پڕۆژەیەكێ گرنگ و ستراتیژی ل زاخۆ دهێتە ئەنجامدان
زاخۆ، دلۆڤان هالۆ:
ئیدریس عەبدوللا، جێگرێ سەرۆكێ باژێرڤانیا زاخۆ بۆ ڕۆژناما ئەڤرۆ دیاركر كو ب گوژمێ 15 ملیار و 630 ملیۆن دیناران پڕۆژەیەكێ گرنگ و ستراتیژی ل ئیدارەیا سەربخوە یا زاخۆ دهێتە دروستكرن، پڕۆژە ژ ئۆڤەرپاس و ئەندەرپاسەكێ ل سەر جاددەیا گشتی یا گوندكی پێك دهێت.
جێگرێ سەرۆكێ باژێرڤانیا زاخۆ، ئاماژە ب وێ چەندێ ژی كر كو پڕۆژە ب ڕێژەیا 40% كار تێدا هاتیە كرن و گۆت: «ئەڤ پڕۆژە ب شێوەیەكێ ئەندازیاری یێ پێشكەفتی دهێتە ئەنجامدان، دیسا پڕۆژە دێ بیتە ئەگەرێ ڕاكرنا شەش تڕافیكلایتان، ئانكو ژ جاددەیا گوندكی هەتا دگەهیتە دەڤەرداریا باتیفا تڕافیكلایت نامینن».
گۆت ژی: «ئارمانجا سەرەكی یا ڤی پڕۆژەی ئەوە، جاددەیا گوندكی ببیتە ڕێكەكا سەرەكی، كو گەڕەكان ب شێوەیەكێ بلەز ب سەنتەرێ باژێڕی ڤە گرێ بدەت، ڤێ جادەیێ پێدڤیەكا زۆر ب ڕێكخستنا هاتنوچوونێ ڤە هەبوو».
