پڕۆژەیێ هایدرۆپاوەرێ دێرەلۆكێ 95% ب دووماهی هاتیە
ئامێدیێ ، مەحمود نهێلی:
كاركرن د پڕۆژەیێ هایدروپاوەرێ دێرەلۆكێ دا 95% ب دووماهی هاتیە و ب تمامبوونا كارێ ڤی پڕۆژەی دێ شێت پتر ژ 37 مێگاواتێن كارەبێ ب رێكا ئاڤێ بەرهەم ئینیت نوكە ژی دۆرێن حەفت مێگاواتێن كارەبێ ل سەر تۆرا نیشتمانی زێدە كرینە.
غازی عزەت، رێڤەبەرێ ناوچەداریا دێرەلۆكێ ب وەكالەت بۆ رۆژناما ئەڤرۆ دیار كر، ئەڤە ئێكە ژ پڕۆژەیێن سترتیژی ل دەڤەرێ دهێتە چێكرن و گۆت: «ئەڤ پڕۆژەیە ژ دو قووناغان پێك دهێت، قووناغا ئێكێ: چێكرنا ویستگەها كارەبێ بوو ل گەل كێشانا هێلەكا كارەبێ یا 133 كەیڤی ل سەرسنكێ بۆ دێرەلۆكێ و ب گوژمێ 22 ملیۆن و 400 هزار دۆلاران و نوكە 100% ب دووماهی هاتیە».
رێڤەبەرێ ناوچەداریا دێرەلۆكێ دیار ژی كر، قووناغا دویێ: چێكرنا سكری یە ل گەل تۆربینان و گوژمێ 129 ملیۆن دۆلار بۆ هاتینە تەرخانكرن، نوكە نێزیكێ 65% هاتیە چێكرن و گۆت: «ماوێ ڤی پڕۆژەی هزار و 600 رۆژن، بلنداهیا سكری 18 میترن و فرەهیا بنێ سكری 17 میترن و فرەهیا سەرێ سكری ژی دبیتە 5 میتر».
ناڤهاتی ئاشكرا كر، ئەڤ پڕۆژەیە ژ دو تۆربینا پێك دهێت، دەمێ كاركرنێ دێ دۆرێن 37.2 مێگاواتێن كارەبێ بەرهەمئینیت و ب تۆرا كارەبا نیشتمانی ڤە دێ هێتە گرێدان.
پڕۆژەیێ هایدروپاوەرێ دێرەلۆكێ نووترین پڕۆژەیێن ستراتیژی یێن دەڤەرا ئامێدیێ یێ بەرهەمئینانا كارەبێ یە ب رێكا ئاڤێ و ب گوژمێ 151 ملیۆن دۆلاران ل سەر قەرێن ژاپونێ دهێتە چێكرن، دیسا دەلیڤێن كاری بۆ 50 وەلاتیان دابین كرینە و ب دوستێ ژینگەهێ دهێتە نیاسین، لێ ژ بەر كێمیا ئاڤێ و تمام نەبوونێ ب دروستی نوكە دشێت ب تنێ حەفت مێگاواتێن كارەبێ بەرهەم بینیت و ب كارەبا نیشتمانی ڤە هاتیە گرێدان و زێدەباری وێ یەكی شیایە ئاریشیا كێمیا ڤولتیێ ل وێ ناوچێ چارەسەر بكەت.
