڤه‌به‌رێ ئاماده‌یا گه‌شت وگوزاری هه‌روه‌سا دیاركر، هه‌تا ل سه‌ر مالپه‌رێ فه‌رمیێ وه‌زاره‌تا په‌روه‌ردێ ژی مه كونتاك ل گه‌ل وه‌زیرێ په‌روه‌ردێ كریه و پرسیار و ئاریشێن ئاما ده‌یا گه‌شت و گۆزاری ئاراسته‌ی وی كرینه به‌لێ هه‌تا نوكه چو به‌رسڤ بۆ نه‌هاتیه دان..
ژئالیه‌كێ دیتر ڤه ماموستا (كیڤی سه‌لیم تاهر ) دبێژیت، پرۆگرامێن ئاماده‌یا گه‌شت و گۆزاری یێن سالێن حه‌فتیێ نه، هێشتا قۆتابی ل سه‌ر وان پڕتوكان دخوینن یێن به‌ری 40 هه‌تا 50 سالا هاتینه دانان، ل ده‌مه‌كێ دونیا پێشكه‌فت و پڕانیا وان پێزانینا هه‌می هاتینه گۆهورین وه‌كی به‌رێ نه‌ماینه، بوو نمونه به‌رێ نوكه كارێ ئێوتێلگه‌رێ ل سه‌ر تۆمارا دهاته كرن، و ژۆێن نڤستنێ دهاتنه گرتن، به‌لێ نوكه ته‌كنولوجیا پێشكه‌فتی ل سه‌ر تۆڕا ئه‌نترنێتی و تویێ ل مال دێ ئۆتێلی بۆ خوه گری، ئانكو وه‌كی به‌رێ نه‌مایه دڤێت په‌یڕوه و پڕوگرامێ قوتابی ژ ئالیێ حكومه‌تێ ڤه بهێنه گوهورین، چونكی پێزانینێن نوو هاتیه مه‌یدانێ دڤێت قۆتابی ل گۆره‌ی وان پێزانینێن نوو بهێته په‌روه‌رده‌ركرن و زانینان وه‌ربگریتن.
دیاره ده‌مێ حكومه‌تا هه‌رێما كوردستانێ بڤێت كه‌رتێ گه‌شت وگۆزاری ل هه‌رێما كوردستانێ پێشڤه‌ببه‌ت، یان بكه‌ته ئێك ژ ژێده‌رێن وه‌رار و پێشڤه‌برنا ژیان وژیارا وه‌لاتیان ل هه‌رێمێ و ببیته سكته‌رێ دویێ پشتی سه‌كته‌رێ په‌رتۆلێ و پشتبه‌ستنا ئابوری ل سه‌ر بكه‌ت، دڤێت گرنگه‌یكا ته‌مام ب ژێده‌رێن په‌یداكرن و رێكخستنا و برێڤه‌برنا ڤی كه‌رتێ گرنگ بكه‌ت، ئه‌وژی بڕێیا په‌یداكرنا كادره‌كێ به‌رهه‌ڤكری و پرۆفیشنال ل گه‌رتێ گه‌شت وگوزای، ئه‌ڤه چه‌ندی بێ گۆمان دێ ئاماده‌یی و په‌یمانگه و زانكویێن تایبه‌ت ب گه‌شت وگوزاێ هه‌بن.
ل دوماهیێ ماموستا مه‌هدی چیچوی گۆت: گرنگی دان ب ئاماده‌یا گه‌شت وگۆزاری گرنگی دان ب كه‌رتێ گه‌شت وگوزاری كو چه‌ندین جاران حكومه‌تا هه‌رێما كوردستانێ دووپاتكریه كو دڤێت گرنگه‌یه‌كا مه‌زن بڤی كه‌رتی بهێته دان، و شارستانیه‌تا كوردستانێ بۆ خه‌لكه‌كێ ببیانی بهێته به‌رچاڤكرن، ب رێیا كه‌رتێ گه‌شت و گوزاری و جه وشینوار و دیرۆكا كوردستان بزانن و ببینن، ئانكو دڤێت مفا ب هه‌می رێیان ژ ڤی كه‌رتی بهێته وه‌رگرتن، نه بتنێ ئابوری به‌لكی پێناسه‌كرنا كولتور و ره‌وشه‌نبیر و دیرۆكا ملله‌تێ كورد بهێته به‌رچاڤكرن.
په‌یمانگه‌ها گه‌شتو گۆزاری ل هه‌رێما كوردستانێ ل سالا 1990 ل سه‌ر ده‌ستێن هژرماه‌كا ماموستایێن هێژا هاتیه دامه‌زراندن كو ئێكه‌مین په‌یمانگه‌ه بوویه، لێ بمخابنی ل جهێ پوتركرن و گرنگیه‌كت مه‌زنتر پێ بهێته كرن، ب بڕیاره‌كا وه‌زاره‌تێ ژ په‌یمانگه‌هێ كرنه ئاماده‌یی و بۆ زانین هه‌تا نوكه وێ په‌یمانگه‌هێ (ببورن) وێ ئاماده‌یێ ئاڤاهیێ خوه یێ تایبه‌ت نینه، كو قوتاببێن وێ خواندنا خوه تێدا ده‌رباز بكه‌ن.
