پڕۆسا تاپۆکرنا خانیێن زێدەگاڤی دێ ھێتە دەستپێکرن
ئەڤرۆ نیۆز، قائید میرۆ:
لھەرێما کوردستانێ نێزیکی ٣٠٠ ھزار خانیێن زێدەگاڤی ھەنە و بڕیارە گورەی قانوونا ھژمارە سێ یا پەرلەمانێ کوردستانێ بھێنە تاپۆکرن، ئەندامەکا لیژنا باژێڕڤانیانژی ئاشکراکر، دێ رێنمایی بۆ پڕۆسا تاپۆکرنا خانیان ژلایێ وەزارەتا باژێڕڤانی بھێنە دەرکرن.
نەجات ئامێدی، ئەنداما لیژنا باژێڕڤانیان لپەرلەمانێ کوردستانێ بۆ ئەڤرۆ نیۆز دیارکر” قانوونا تاپۆکرنا خانیێن زێدەگاڤی دێ ھێتە بجە ئینان، چونکە ژلایێ پەرلەمانی ڤە ھاتیە دەرکرن و ل رۆژناما فەرمیی ھاتیە بەلافکرن، لەوڕا پشتی ھاتیە بەلافکرن دێ وەک قانوون ھێتە ھژمارتن و بجە ئینان.
لدۆر رێکارێن بجە ئینانێ ئامێدی دبێژیت” بجهئینانا قانوونا تاپۆکرنا خانیێن زێدەگاڤی ئەرکێ وەزارەتا باژێڕڤانیێ یە و ئەز باوەرم دێ پڕۆسا تاپۆکرنێ بھێتە دەستپێکرن، بەلێ پشتی خوە بەرھەڤکرن و دەرکرنا رێنمایێن تایبەت ب تاپۆکرنا خانیان.
