پوتین ب فەرمی داخوازەکا ئیرانێ رەت دکەت
ئەڤرۆ:
دەزگەھێن راگەھاندنا روسیا دیار کرن کو محەمەد باقر قالیباف سەرۆکێ پەرلەمانێ ئیرانێ نامەکا تایبەت یا عەلی خامنەیی رێبەرێ شورەشا ئیسلامی یا ئیرانێ ل گەل خوە بریە و دخواست رادەستی ڤیلادەمیر پوتینێ سەرۆکێ روسیا بکەت، لێ وەزارەتا دەرڤە یا روسیا داخواز ژ سەرۆکێ پەرلەمانێ ئیرانێ کریە کو رێنمایێن تایبەت ب کۆرۆنایێ بجە بکەت و پشتی دەربازکرنا چەند رۆژان د گەرەنتینێ دا ئەو دشێت ناما خامنەیی رادەستی پوتین بکەت، لێ سەرۆکێ پەرلەمانێ ئیرانێ ئەو یەک قەبوول نەکریە و ژ بەر ھندێ ژی پوتین بەرھەڤ نەبوویە ل گەل قالیباف کۆمبیت.
ئەو یەک د دەمەکێ دایە کو حەفتیا بۆری محەمەد جەواد زەریف وەزیرێ دەرڤە یێ ئیرانێ سەرەدانا روسیا کر و ل گەل وەزیرێ دەرڤە یێ روسیا و بەرپرسێن دی یێن وی وەلاتی کۆمبوو، لێ ھەتا نھا دیار نینە کا بۆچی وەزیرێ دەرڤە یێ ئیرانێ ناما تایبەت یا رێبەرێ شورەشا ئیسلامی یا ئیرانێ ل گەل خوە نەبریە روسیا، ھندەک چاڤدێرێن سیاسی ژی دیار دکەن کو ژ بەر ناکۆکیێن رۆحانی ل گەل خامنەیی ل دۆر دەستپێکرنا دانوستاندنان ل گەل ئەمریکا، رێبەرێ شورەشا ئیسلامی دڤێت ب رێیا نوونەرەکێ خوە یێ تایبەت ناما خوە بگەھینتە روسیا.
ھەتا نھا بەرپرسێن ئیرانێ دیار نەکرینە کا ناڤەرۆکا ناما خامنەیی چیە و ھەروەسا بەرپرسێن روسیا ژی ھەتا نھا د ڤێ دەربارێ دا چ داخۆیانیەک فەرمی بەلاڤ نەکرینە.
