پڕۆژه‌یه‌كێ ستراتیژیێ وه‌به‌رهێنانێ ل دهۆكێ دێ هێته بجهئینان
هه‌ولێر، قائید میرۆ:
هژماره‌كا پڕۆژه‌یێن ستراتیژی یێن كه‌رتێ وه‌به‌رهێنانێ دێ كه‌ڤنه د بیاڤێ بجهئینانێ دا و سه‌رۆكێ ده‌سته‌یا وه‌به‌رهێنانێ ژی ئاشكرا كر، ئێك ژ وان پڕۆژان دكه‌ڤیته سنوورێ پارێزگه‌ها دهۆكێ و مفایه‌كێ زۆر دێ بۆخه‌لكێ ده‌ڤه‌رێ هه‌بیت.
دكتۆر محه‌مه‌د شوكری، سه‌رۆكێ ده‌سته‌یا وه‌به‌رهێنانێ بۆ رۆژناما ئه‌ڤرۆ دیار كر، بڕیاره هژماره‌كا پڕۆژه‌یێن وه‌به‌رهێنانێ ل هه‌رێما كوردستانێ بهێنه بجهئینان و گۆت: “ب ئه‌نجامدانا وان پڕۆژێن ستراتیژی دێ كاریگه‌ری ل سه‌ر په‌یداكرنا ده‌لیڤێن كاری و زێده‌بوونا داهاتێ هه‌رێما كوردستانێ هه‌بیت، ل گوره‌ی پلانا ده‌سته‌یا وه‌به‌رهێنانێ گرنگیه‌كا تایبه‌ت ب پڕۆژێن ستراتیژی هاتیه‌دان، چونكو سیاسه‌تا حوكمه‌تا هه‌رێما كوردستانێ ئه‌ڤه‌یه گرنگیێ بده‌ته پڕۆژه‌یێن ستراتیژی یێن كه‌رتێ وه‌به‌رهێنانێ”.
دكتۆر محه‌مه‌د شوكری گۆتژی: “ئێك ژ وان پڕۆژه‌یێن ستراتیژی دكه‌ڤیته سنوورێ پارێزگه‌ها دهۆكێ ئه‌و ژی پڕۆژێ ئاژه‌لداری و به‌رهه‌مێن سپیاتیه، كو ئێكه ژ وان پڕۆژێن ستراتیژی و بڕیاره بكه‌ڤیته د بیاڤێ بجهئینانێ دا، ل سه‌ر ئاستێ عیراقێ تایبه‌تمه‌ندیا خوه هه‌یه، پڕۆژێ ستراتیژی یێ ئاژه‌لان و به‌رهه‌مئینانا سپیاتیان ل دهۆكێ مفایه‌كێ زۆر بۆ كه‌رتێ ئاژه‌لداری دێ هه‌بیت ئه‌ڤه سه‌ره‌ڕای ڤێ چه‌ندێ ده‌لیڤێن كاری بۆ وه‌لاتیان دێ په‌یدا كه‌ت”.
