پڕۆژەیێ كۆڕنیشێ پرا دەلال و چەند گۆتنەك
سەدیق سنداڤی
بەری نێزیكی سێزدە سالان گۆتارەكا من ب مانشێتێ (چەند دچە پڕا دەلال دەلالییا خوە ژ دەست د دە) د ڕۆژنامەیا ئەڤڕۆ دا هات بەلاڤكرن، لێ ئەڤرۆ سپاس بۆ خودێ كو ئەم دبینن كۆرنیشێ پڕا دەلال، دەلالە و جوانیەكا كو چ بۆ نائێتە گۆتن ددە پرا دەلال و باژارێ زاخۆ و كوردستانێ هەمیێ، دیمەنەكێ بێ پەردەیە بۆ هەر كوردستانیەكێ و حەزكڕێن كوردان، كو بەلێ كوردستان یا بەردەوام بەر ب گەشەكرنێ ڤە دچە، فاكتەرەكێ سەرەكییە بۆ رەڤەندا كوردستانێ و زاخۆیێن ڤەدەر كو هزر د ڤەگەرا كوردستانێ دا بكن و مشەختیا بەروڤاژی دەست پپێ بكەت. خالەكا ناڤەندە ژبۆ جوانی و پاكی و پێشڤەچوونا هەمی باژێارن كوردستانێ. پشتە بۆ ژێدەرێ دەبارا ب سەدان خێزانێن زاخۆییان و كوردستانێ. دەرفەتێن كاری، گەرمبوونا بازاڕی پەیدادكت گەشت و گوزارێ ب هێزدئێخت ل دەڤەرا ئیدارا سەربەخوەیا زاخۆ و كوردستانێ هەمیێ.
سەرەدانا ڤی پڕۆژەیێ بالكێش و بۆڕینا دەمێن خوەش ل گەل دیمەنێن جوانێن پڕا دەلال و مشمشا ئاڤا خابیرێ زەلال و چیا و زیرێن دەوروبەر، سترێسا كاری و خەمۆكیێ و نەخۆشیێن دەروونی ناهێلە سڤك دكە و مرۆڤی دبتە دنیایەكا دی یا ئەڤینێ و بیرەوەرێن زێرین و تەناهی و بێهنفرەهیێ و شادبوونی دبەخشینە.
دەما جار ب جار من سەردانا پڕا دەلال دكر، بەری ئەڤ پڕۆژە بێتە جهبجهكرن ب چەند سالان هەروەكی ئەڤ دیمەنێن ڤی پڕۆژەیێ مەزن یێ ئەڤڕۆ ئەز دبینم دهاتنە بەر چاڤێن من هزر د هشمەندیا من دا دئازرین گەلۆ چما پرۆژەیەك نائێتە دروستكرن، پڕا دەلال ژ خراببوونێ قورتال ببت. سپاس بو خۆدێ كو ئەو هیڤی بجه هات و كا چاوا من هزر پێ كری، ها ئەڤڕۆكە ئەز وەسا دبینم و پتر ژی، ب حەزكرنا خودێ هەمی داخوازیێن ڕەوا یێن ڤی مللەتی دێ ئێنە پێكئیناندن.
ئەڤ پێنگاڤە وەسا ژ نیشكەكێ ڤە ن هاتە د هەبوونێ دا، بەلكو بەرهەمێ جۆباریێن خوینا ڤی گەلی یە و ماندیبوونەكا دویڤدرێژ و خەباتەكا بێ سنوور یا كۆر و كەچێن ڤی وەلاتی یە. ل ڤێرێ ئەز نابێژم دەستخوەش و وەكی منەت ژی نابینم، چونكو گەلێ كوردستانێ ب گشتی و خەلكێ زاخۆ ب تایبەتی هەژیێ بهتر و بهترێنە، نابیتە چپكەك ژ بەرامبەریەكا بوجیكا رەنج و خەباتا ڤی گەلی و خەلكێ سەربلندێ و خوەراگرێ زاخۆكا دەلال و گەلێ كوردستانێ. ئەڤەژی ئەركە و خودان ئەرك دەستخوەشی لێ نائێتە كرن، بەلكو جهبجهكرنا ئەركی د دلدا بۆ هەتا هەتایێ دئێت هلگرتن.
نەخشە ل ژناڤچوونا گەندەلیێ و بلندراگرتنا یاسای ژ لایێ هەر كەسی ڤە و دەرفەتێن كاری و دابینكرنا بریسیا گشتی یا ٢٤ دەم ژمێری (كەهرەبێ) و تەرخانكرنا مووچەیەكێ بو كێم دەرامەتان ب گۆر پێدڤیبوونێ ب مووچەیەكا هەیڤانە ل سەر بنسترا وەك هەڤیێ و یاسای و نەهێلانا ڤەدا هەژاریێ و نەمانا خوازخوازۆكان د ناڤ بازاری دا و هەر خزمەتەكێ كو پێدڤییە بۆ ڤی گەلێ خوەراگر و هەژی بێتە پێكئیناندن.
