پڕۆژەیێ قەرێن بچووك دێ هێتە ڤەكرن و 100 كەس دێ مفاداربن
هەرهین محەمەد:
رێڤەبەرێ قەرێن بچووك ل پارێزگەها دهۆكێ دیار كر، ل ڤان نێزیكان جارەكا دی پرۆژێ گەشانەوە دێ هێتە ڤەكرن و ئەڤ جارە دێ نێزیكی 100 كەسان ل سەرانسەری هەرێما كوردستانێ مفاداربن، هەر دیسان ئەڤجارە نە ب تنێ جوتیار و خودان كومپانی و كارگەه دێ د مفاداربن و دبیت لایێن دی ژی ژ ئەڤی پرۆژەی مفاداربن.
گوهدار عەبدوللا، رێڤەبەرێ قەرێن بچووك بۆ لاوان بۆ رۆژنامەیا ئەڤرۆ گۆت: پرۆژێ گەشانەوە بەری دو سالان هاتە ڤەكرن، ب تنێ 25 كەس ژ هەرێما كوردستانێ مفاداربوون و هەشت كەس ژ پارێزگەها دهۆكێ بوون، ژڤانە ل نێزیك بهێتە ڤەكرن و ئەڤ جارە ل سەرانسەری هەرێما كوردستانێ 100 كەس دێ مفاداربن و بەهرا دهۆكێ دێ ژ 20 كەسان وێڤەتربیت و جارا دی نێزیكی 55 كەسان داخازكربوو، ئەڤ پرۆژە ل دەستپێكێ تێست بوو، ب تنێ بۆ خۆدان كارگەه و كومپانی و جوتیاران بوو، بەلێ ئەڤ جارە مە داخوازكریە بەرفرەهتر لێبكەن.
رێڤەبەرێ قەرێن بچووك بۆ لاوان گۆت ژی: ل سالا 2011 دەست ب دانا قەرێن بچووك هاتەكرن و هەتا 2016 ژبەر قەیرانا دارایی و برینا مووچەی هاتنە راوەستاندن و هەتا نوكە نەڤەبووینە، 2347 كەس ژ پارێزگەها دهۆكێ مفاداربووینە، ل سەرانسەری كوردستانێ و نێزیكی 8100 ژێ مفاداربووینە و ژ وان 2347 كەسان، 188 كەسان نەوەرگرتن و ناڤێن وان نەهاتن، ژ بەر هەر ئەگەرەكێ بیت 2159 كەسان وەرگرتبوو و هەتا نوكە 1463 كەسان پارێ خوە هەموو زڤراندیە، ب تنێ 696 كەس ماینە نەزڤراندیە و پتریا وان ژبەر قەیرانا دارایی نەشیاینە قستێ خوە بدەن و ژ كەفیلێن وان دهێتە بڕین.
زێدەتر گۆت: بەری چەند هەیڤان حكومەتا هەرێمێ بریار وەسا دا هەر كەسێ قستێ خوە هەموویێ ل سەر ئێك بینیت 20% دێ هێتە لێبورین و 217 كەسان پارێ خوە ئینا و ئەڤ بریارە ژێگرت و ئەڤ بریارە ژی ب تنێ بۆ دەمێ شەش هەیڤان بوو، بەلێ نڤیساردایە ئەنجومەنێ وەزیران، ئەڤ بریارە دێ جارەكا دی هێت و هێتە درێژكرن و هەكە ئەڤ داشكاندنە هەبن خەلك قستێن خوە دئینن و دانا قستان ژی گرێدای مووچەی یە و هەكە بهێنە دان خەلك قستێن خوە ژی دئینن و نەئینن ژی ژ كەفیلی دهێتە برین.
