په‌یڤدارێ به‌رێ یێ ئاكپارتیێ: نابیت ئاكپارتی ل گه‌ل MHP وHDP هه‌ڤپه‌یمانیێ ساز بكه‌ت
ب، سه‌رجان مه‌حمود:
حسێن چه‌لیك وه‌زیر و په‌یڤدارێ به‌رێ یێ ئاكپارتیێ د داخۆیانیه‌كێ دا بۆ ده‌زگه‌هێن راگه‌هاندنا توركیا دیار كر كو دروستكرنا هه‌ڤپه‌یمانیا ل گه‌ل پارتا بزاڤا نه‌ته‌وه‌په‌ر‌ست (مه‌هه‌پێ) گه‌له‌ك شاشه ژ به‌ر كو MHP پارته‌كا نه‌ته‌وه‌په‌ر‌سته و ئه‌ڤ پارته نه‌شێت د چارهسهركرنا پرسێن توركیا دا ببیته هه‌ڤپه‌یمانا چاره‌سه‌ریێ و گۆت: (ده‌مێ مه پارتا خوه ئاڤاكری مه‌ره‌م ئه‌و بوو كو ئه‌م ببینه پارتا هه‌موو باوه‌ریان و نه‌ته‌وه‌یێن جودا یێن توركیا و ژبه‌ر هندێ ژی د ئێكه‌م هه‌لبژارتنێن وی ده‌می ل توركیا دا پارتا مه شیا ل هه‌موو باژێرێن توركیا ببیته پارتا ئێكێ و خه‌لكی پشته‌ڤانی ل مه كر، لێ نها سازكرنا هه‌ڤپه‌یمانیا ل گه‌ل پارتا بزاڤا نه‌ته‌وه‌په‌ر‌ست بوویه ئه‌گه‌رێ هندێ كو وه‌لاتیێن كورد خوه ژ ئاكپارتیێ دوور دكه‌ن و ئه‌ز ژ رۆژا ده‌ستپێكێ ڤه ل دژی ڤێ هه‌ڤپه‌یمانیێ مه و د هه‌مان ده‌می دا هه‌كه ئاكپارتی ل گه‌ل هه‌ده‌پێ ژی هه‌ڤپه‌یمانیێ ساز بكه‌ت دێ ئه‌ڤ هه‌ڤپه‌یمانی ژی گه‌له‌ك شاش بیت ژ به‌ر كو هه‌ده‌په ژی پارته‌كا جودایه ل توركیا و هه‌ده‌په نه پارتا هه‌موو توركیا یه).
حسێن چه‌لیك د پشكه‌كا دی یا ئاخڤتنا خوه دا ژی راگه‌هاند كو مخابن نها ل توركیا قه‌یرانا ئابووری هه‌یه و د هه‌مان ده‌می دا سیاسه‌تا ئینكاركرنا كوردان ژی به‌رده‌وام دكه‌ت و گۆت: (دڤێت هه‌ر كه‌س بزانیت كو ب ئینكاركرنا كوردان كه‌س نه‌شێت كوردان یان ژی عه‌له‌ویان ژناڤ ببه‌ت، ژ به‌ر كو كورد هه‌نه و دێ مینن هه‌روه‌سا عه‌له‌وی ژی هه‌نه و دڤێت ب رێیا دیموكراسیێ، دادوه‌ریێ و مافێن مرۆڤی پرسێن توركیا بهێنه چاره‌سه‌ر‌كرن و نابیت ژ به‌ر هزرێن خوه كه‌س بهێته سزادان).
په‌یڤدارێ به‌رێ یێ ئاكپارتیێ هه‌روه‌سا راگه‌هاند ژی كو ل توركیا هه‌ر ئالیه‌ك دیموكراسیێ ژ بۆ خوه و ئالیگرێن خوه دڤێت و نه ئۆپۆزسیۆن و نه ژی ده‌ستهه‌لات د ره‌شا نها دا كار بۆ چارهسهركرنا هه‌موو پرسێن توركیا ناكه‌ن و گۆت: (هه‌ر ئالیه‌ك ل دووڤ داخوازیێن خوه بزاڤێ دكه‌ت و به‌رنامێن وان یێن بۆ چارهسهركرنا پرسێن نها یێن توركیا نینن و مخابن د ره‌وشا نها دا د وارێن دیموكراسیێ، مافێن مرۆڤی و ئازادیان دا گه‌له‌ك كێماسی و لاوازی هه‌نه و ل گه‌ل لاوازیێن ده‌ستهه‌لاتێ مخابن چو به‌رنامێن ئۆپۆزسیۆنێ ژی بۆ چارهسهركرنا پرسێن گرنگ یێن توركیا نینن و ئۆپۆزسیۆن كارێن باش یێن ده‌ستهه‌لاتێ ژی نابینیت و ل دژی هه‌ر كریاره‌كا حوكمه‌تێ ده‌ردكه‌ڤیت و ئه‌و یه‌ك ژی سیاسه‌ته‌كا شاشه).
ناڤهاتی د دووماهیا ئاخڤتنا خوه دا ئه‌و یه‌ك ژی دیار كر كو پارتێن ئۆپۆزسیۆنێ نها وه‌سا هزر دكه‌ن هه‌كه هه‌لبژارتن بهێنه كرن ئه‌و دێ شێن ئاكپارتیێ ژ ده‌ستهه‌لاتێ دوور كه‌ن، لێ د راستی دا باوه‌ریا خه‌لكی ب ئۆپۆزسیۆنێ ژی نینه، چونكو خه‌ما مه‌زن یا ئۆپۆزسیۆنێ دورخستنا ئاكپارتیێ ژ ده‌ستهه‌لاتێ یه، د ده‌مه‌كێ دا كو وان بخوه ژی هه‌تا نها چو پرۆژه‌یه‌ك بۆ چارهسهركرنا پرسێن توركیا پێشكێشی رایا گشتی نه‌كرینه.
