پولیسێن زاخۆ ده‌ست ب دوو هه‌وان كر
زاخۆ، عه‌لی و دلۆڤان:
به‌رپرسێ راگه‌هاندنا پۆلیسێن زاخۆ بۆ رۆژناما ئه‌ڤرۆ دیار كر وان ده‌ست ب دو هه‌وێن به‌ره‌فره‌ه ژ بۆ نه‌هێلانا خازۆكیێ ل ئیداره‌یا سه‌ربخوه یا زاخۆ كرینه و دبێژیت: ل زاخۆ گڕۆپه‌كێ گه‌نجان په‌یدابوویه، كو د ناڤ تاخ و كۆلانێن باژێڕی دا دگه‌ڕن و فێلبازیان ل ژنان دكه‌ن.
رائید نه‌هشه‌ت سه‌لمان، به‌رپرسێ راگه‌هاندنا پۆلیسێن زاخۆ گۆت: “مه د هه‌یڤا ره‌مه‌زانا پیرۆز دا، ده‌ست ب هه‌وه‌كا به‌رفره‌ه ل سنوورێ ئیداره‌یا سه‌ربخوه یا زاخۆ ژ بۆ ده‌سته‌سه‌ركرن و نه‌هێلانا خازۆكیێ د ناڤ سه‌نته‌رێ باژێرێ زاخۆ دا كریه، ژبه‌ر كو د ڤێ مه‌هێ دا زێده‌تر دیاردا خازۆكیێ دهێته كرن”.
گۆتژی: ” د رۆژا ئێكێ دا ئه‌م شیاین شه‌ش خازخازوكان ده‌سته‌سه‌ر بكه‌ین، كو چار ژ وان ئافره‌ت بوون، دیسا مه ده‌ست ب هه‌وه‌كا دیتر یا به‌رفره‌ه ژ بۆ ده‌سته‌سه‌ركرنا ب كارئینه‌ر و بازرگانێن مادده‌یێن هۆشبه‌ر و ئه‌و كه‌سێن مه‌یی ڤه‌دخون كریه”.
ل دوماهیێ گۆت: “مه بازرگانه‌كێ مادده‌یێن هۆشبه‌ر ده‌سته‌سه‌ر كریه، كو چه‌ندین جۆرێن مادده‌یێن هۆشبه‌ر د گه‌ل دا بوون، دیسا مه شه‌ش كه‌س ده‌سته‌سه‌ركرینه، كو مه‌ی ڤه‌دخوار و ل دووڤ بڕیارا حكومه‌تا هه‌رێما كوردستانێ ڤه‌خوارنا مه‌یێ د مه‌ها ره‌مه‌زانێ دا قه‌ده‌غه‌یه”.
ڕاید نه‌هشه‌ت سه‌لمان زێده‌تر گۆت: “ل زاخۆ گڕۆپه‌كێ گه‌نجان په‌یدا بوویه، كو د ناڤ تاخ و كۆلانێن باژێڕی دا دگه‌ڕن و فێلبازیان ل ژنان دكه‌ن، ئه‌ڤ گڕۆپێ گه‌نجێن فێلباز ل ناڤ تاخ و كولانێن باژێڕی دگه‌ڕن و فێلبازیان ل ژنان دكه‌ن”.
